Hidayət Heydərov

Hidayət Heydərov (27 iyul 1997) — 73 kq çəki dərəcəsində çıxış edən azərbaycanlı cüdoçu. Cüdo üzrə Azərbaycan milli komandasının üzvü. 2017-ci ilin Avropa çempionu, 2018-ci ilin dünya üçüncüsü.

Hidayət Heydərov
Şəxsi məlumatlar
Tam adı	Hidayət Minayət oğlu Heydərov
Vətəndaşlığı	Azərbaycan
Doğum tarixi	27 iyul 1997 (24 yaş)
Doğum yeri	Karaqanda, Qazaxıstan
Məşqçisi	Tərlan Həsənov (şəxsi) Mehman Əzizov (millidə)
Boyu	1.76
Çəkisi	73 kq
İdman növü	Cüdo
Ağırlıq dərəcəsi	73 kq
Medallar Dünya Çempionatı Bürünc 2018 Bakı 73 kq Bürünc 2019 Tokio 73 kq Avropa Oyunları Bürünc 2019 Minsk 73 kq Avropa Çempionatı Qızıl 2017 Varşava 73 kq Gümüş 2018 Tel-Əviv 73 kq Bürünc 2019 Minsk 73 kq Yay Universiadası Gümüş 2019 Neapol 73 kq Bürünc 2019 Neapol Komanda İslam Həmrəyliyi Oyunları Qızıl 2017 Bakı 73 kq

Həyatı

Hidayət Heydərov 27 iyul 1997-ci ildə Qazaxıstan SSR-nin Karaqanda şəhərində dünyaya gəlib. Onun ailəsi əslən Göyçayın Alxasava kəndindəndir. Hidayət 3 yaşında olarkən ailəsi Bakıya köçüb. Hidayətin atası da idmana maraq göstərirdi. Atası Hidayət 6 yaşında olarkən, dostlarının da məsləhətilə onu Neftçilər metrostansiyasının yaxınlığına yerləşən cüdo məktəbinə yazdırır. Atası bu yolla oğlunun daha dayanıqlı olmasını, hücumlardan özünü qorumasını istəyirdi. Hidayətin ilk müəllimi Tərlan Həsənov olub. O, hələ də ilk məşqçisiylə çalışır. Millidə məşqçisi isə Mehman Əzizovdur.

2012-ci ildə ildə kadetlər arasında Azərbaycan çempionatında bürünc medal qazanıb.

2013-cü ildə kadetlər arasında Avropa və böyüklər arasında Azərbaycan çempionu olub.

2014-cü ildə Yunanıstanın paytaxtı Afina şəhərində keçirilən kadetlər arasında Avropa birinciliyində 66 kiloqram çəki dərəcəsində mübarizə aparan Hidayət Heydərov portuqaliyalı David Reisə, israilli Oran Ginerə, gürcüstanlı Beka Udesianiyə və isveçrəli Naim Matta qalib gələrək finala yüksəlib. Həlledici görüşdə Rusiya cüdoçusu İsmayıl Çasiqovdan üstün olan Heydərov bir il əvvəl olduğu kimi, yenə də fəxri kürsünün ən yüksək pilləsinə qalxıb.

2015-ci ildə BƏƏ-nin Əbu-Dabi şəhərində gənc cüdoçular arasında keçirilən dünya çempionatında yalnız bir görüşdə məğlub olaraq bürünc medal qazanıb. Fələstin, Kosta-Rika, Avstriya və Niderland Krallığı idmançılarını məğlub edən Heydərov yarımfinalda Yaponiya cüdoçusu Masaya Asariyə uduzub. Üçüncü yer uğrunda görüşdə kolumbiyalı Xuan Telyoya qalib gələn Hidayət mundialın bürünc medalına sahib çıxıb. Eyni ilin noyabr ayında Slovakiyanın Bratislava şəhərində keçirilən 23 yaşadək cüdoçular arasında Avropa birinciliyində bürünc medal qazanıb. 73 kq çəki dərəcəsində yarışan cüdoçu ilk görüşdə Moldova təmsilçisi George Blanarunu məğlub edib. Növbəti mərhələlərdə rusiyalı Arbi Xamxoyev, ukraynalı Artyom Xomulaya qalib gələn Hidayət yarımfinalda İtaliya cüdoçusu Antonio Espozitoya uduzub. Üçüncü yer uğrunda görüşdə Monteneqro nümayndəsi Nikola Qusiç üzərində qələbə qazanan Hidayət Avropa birinciliyinin bürünc medalına sahib olub.

Hidayət Heydərov 2016-cı ildə İspaniyanın Malaqa şəhərində gənclər arasında təşkil olunan cüdo üzrə Avropa birinciliyində iştirak edib. 73 kq çəki dərəcəsində mübarizə aparan cüdoçu rumıniyalı Aleksandru Rayku, Polşa idmançısı Tomaş Çernyavski, böyük britaniyalı Daniel Pauell və kosovalı Akil Qyakova üzərində qələbə qazanaraq finala vəsiqəni təmin edib. Həlledici mərhələdə gürcüstanlı Giorgi Katsiaşvilini də məğlub edən Hidayət Heydərov Avropa çempionu tituluna yiyələnib. Hidayət eyni ilin noyabr ayında İsrailin paytaxtı Təl-Əviv şəhərində təşkil olunmuş 23 yaşadək cüdoçular arasında Avropa birinciliyində iştirak edib. 73 kq çəki dərəcəsində yarışan Hidayət Heydərov finala gedən yolda Kipr, Belçika, Kosovo və Rusiya idmançılarını məğlub edib. Həlledici görüşdə tatami sahibi Tohar Butbuka qalib gələn Hidayət Heydərov Avropa çempionu olub.

2017-ci ildə Polşanın paytaxtı Varşava şəhərində keçirilən Avropa çempionatında iştirak edən Hidayət Heydərov mübarizəyə 1/16 final mərhələsindən başlayıb. O, ispaniyalı Xavyer Ramires, türkiyəli Həsən Vanlıoğlu, isveçli Tommi Masyak və macarıstanlı Mikloş Unqvarini yendikdən sonra finala çıxıb. Həlledici görüşdə o, rusiyalı Musa Moquşkova qızıl xalla qalib gələrək, Avropa çempionu olub. 23 aprel 2017-ci ildə Avropanın "Ən yaxşı gənc cüdoçu"su mükafatına layiq görülüb. 13 may 2017-ci ildə Bakıda keçirilən IV İslam Həmrəyliyi Oyunlarında 73 kq çəki dərəcəsində mübarizə aparan Hidayət Heydərov finalda azərbaycanlı Rüstəm Orucovu üstələyərək qızıl medala yiyələnib.

Şəxsi həyatı

Hidayət Heydərov hələ kiçik vaxtlarından döyüş idman növləri ilə yanaşı, futbola da maraq göstərib. O, uşaq yaşlarından "Mançester Yunayted" futbol klubunun qatı azarkeşidir. Hidayət boş vaxtlarında futbol və basketbol oynamağı sevir.

İstinadlar

1. Kənan (1 oktyabr 2016). "Tokio Olimpiadasını "qaralayan" gənc - Portret" ( (azərb.)). Kaspi. İstifadə tarixi: 27 avqust 2018.
2. "HIDAYET HEYDAROV JUDOKA". Judoinside.com.
3. "Avropa birinciliyində daha bir qızıl medal". İdman Azərbaycan.^{[ölü keçid]}
4. "Cüdoçumuz Əbu-Dabidə medal qazandı". Xeber.az.^{[ölü keçid]}
5. "Avropa birinciliyində daha bir medal". Lent.az.
6. "Cüdoçularımız Avropa birinciliyində böyük uğura imza atdılar". Neftchi.org.
7. "Azərbaycan cüdoçusu İsraildə Avropa çempionu olub". Report.az.
8. "Azərbaycan cüdoçusu Hidayət Heydərov karyerasında ilk dəfə Avropa çempionu olub". Report.az.
9. "Hidayət Heydərov Avropanın "Ən yaxşı gənc cüdoçu"su mükafatına layiq görülüb - FOTO". Report.az.
10. . xalqqazeti.com. 2017-05-16 tarixində orijinalından arxivləşdirilib. İstifadə tarixi: 2017-05-16.

Xarici keçidlər

• Judoinside saytında nəticələri
• Judoinside saytında nailiyyətləri