Vüqar Həşimov

Vüqar Qasım oğlu Həşimov (24 iyul 1986(1986-07-24), Bakı – 11 yanvar 2014(2014-01-11), Karlsrue^[d], Baden-Vürtemberq) — Azərbaycan şahmatçısı, qrossmeyster (2002).

Vüqar Həşimov
Ölkə	Azərbaycan
Doğum tarixi	24 iyul 1986(1986-07-24)
Doğum yeri	Bakı, Azərbaycan SSR, SSRİ
Vəfat tarixi	11 yanvar 2014(2014-01-11) (27 yaşında)
Vəfat yeri	Heydelberq, Karlsrue^[d], Baden-Vürtemberq, Almaniya
Dəfn yeri	II Fəxri Xiyaban
Titulu	qrossmeyster (2002)
Son reytinqi	2737 (yanvar 2014)
Maksimal reytinqi	2761 (yanvar 2012)
Ən yüksək reytinq yeri	6-cı (noyabr 2009)
FİDE nömrəsi	13400630
Vikianbarda əlaqəli mediafayllar

Həyatı

Vüqar Həşimov 24 iyul 1986-cı ildə Bakı şəhərində anadan olub. Vuqar Həşimov 11 yanvar 2014-cü ildə müalicə olunduğu Almaniyanın Heydelberq klinikasında dünyasını dəyişib. 14 yanvar 2014-cü ildə mərhumla vida mərasimi Respublika Şahmat Mərkəzində təşkil olunmuş; o, həmin gün II Fəxri Xiyabanda dəfn edilmişdir.

Şəxsi həyatı

Vüqar Həşimov şahmatdan başqa məharətlə pianinoda da ifa edirdi. Poeziyanı sevirdi. Boş vaxtlarında Futbol və böyük tennislə məşğul olurdu. Vüqar Həşimov fenomen yaddaşı ilə dünya tarixini, coğrafiyasını, musiqisini, idmanını və 7-dən çox xarici dili mükəmməl bilirdi.

Fəaliyyəti

Vüqar Həşimov 2002, 2004, 2006 və 2008-ci illərin Şahmat Olimpiadalarında Azərbaycan yığmasının tərkibində çıxış etmişdir. 2009-cu ildə Azərbaycan yığmasının heyətində Avropa Çempionu adını qazanmışdır. Dəfələrlə 1958-ci ildən İtaliyada müntəzəm olaraq keçirilən Recco-Emiliya şahmat turnirinin qalibi olmuşdur.

2009-cu ildə məhz Qrossmeyster Vüqar Həşimov Azərbaycan Şahmat yığmasını Avropa çempionu etmişdir. 2009-cu ildə Çinin paytaxtı Pekində keçirilən Dünya İntellektual oyunlarının Rapid növündə gümüş medal, gözübağlı sürətli şahmat növündə isə bürünc medala sahib çıxmışdır. 2008-ci ildə Bakıda keçirilən Planetin I Qran Piri mərhələsində qızıl medala sahib olmuşdur.

27 dəfə Azərbaycan bayrağını dünya və avropa şahmat arenalarında yüksəkliklərdə dalğalandırmışdır.

Yarışlar

Vüqar Həşimov 2011-ci ildə Rusiyanın Xanti-Maysiysk şəhərində təşkil olunan Dünya Kubokunda 1/4 final mərhələsində mübarizəni dayandırıb. Vüqar həmin ilin noyabrında Yunanıstanın Porto Karras şəhərində keçirilmiş komandalar arasında Avropa Çempionatında Azərbaycan yığmasının heyətində yer alıb və 2009-cu ildə qazandıqları çempionat titulunu qoruya bilməyərək yarışı gümüş medalla başa vurublar. Avropa Çempionatından təxminən bir ay sonra, dekabr ayında Vüqar Çinin paytaxtı Pekində keçirilən “SportAccord” Dünya İntellektual Oyunlarında iştirak edib. Bu oyunlarda rapid növündə gümüş medal qazanan Vüqar gözübağlı sürətli növdə bürünc medala sahib çıxıb. Yarışın rəsmi saytı bütün iştirakçıların oxşarlarını açıqladıqları siyahıda Vüqar Həşimovun xasiyyətinə görə Ceki Çana oxşadığını qeyd edib.

Xronologiya

• 1996/1998/1999/2000/2001/2009/2011-ci il – Slovakiya, Avstriya, Yunanıstan, Bakı, Serbiya–Avropa çempionu və vitse çempion
• 1996/2000/2002-ci il – Ukrayna, Aluşta, İspaniya, Minorka dünya çempionatının vitse çempionu
• 1996/1998/2005/2007/2011-ci il – Rumıniya, İspaniya, Afina, Əbu-Dabi, Monako beynəlxalq turnirlərinin qalibi
• 1997-ci il – İstanbul “Zafer Haftesi” open turnirin qalibi
• 1999-cu il – Rusiya, Moskva “Kasparov Kubokunun” qalibi
• 1999-cu il – Beynəlxalq Usta
• 2000-ci il – Ukrayna şahmat olimpiadasının qalibi
• 2002-ci il – “Trip Lite və Best Comp Qrup” kubokunun qalibi
• 2002-ci il – Qrossmeyster
• 2004-cü il – Heydər Əliyevin xatirəsinə həsr edilmiş Sürətli şahmat turnirinin qalibi
• 2005/2007/2008-ci il – Türkiyə, İstanbul şahmat festivalının qalibi
• 2006/2007/2008-ci il – Fransa Kapella la Qrand open turnirinin qalibi
• 2007-ci il – İspaniya, Barselona, Sanxenxo beynəlxalq turnirin qalibi
• 2007-ci il – Yunanıstan, Krit adası Avropa komanda birinciliyi vitse çempion
• 2007-ci il – Norveç, Tronso beynəlxalq turnir vitse çempion
• 2007-ci il – Kuba, Havana kapablanka memorialının qalibi
• 2007/2008/2010/2011 – İtaliya, Redjio Emiliya – beynəlxalq turnirin qalibi
• 2008/2009 -cu il – Rusiya Poykovskiy, Gibraltar Cəbəllütariq beynəlxalq turnirin qalibi
• 2008 ci il – Almanya, Drezden şahmat olimpiadasanın vitse çempionu
• 2009-cu il – Heydər Əliyevin 85 illiyinə həsr olunmuş FİDE-nin I Qrand-Prix Bakı turnirinin qalibi
• 2009-cu il – İspaniya, Orenje sürətli şahmat üzrə avropa çempionu
• 2009-cu il – Heydər Əliyevin xatirəsinə Prezident kuboku. Azərbaycan-FİDE dünya matçı
• 2009-cu il – Azərbaycanın ən güclü idmançısı
• 2009/2010/2011-ci il – İspaniya, Xorvatiya, Moldaviya, Almaniya, çempionu
• 2009/2011-ci il – Almaniya, Maynz , Pekin, Çin rapid üzrə vitse çempionu
• 2011-ci il – Dünya intellektual oyunlarının vitse çempionu

Xatirəsi

2014-cü ilin aprel ayında, Şəmkirdə Vüqar Həşimovun xatirəsinə həsr olunmuş beynəlxalq şahmat turniri təşkil edilmişdir. Turnirdə Maqnus Karlsen, Fabiano Karuana, Şəhriyar Məmmədyarov, Teymur Rəcəbov, Sergey Karyakin, Hikaru Nakamura, Etiyen Bakrot, Vang Hao, Rauf Məmmmədov, Qədir Hüseynov, Pavel Elcanov, Rodoslav Voytaşek, Aleksander Motilev, Eltac Səfərli, Nicat Abbasov və Vasif Durarbəyli kimi şahmatçılar iştirak etmişdir.

Növbəti illərdə də bu turnir ənənəvi olaraq keçirilməyə davam edir..

24 iyul 2014-cü ildə Vüqar Həşimovun qəbirüstü abidəsinin açılış mərasimi olub. Bürüncdən olan abidənin müəllifi məşhur heykəltəraş Azad Əliyevdir.

2016-cı ildə Bakıda Qrossmeyster Vüqar Həşimov Şahmat Akademiyası fəaliyyətə başlamışdır.

İstinadlar

1. 11 yanvar 2014. "Şahmatçı Vüqar Həşimov dünyasını dəyişdi" (azərb.). Lent.az. İstifadə tarixi: 11 yanvar 2014.
2. Vüqar Həşimov III Fəxri Xiyabanda dəfn ediləcək. — qaynar.info
3. "Vüqar Həşimov: Şahmatla musiqinin sintezi çox ideal alınır" (Azərbaycan). Apasport.az. 15.12.2011. 2020-12-17 tarixində . İstifadə tarixi: 17.12.2020.
4. "Reggio Emilio – Gashimov takes top honors on tiebreak". ChessBase.com. 07-01-2011.
5. "Vüqar Həşimov dayandı, Teymur Rəcəbov şansını bu günə saxladı" (Azərbaycan). Apasport.az. 11.09.2011. 2020-12-17 tarixində . İstifadə tarixi: 17.12.2020.
6. "Milli komandamız Avropa çempionu titulunu qoruya bilmədi" (Azərbaycan). Apasport.az. 12.11.2011. 2020-12-17 tarixində . İstifadə tarixi: 17.12.2020.
7. "Qrossmeysterlərimiz Çindən 1 gümüş, 2 bürünclə qayıdırlar" (Azərbaycan). Apasport.az. 16.12.2011. 2020-12-17 tarixində . İstifadə tarixi: 17.12.2020.
8. "Ceki Çana oxşayan azərbaycanlı" (Azərbaycan). Apasport.az. 16.12.2011. 2020-12-17 tarixində . İstifadə tarixi: 17.12.2020.
9. "Tanınmış qrossmeyster Vüqar Həşimovun xatirəsi anılıb". www.azerbaijan-news.az. 2 fevral 2021 tarixində arxivləşdirilib.
10. "Vugar Gashimov Memorial to Start on Sunday". www.chess.com. 2 fevral 2021 tarixində arxivləşdirilib.
11. . KASPİ (azərb.). kaspi.az. 24.07.2014 - 15:52:00. 2015-03-22 tarixində orijinalından arxivləşdirilib. İstifadə tarixi: 25.07.2014.
12. "Bakıda Vüqar Həşimov Şahmat Akademiyasının təntənəli açılış mərasimi". azertag.az. 2 fevral 2021 tarixində arxivləşdirilib.

Xarici keçidlər

 

   

Vikianbarda Vüqar Həşimov ilə əlaqəli mediafayllar var.

 

   

Vikimənbədə Vüqar Həşimov ilə əlaqəli məlumatlar var.

 

   

Vikisitatda Vüqar Həşimov ilə əlaqəli məlumatlar var.

• Vüqar Həşimov 365Chess.com veb-saytında  (ing.)
• http://interviews.chessdom.com/vugar-gashimov 2015-03-18 at the Wayback Machine
•   Son gediş - Vüqar Həşimov