Ərkivan
Ərkivan — Azərbaycan Respublikasının Masallı rayonunun inzibati ərazi vahidində qəsəbə.
Qəsəbə | |
Ərkivan | |
---|---|
39°00′39″ şm. e. 48°38′46″ ş. u. | |
Ölkə | Azərbaycan |
İqtisadi rayon | Lənkəran iqtisadi rayonu |
Rayon | Masallı rayonu |
Tarixi və coğrafiyası | |
Sahəsi | 22.94 km² |
Mərkəzin hündürlüyü | 14 m |
Saat qurşağı | UTC+04:00 |
Əhalisi | |
Əhalisi | 17 500 nəfər (2017) |
Sıxlığı | 762.86 nəf./km² |
Rəqəmsal identifikatorlar | |
Poçt indeksi | AZ4415 |
Vikianbarda əlaqəli mediafayllar |
5 mart 2013-cü ildə Allahyarlı kəndi Yeyənkənd kənd inzibati ərazi dairəsinin tərkibindən ayrılaraq, Ərkivan qəsəbə inzibati ərazi dairəsi tərkibinə verilmişdir.
Tarixi
Azərbaycan Respublikası Masallı rayonunun Ərkivan qəsəbəsi respublikanın qədim yaşayış məntəqələrindəndir. Burada aşkar edilmiş tunc və dəmir dövrünə aid tapıntılar da bunu sübut edir.
Ərkivan qəsəbəsi Masallı şəhərindən 2 km qərbdə, Viləş çayının sağ sahilində, Talış dağlarının ətəyində, Lənkəran ovalığında yerləşir. Lənkəran ovalığı isə Talış sıra dağları ilə Xəzər dənizi arasında qərar tutub.
Ərkivan qəsəbəsi Talış xanlığının 8 mahalından biri olan Dəştvənd mahalına daxil olmuşdur. Bu mahal qərbdən Talış dağları, şərqdən Xəzər dənizi və Muğan düzü, cənubdan bugünkü Boradigahın, şimaldan Göytəpənin ərazisini əhatə edən çox sərvətli bir məkan olub. Ərkivan isə bu mahalın mərkəzi, sanki üzük qaşı sayılıb. Bir sıra tədqiqatçılar isə ümumiyyətlə Dəştvənd və Ərkivanın eyni yer olduğunu bildirirlәr. S. Kazımbəyoğlunun fikrincə, "Talış xanlığının ən böyük mahallarından biri olan Ərkivan, xanlığın şimalında yerləşib, qərb hissəsi dağlıq, şərqi isə düzənlik olan bir mahal olmuşdur. Şimaldan və şimal-şərqdən Şirvan vilayəti, şərqdən Xəzər dənizi, cənubdan Lənkəran və dağlıq mahalları, qərbdən Səfidəşt mahalı və İranla sərhəd olmuşdur."
Dəştvənd mahalının adına görə bir çox tədqiqatçılar Ərkivanı çöl kənarı, dəniz kənarı olan yer adlandırır. Sоn illərə qədər kənddə bir neçə yerdə tapılmış lövbər qalıqları buranın dəniz kənarında yerləşən bir yaşayış məntəqəsi olması ehtimallarını daha da gücləndirir. Xəzərin səviyyəsinin son minilliklərdə 6-7 dəfə kəskin şəkildə yüksəlməsi, Lənkəran şəhəri özü də daxil оlmаqlа, bir sıra yerlərin su altında qalması bu fikri bir daha təsdiq edir.
Bir sıra tarixçi alimlər Şeyx Səfinin (1252-1334) Ərkivanda olduğunu iddia edirlər.
Rus dilində çap edilmiş "Azərbaycanın tarixi coğrafiyası" kitabında XVI əsrə aid tərtib edilmiş xəritədə Ərkivan toponiminə də rast gəlinir.
Rus çarı I Pyotr (1672-1725) Ərkivan məntəqəsini Rusiya xadimlərindən "Kerç" ləqəbi ilə tanınan Bernard Aleksandroviçə hədiyyə etmişdi.
"Ərk" Fars dilində "qala", "istinadgah", "i" birləşdirici səs, "van" isə yer deməkdir. Ərkivanın mənası qalanın yaxınlığında, istinadgah yerində salınmış kənd deməkdir. Ərkivan qalalı yer, qala yeri deməkdir. "Ərk" qala, "van" yer deməkdir. Başqa bir mənbədə – Vaqif Yusiflinin "Ərkivan və ərkivanlılar" kitabında isə göstərilir: Ərkivan, Ərkəvan, Ardjuvan və Akon kimi göstərilir. "Akon" Talış dilində "əkon" sözündəndir. "Ə" o, "kə" ev, "on" cəm şəkilçisidir. Bu toponimin talışca daha inandırıcı variantı "Arkon"dur, yəni ərklilər deməkdir.
Dilçi alim, professor Ağamusa Axundova görə "Ərkivan" qala yeri deməkdir.
Məlum olduğu kimi, tariximizdə mühüm və əhəmiyyətli yer tutan Səfəvilər sülaləsi dünyəvi və ruhani hakimiyyəti birləşdirmişdilər. Ərkivanın Səfəvilərlə bağlılığı artıq təsdiq olunmuş həqiqətlərdəndir. Tarixçi alimlər Şeyx Səfinin Ərkivan kəndində (7 il) yaşadığını (1274-1281) qeyd edirlər. Tarixi mənbələrin verdiyi məlumata görə, 1501-ci ildə Təbrizdən qayıdarkən Şah İsmayıl Xətai yolüstü Ərkivanda dayanаrаq bir müddәt dincəlmiş və Şeyx Sәfi bulağından su içmişdir.
V-VI əsrlərdə tikilən Ərkivan qalası həmişə hərbi strateji əhəmiyyətə malik olmuşdur. Aparılan elmi tədqiqatlar Ərkivan qalasının müdafiə məqsədilə tikildiyini və düşmənə qarşı mərdliklə döyüşmüş Ərkivan əhalisinin qəhrəmanlıq simvolu olduğunu göstәrir.
Nadir şahın vəfatından sonra İranda mərkəzi hakimiyyət zəifləyir və Azərbaycanda ayrı-ayrı xanlıqlar, o cümlədən XVIII əsrin sonlarında Talış xanlığı meydana çıxır. Ərkivan qalası Talış xanlığının iqtisadi cəhətdən ən inkişaf etmiş ərazilərindən biri olmuşdur.
XVIII əsrin əvvəllərindən başlayaraq Ərkivan Rusiya dövlətinin diqqətini cəlb etməyə başlamışdır. XIX əsrin əvvəllərində Rusiya və İran arasında gеdәn müharibə dövründə (1904-1913) Ərkivan hər iki tərəf üçün mühüm əhəmiyyətə malik idi. Təsadüfi deyil ki, general Pyotr Kotlyarevskinin rəhbərliyi ilə Rus qoşunları Talış xanlığına gələrkən ilk növbədə Ərkivanı ələ keçirməyi daha vacib hesab edirdi. Bu zаmаn Ərkivanı Sadiq xanın rəhbərliyi ilə İran qoşunları qoruyurdu. O, Kotlyarevskiyə müqavimət göstərməyib cənuba doğru geri çəkildi. Rus qoşunları Ərkivanı ələ keçirdilәr. Abbasqulu ağa Bakıxanov yazır: "Pyotr Kotlyarevski Muğana gedib burada Qarabağ elatını və Ərkivanı aldı." "Rus və Talış qoşunlarının qələbəsi nəticəsində Ərkivan vuruşunda düşmənin 2 topu və çoxlu silahı ələ keçirildi."
"Cəvahirnameyi-Lənkəran" kitabında Ərkivan qalası barədə yazılıb: "Bu qala Mir Mustafa xanın səadət ulduzu çıxmamışdan Mir Əhməd xanın və onun əmisi uşaqlarının məskəni olmuşdur. Hazırda onlardan bir dəstəsi, o cümlədən, Mir Əhməd xanın övladlarının tikdirdiyi imarətin binası dağıdılmışdır." Аmmа 1747-1750-ci illərdə Ərkivan qalasının içində həmin imarəti tikmək üçün Mir Həsən xana vəsait verilmişdir. Həmin kitabda həmçinin qeyd olunmuşdur ki, bu imarət bir-birinin içində yerləşən üçqat divardan hörülmüş qala içərisində olmuşdur.
1812-ci il dekabrın 31-də 1813-ci ilin yanvarına keçən gecə Lənkəran şəhəri və Ərkivan tamamilə rusların əlinə keçir. Gülüstan müqaviləsindən sonra Ərkivan qalasında imarəti olan Mir Həsən xan burada hakimiyyət başına gəlir.
Bu gün Ərkivan qalasının taleyi necədir? Ərkivanın Cəbili məhəlləsində yerləşən bu abidə qızıl həvəskarlarının və həvəskar arxeoloqların kortəbii qazıntıları nəticəsində insafsızcasına dağıdılıb. Yaşlı adamların bildirdiyinə görə, bəziləri dərin quyulardan qiymətli zinət əşyaları tapmışlar.
Uzun illər indiki Masallı rayonunun mərkəzi, paytaxtı olmuş Dəştvənd-Ərkivan, 1930-cu ildə Azərbaycan Sovet Sosialist Respublikasında rayonlaşma aparılarkən mərkəz funksiyasını indiki Masallı şəhərinə vermişdir. Həmin vaxt kənddəki məşhur Qala bazarı da Masallıya köçürülmüşdür.
Mədəniyyəti
Cəsarət Nuriyev. Masallının Ərkivan kəndindən dulusçu Cəsarət Nuriyev gil və qumdan hazırlanmış onlarca məişət əşyası Ərkivan mədəniyyətinin və tarixinin, bariz nümunəsidir.
Şərafət Əzizov. Sandığçı Şərafət bəyin hazırladığı sandıqlar nəinki, Masallıda, Azərbaycanda, o cümlədən də bütün dünyada sərgilənir və saxlanılır.
Niyaməddin Salami. Niyaməddin Salami 1976-ci il fevral ayının 15-də Masallı rayonu Ərkivan kəndində anadan olmuşdur. Azərbaycan Dövlət Mədəniyyət və İncəsənət Universitetinin Rəssamlıq fakültəsində oxumuşdur. Salami təxəllüsünü öz atasının adından götürmüşdür. Bir çox peşə sahibidir. Müğənni sənətinə uşaqlıqdan həvəsi olmuşdur. Sənətə ilk gəlişində Elşən Allahverdiyev, Zaur Zeynal kimi bəstəkarlarla çalışmışdır. 2005-ci ildən peşəkar sənətə ilk addımlarını atmışdır. Hal-hazırda çalışdığı ve eyni zamanda ona dəstək olan bəstəkarlar Rəhim Rəhimli və Nailə Mirməmmədlidir. Müğənninin repertuarında Türk mahnılarının xüsusilə yer aldığına görə qardaş ölkə Türkiyə ilə bir çox proyektlərə imza atılıb. Yaxın zamanlarda Niyam Salaminin yeni albomu işıq üzü görəcəkdir.
Lalə Məmmədova. Lalə Məmmədova,1978-ci ildə Bakı şəhərində ziyalı ailəsində anadan olmuşdur. Atası, tanınmış alim olan Nadir Məmmədov Masallı rayonunun Ərkivan kəndindəndir. Ailədə onu digər 4 uşaqdan fərqləndirən cəhət erkən yaşlarından oxumağa göstərdiyi meyl idi. İlk konserti də elə həyətdə məhəllə uşaqlarının qarşısında baş tutur. Bu, onu qarşıda gözləyən böyük yolun başlanğıcı idi. 1985-ci ildə 272 saylı məktəbin birinci sinfinə qədəm qoyub. 8 yaşında isə taleyinə Bülbül adına musiqi məktəbi yazılır. Xalq artisti Şövkət Ələkbərova yumşaq səsli bu balaca qızda həssas ürəyin olduğunu duyaraq onu öz sinfində görmək istəyir.
Əhalisi
1859-1864-cü ilə olan məlumata əsasən Bakı quberniyasının Lənkəran qəzasının Ərkivan kəndində 155 evdə 572 nəfəri kişilər, 478 nəfəri isə qadınlar olmaqla 1.050 nəfər şiə təriqətli müsəlman Azərbaycan tatarı yaşayırdı.
1886-cı ildə ailələr üzrə aparılmış siyahıyaalmaya əsasən Bakı quberniyası, Lənkəran qəzası, Ərkivan şöbəsi, Ərkivan kənd cəmiyyəti tərkibinə daxil olan Ərkivan kəndində 183 evdə şiə etiqadlı müsəlman tatarlardan (azərbaycanlılardan) ibarət 1.507 nəfər (940 nəfəri kişilər, 567 nəfəri qadınlar) əhali yaşayırdı.
Kəndin ərazisi 2.294 hektardan artıq olmaqla 13 məhəlləni, 3.765 ev təsərrüfatını əhatə edir. Əhalisinin sayı 19.000 nəfərdən artıq, torpağı məhsuldar və bərəkətlidir. Ərazidə 4 orta, 1 əsas məktəb, mədəniyyət evi, 4 kitabxana, sağlamlıq mərkəzi, 2 feldşer-mama məntəqəsi, poçt, uşaq bağçası, yanacaq və qaz doldurma məntəqələri, qaz paylayıcı stansiya, 4 kərpic, 5 çörəkbişirmə, 2 makaron, 1 şəkər, 1 mineral su qablaşdırma sexi, 2 un dəyirmanı, Seyid Sadıq ziyarətgahı, 9 məscid, 3 stadion, idman meydançaları, istirahət mərkəzləri, bir sözlə, qəsəbə statusunun verilməsi üçün bütün infrastruktur vardır. Kəndin əmək qabiliyyətli əhalisi kənd təsərrüfatının bütün sahələrində, habelə sənaye, ticarət, istehsal xidmətləri sahəsində, dövlət qurumlarında və təhsil ocaqlarında çalışırlar.
Din
Qəsəbədə "Göllü" məscidi, "Zeynoba" məscidi, "Şeyx Səfi" məscidi, "Qızlaküçə" məscidi və "Ramazanlı" məscidi dini icmaları fəaliyyət göstərir.
Qəsəbəmizdə ilklər
Ərkivan qəsəbəsində ilk məktəb 1920-ci ildə açılmışdır.
Kənddə ilk Ali təhsilli şəxs Əkbərxan Mirqasım oğlu Talışinski olmuşdur.
Kəndin ilk qadın müəllimi Qayda müəllimə olmuşdur.
Hal-hazırda kəndin AMEA-da (Azərbaycan Milli Elmlər Akademiyası) 11 elmlər doktoru, 28 elmlər namizədi var.
Kəndin 19 nəfər ali ruhani təhsilli Nəcəfül-Əşrəf alimləri olmuşdur.
Qəsəbənin Şəhidləri
Böyük Vətən Müharibəsində Ərkivan qəsəbəsindən 300 nəfər iştirak etmişdir. Qarabağ uğrunda gedən döyüşlərdə Ərkivan qəsəbəsi 17 şəhid vermişdir. Qəsəbənin müxtəlif məhəllələrində şəhidlərin adı küçə, bulaq və məktəblərə verilmişdir. Şəhidlərin adını əbədiləşdirmək üçün 9 may 2007-ci il tarixində qəsəbədə şəhidlərin adına "Şəhidlər Parkı" salınmışdır.
1. Ağayev Ələddin Bahaddin oğlu.
2. Bağırov Əlvan Ramazan oğlu.
3. Bədəlov Qalib Kitabəli oğlu.
4. Bədəlov Vüsal Həmdulla oğlu.
5. Binyatov Mahir Yadulla oğlu.
6. Cəfərov Əfruz Mahmud oğlu.
7. Əhmədov Yavər Məmmədağa oğlu.
8. Əliyev Mircəlil Seyidağa oğlu.
9. Gözəlov Güləsgər Qafur oğlu.
10. İbrahimov Şirvan Oruc oğlu.
11. Qənbərov Səyyad Yavər oğlu.
12. Mirzəyev Əhməd Qədir oğlu.
13. Nəcəfov Rafiq Zabil oğlu.
14. Nəcəfov Zahir Zülfi oğlu.
15. Səfərov Elnur Şahbaz oğlu.
16. Talıbov Şaiq Tahir oğlu.
17. Teymurov Yavər Nəbi oğlu.
18. Novruzov Anar Gülverdi oğlu.
Memarlıq abidələri
- Ərkivan qalası – IX-X əsrlər
- Şahsəfi bulağı – XIII əsr
- Mehti bulağı – XIX əsr
- Göllü məscidi – XIX əsr (Göllü məhəlləsi)
- Məscidlər və bir neçə tikililər – XX əsr
- Mir Seyid Sadıq Ağa məqbərəsi – XXI əsr
- Şəhidlər bulağı - XXI əsr
İqlimi
Ərkivanda iqlim şəraiti Subtropik iqlim qurşağına aiddir. Bu ərazidə yay vaxtı havanın temperaturu bəzən 40 dərəcəyə qədər qalxa, bəzən isə 20 dərəcəyə düşə bilir, qış vaxtı isə bəzən -10 dərəcəyə qədər düşə, bəzən isə, müsbət 20-25 dərəcəyə qədər qalxa bilər.
Görkəmli şəxsləri
- Axundov Çingiz Qəni oğlu. Bakı Dövlət Universiteti, Fizika problemləri elmi tədqiqat inistitutu, fizika riyaziyyat elmləri namizədi dosent fizik. (Ramazanlı məhəlləsi), (Axnoba)
- Abdurrəhman Səmədov Qubad oğlu – Baytarlıq üzrə fəlsəfə doktoru, "Ərkivan salnaməsi ” kitabının müəllifi. Vəfat edib. (Qızılaküçə məhəlləsi)
- Bağır Bağırov – Geologiya-minerologiya elmləri doktoru, professor, Azərbaycan Milli Elmlər Akademiyasının müxbir üzvü. (Bədirli məhəlləsi)
- Bədrəddin Həsənov Hacı İbrahim oğlu – Neft-Qaz sənayesi üzrə elmləri doktoru, uzun müddət ərəb ölkələrində – Misirdə, İraqda, Səudiyyə Ərəbistanında və digər ölkələrində mütəxəssisi kimi çalışmış və AMEA-nın şöbə müdiri işləmişdir. Vəfat edib.
- Cavanşir Yusifli – Tənqidçi, ədəbiyyatşünas və tərcüməçi. (Həsənəkücə məhəlləsi)
- Cəbrayıl Cəbrayılov – Ağır atletika üzrə SSRİ çempionu. Beynəlxalq dərəcəli hakim. Azərbaycan Tibb Universitetinin müəllimi. (İsoba məhəlləsi)
- Elçin Bağırov Bağır oğlu – Fizika-riyaziyyat üzrə fəlsəfə doktoru. ABŞ-da yaşayır. (Bədirli məhəlləsi)
- Əbdülhüseyn Mənsimov Abı oğlu – Tarix üzrə fəlsəfə doktoru, APU-da müəllim. (Əlihəsənli məhəlləsi)
- Ədalət Cəbiyev Nurəddin oğlu – Texnika elmləri doktoru. Sankt-Peterburqda hərbi sənaye sahəsində aparıcı mütəxəssis. (Cəbili məhəlləsi)
- Əliməmməd Nuriyev – Azərbaycan Respublikası Milli Məclisinin II çağırış deputatı, “Konstitusiya” Araşdırmalar Fondunun prezidenti. (Bağlakücə məhəlləsi)
- Əsədulla Cəfərov Qüdrət oğlu – Tarix elmləri doktoru, professor, AMEA-nın Arxeologiya və Etnoqrafiya institutunda şöbə müdiri, beynəlxalq İNTAS-2000 proqramının qrant lauretı. (Bağlaküçə məhəlləsi)
- Əvəz Cəbiyev Abdulhəsən oğlu – Tibb elmləri doktoru, Azərbaycan Tibb Universititinin professoru. Masallı Rayon Mərkəzi Xəstəxanası onun adını daşıyır. Vəfat edib. (Cəbili məhəlləsi)
- Fərqanə Səmədova Vasif qızı – Siyasi elmlər üzrə fəlsəfə doktoru. ABŞ-da yaşayır. (Qızılaküçə məhəlləsi)
- Firudin Şiriyev Ağaxan oğlu – Biologiya üzrə fəlsəfə doktoru. (Pələnküçtə məhəlləsi)
- Gülağa Qəmbərov – Gülağa Tənha adı ilə tanınan Azərbaycanlı şair və iş adamı. (Miyondi məhəlləsi)
- Gülağa Salayev Azadxan oğlu – Hüquq üzrə fəlsəfə doktoru. Hazırda Belorusiya Respublikasında Arbitraj Məhkəməsinin hakimidir. (Həsənəküçə məhəlləsi)
- Həsənağa Qənbərov Məmi oğlu – Tibb üzrə fəlsəfə doktoru. Bakı xəstəxanalarında həkim işləyir. (Miyondi məhəlləsi)
- Qorxmaz Mikayılov Eyvaz oğlu – Fizika-riyaziyyat üzrə fəlsəfə doktoru, ABŞ-da işləyir. (Bağlaküçə məhəlləsi)
- Qoşqar Şiriyev Ağaxan oğlu – İqtisadiyyat və tibb üzrə fəlsəfə doktoru. (Pələnküçtə məhəlləsi)
- Qubad Cəbrayılov - Azərbaycan Dövlət Bədən Tərbiyəsi və İdman Akademiyasının Dosenti. Əməkdar müəllim. (İsoba məhəlləsi )
- Maarif Teymur – Ədəbiyyatşünas, publisist, mətnşünas, Azərbaycan Yazıçılar Birliyinin üzvü, Azərbaycan Teatr Xadimləri Birliyinin üzvü, Azərbaycan Jurnalistlər Birliyinin üzvü.
- Məhərrəməli Niftullayev Zülfüqar oğlu – Tibb elmləri doktoru. Azərbaycan Tibb Universitetində dərs deyir. (Bədirli məhəlləsi)
- Müctəba Mirzəyev Mütəllim oğlu – İqtisadiyyat üzrə fəlsəfə doktoru. Vəfat edib. (Bədirli məhəlləsi)
- Nadir Ağayev – Güləşçi, SSRİ çempionu SSRİ idman ustası, əməkdar məşqçi. (Bağlakücə məhəlləsi)
- Nadir Məmmədov – 1982-ci ildən BDU-da çalışır. Xarici ölkələrin iqtisadi–siyasi coğrafiyası və turizm kafedrasının professoru.
- Rahib Kazımov Nadir oğlu – İqtisadiyyat üzrə fəlsəfə doktoru. İqtisadiyyat Universitetində müəllim işləyir. (Həsənəküçə məhəlləsi)
- Rahib Mikayılov Eyvaz oğlu – Texnika üzrə fəlsəfə doktoru. ABŞ-da işləyir. (Bağlaküçə məhəlləsi)
- Raif Rüstəmov Məmməd oğlu – Riyaziyyat üzrə fəlsəfə doktoru. ABŞ-da yaşayır və işləyir.(Bədirli məhəlləsi)
- Rəsmiyyə Sabir – İqtisad üzrə fəlsəfə doktoru, dosent, Azərbaycan, Rus, Türk, İngilis dillərində nəşr olunan 100 elmi əsərin müəllifi. (Miyondi məhəlləsi)
- Sabir Mirzəyev – Fizika-riyaziyyat elmləri doktoru, professor. (Bədirli məhəlləsi)
- Samirə Bağırova – Fizika-riyaziyyat elmləri üzrə fəlsəfə doktoru. ABŞ-da işləyir. (Bədirli məhəlləsi)
- Şeyx Məhəmməd Fazil Lənkərani (ata, Ərkivan kəndi) – İslam dünyasının və Şiə məzhəbinin böyük alimi, İranda din xadimi, ayətullah, müctəhid və mərcəyi-təqlid. (atası - Göllü məhəlləsi)
- Tağı Cəbiyev – Fizika-riyaziyyat elmləri üzrə fəlsəfə doktoru. (Cəbili məhəlləsi)
- Vaqif Yusifli – Filologiya elmləri doktoru, Azərbaycan Yazıçılar Birliyinin üzvü, Əməkdar incəsənət işçisi, "Azərbaycan" jurnalının baş redaktor müavini.
- Vidadi Mirzəyev Soltanağa oğlu – Fizika-riyaziyyat üzrə fəlsəfə doktoru. AMEA-nın Kibernetika-riyaziyyat institutunda işləyir. (Bədirli məhəlləsi)
- Yavər Mirzəyev Mütəllim oğlu – İqtisadiyyat üzrə fəlsəfə doktoru. Vəfat edib. (Bədirli məhəlləsi)
- Yusif Cəbiyev Abdulla oğlu – fizika-riyaziyyat üzrə fəlsəfə doktoru. Azərbaycan Dövlət Neft və Sənaye Universitetinin müəllimi. (Cəbili məhəlləsi)
- Zakir Mirzəyev – Fizika-riyaziyyat üzrə fəlsəfə doktoru. (Bədirli məhəlləsi)
- Zülfüqar Cəbiyev Abdulhəsən oğlu – Tibb elmləri üzrə fəlsəfə doktoru. Vəfat edib. (Cəbili məhəlləsi)
- Eminağa Məmmədov — AMEA Riyaziyyat və Mexanika İnstitutu, riyaziyyat üzrə fəlsəfə doktoru Riyaziyyatçı (Həsnəküçə məhəlləsi)
- Babayev Taleh Əkbər oglu—Karate üzre dünya ve avropa çempionu , prezident mükafatçısı (Bağlakücə məhəlləsi)
- Mirnuh İsmayılov Cavad oğlu – Coğrafiya üzrə fəlsəfə doktoru. (Ramazanlı məhəlləsi)
- Rasim Cabbarov Baba oğlu – Fizika-riyaziyyat elmləri doktoru, AMEA-nın Fizika institutunda çalışır.Paris şəhərində uzunmüddətli elmi ezamiyyətdə olub. (Ramazanlı məhəlləsi)
- Ələddin Məlikov — Fəlsəfə üzrə elmlər doktoru. AMEA Fəlsəfə və Sosiologiya İnstitutu. (Ramazanlı məhəlləsi)
- Yaqub Məmmədov – Güləşçi, SSRİ çempionu.
- Seyid Sadıq Ərkivani – Azərbaycanın tanınmış seyidlərindən biri, el ağsaqqalı.
- Fateh Fətullayev — Azərbaycan teatr və kino aktyoru, Azərbaycan SSRİ əməkdar artisti.
- Əli Əliyev – Güləş üzrə Avropa çempionu, idman ustası.
- Niyaməddin Salami – müğənni
- Rəşad Əzizov Məhərrəm oğlu – geologiya-mİneralogiya üzrə fəlsəfə doktoru.
Fotoqalereya
İstinadlar
Bu məqalədəki istinadlar müvafiq istinad şablonları ilə göstərilməlidir. |
- Azərbaycan Respublikasının Dövlət Statistika Komitəsi: 2017-cı ilin əvvəlinə şəhər və rayonlar, eləcə də şəhər yaşayış məntəqələri üzrə əhalinin cins bölgüsündə sayı (min nəfər)
- Azərpoçt. "İndekslər" (azərb.). www.azerpost.az. 2016-04-19 tarixində arxivləşdirilib. İstifadə tarixi: 2016-04-19.
- "Masallı rayonunun inzibati ərazi bölgüsündə qismən dəyişikliklər edilməsi haqqında Azərbaycan Respublikasının 5 mart 2013-cü il tarixli Qanunu" (azərb.). president.az. 15 mart 2013, 21:40. İstifadə tarixi: 2014-05-06.
- ASE, IV cild, Bakı, 1982
- "Kənd həyatı" jurnalı. 17-ci sayı, 1977
- Ağamusa Axundov. "Torpağın köksündə tarixin işləri" Bakı, 1983.
- "Gülüstani-İrəm" əsərindən.
- F. Əsədov, "Dar gündə yaxşı arxa" kitabından.
- Zahir Əmənov, "Ərkivan" kitabı.
- Списки населенных мест Российской Империи. По Кавказскому краю составленные и издаваемые Кавказским статистическим комитетом при Главном управлении Наместника Кавказского. LXV. Бакинская губерния. Списокь населенных мест по сведениямь 1859 по 1864 годь. Кавказскимь стататистическимь комитетомь при Главном управлении наместника кавказского. Составлен главным редактором Комитета Н. Зейдлицем. Тифлись. В Типографии главного управления наместника кавказского. 26 ноября 1870 г./Содержание: Спискок населённых мест Бакинской губернии. стр. 37[ölü keçid]
- MÜSƏLMAN DİNİ İCMALAR - 2011-ci ildə qeydiyyatdan keçənlər. scwra.gov.az (azərb.)
- MÜSƏLMAN DİNİ İCMALAR - 2016-cı ildə qeydiyyatdan keçənlər. scwra.gov.az (azərb.)
- MÜSƏLMAN DİNİ İCMALAR - 2017-ci ildə qeydiyyatdan keçənlər. scwra.gov.az (azərb.)
- MÜSƏLMAN DİNİ İCMALAR - 2018-ci ildə qeydiyyatdan keçənlər. scwra.gov.az (azərb.)
Xarici keçidlər
- 13 məhəlləsi, 14 min nəfər əhalisi olan min illərin Ərkivanı