Azər Əmiraslanov
Azər Kamal oğlu Əmiraslanov (19 iyul 1971, Bakı) – Azərbaycan Respublikası Nazirlər Kabineti Aparatının İqtisadiyyat şöbəsinin müdiri.
| Azər Əmiraslanov | |
|---|---|
| Doğum tarixi | |
| Doğum yeri | Bakı, Azərbaycan SSR |
| Vətəndaşlığı | |
| Təhsili | Azərbaycan Dövlət İqtisad İnstitutu |
| Fəaliyyəti | iqtisadçı, siyasətçi |
| Vikianbarda əlaqəli mediafayllar | |
Həyatı
Azər Əmiraslanov 19 iyul 1971-ci ildə Bakı şəhərində anadan olmuşdur. 1978–1988-ci illərdə Bakı şəhəri 158 saylı tam orta məktəbdə təhsil almışdır. 1988-ci ildə Azərbaycan Dövlət İqtisad İnstitutuna qəbul olmuş, 1993-cü ildə institutu fərqlənmə diplomu ilə bitirərək Azərbaycan Milli Elmlər Akademiyasının İqtisadiyyat İnstitutunun aspiranturasına qəbul edilmişdir.
Əmək fəaliyyəti
1993–1994-cü illərdə Azərbaycan Respublikası Mərkəzi Bankında və Səhmdar-Kommersiya Aqrar-Sənaye Bankında aparıcı iqtisadçı, 1994–1998-ci illərdə Milli Məclis Aparatının İqtisadi qanunvericilik şöbəsində böyük məsləhətçi, 1998–2000-ci illərdə Azərbaycan Respublikası Prezidentinin İcra Aparatının İqtisadi siyasət şöbəsində məsləhətçi vəzifəsində çalışmışdır.
2001–2003-cü illərdə İqtisadi Təhlil və Konsaltinq Mərkəzinin direktoru, 2003–2004-cü illərdə Almaniya Texniki Əməkdaşlıq Agentliyində (GTZ) makroiqtisadi məsələlər üzrə baş iqtisadçı, 2004–2005-ci illərdə "Ata Holdinq" Şirkətlər Qrupunda İdarə heyətinin üzvü, Strategiya və Biznesin İnkişafı Departamentinin direktoru vəzifələrində çalışmışdır.
2005–2008-ci illərdə Azərbaycan Respublikası Milli Məclisinin deputatı olmuşdur.
Azərbaycan Respublikası Prezidentinin 2007-ci il 16 may tarixli Sərəncamı ilə Azərbaycan Respublikası Dövlət Neft Fondunun Müşahidə Şurasının üzvü təyin edilmiş və 2007–2008-ci illərdə Şuranın üzvü kimi fəaliyyət göstərmişdir.
Azərbaycan Respublikası Prezidentinin 2008-ci il 25 avqust tarixli Sərəncamı ilə Prezident Administrasiyasının Aqrar siyasət məsələləri şöbəsinin müdiri vəzifəsinə, 2017-ci il 31 may tarixli Sərəncamı ilə Azərbaycan Respublikası Prezidentinin aqrar siyasət məsələləri üzrə köməkçisi — şöbə müdiri vəzifəsinə təyin edilmiş, 29 noyabr 2019-cu il tarixədək bu vəzifədə çalışmışdır.
Azərbaycan Respublikasının Baş Nazirinin 2019-cu il 4 dekabr tarixli Sərəncamı ilə Azərbaycan Respublikası Nazirlər Kabineti Aparatının İqtisadiyyat şöbəsinin müdiri vəzifəsinə təyin edilmişdir.
1-ci dərəcə dövlət müşaviridir.
Parlament fəaliyyəti
2005-ci ildə 98 saylı Şəmkir şəhər seçki dairəsindən Üçüncü Çağırış Azərbaycan Respublikası Milli Məclisinin deputatı seçilmiş, parlamentin İqtisadi siyasət daimi komissiyasının sədr müavini olmuşdur.
Azərbaycan–Danimarka parlamentlərarası əlaqələr üzrə işçi qrupunun rəhbəri, Azərbaycan–Amerika Birləşmiş Ştatları, Azərbaycan–Böyük Britaniya, Azərbaycan–Səudiyyə Ərəbistanı, Azərbaycan–Küveyt parlamentlərarası əlaqələr üzrə işçi qruplarının, Avropa İttifaqı − Azərbaycan parlament əməkdaşlığı komitəsinin və MDB-nin Parlamentlərarası Assambleyasında Azərbaycan nümayəndə heyətinin üzvü olmuşdur.
2008-ci ildə Prezident Administrasiyasının şöbə müdiri vəzifəsinə təyin edilməsi ilə əlaqədar olaraq, Mərkəzi Seçki Komissiyasının qərarı ilə deputat səlahiyyətlərinə xitam verilmişdir.
Elmi-pedaqoji fəaliyyəti
AMEA-nın İqtisadiyyat İnstitutunun aspiranturasını bitirərək 1996-cı ildə "Bazar münasibətləri şəraitində iqtisadiyyatın dövlət tənzimlənməsi problemləri" mövzusunda namizədlik dissertasiyasını uğurla müdafiə etmiş və "iqtisad elmləri namizədi" alimlik dərəcəsi almışdır.
6 kitabın və 50-dən artıq elmi məqalənin müəllifidir. Yerli və xarici mətbuatda 300-dən artıq analitik iqtisadi məqaləsi dərc edilmişdir. İqtisadiyyat və aqrar sahə ilə bağlı bir sıra proqram və konsepsiyaların, qanun layihələrinin hazırlanmasında yaxından iştirak etmişdir.
2001–2002-ci illərdə Qərb Universitetində və Azərbaycan Dillər Universitetində "Dünya iqtisadiyyatı" fənnini ingilis dilində tədris etmişdir. 2008–2017-ci illərdə Azərbaycan Dövlət İqtisad Universitetinin müəllimi olmuşdur.
2019-cu ildən Azərbaycan Respublikasının Prezidenti yanında Dövlət İdarəçilik Akademiyasında İqtisadiyyatın dövlət tənzimlənməsi kafedrasının müdiridir.
Xarici təcrübəsi
2000-ci ildə IREX proqramı xətti ilə Vaşinqtonda ABŞ-ın Kiçik Biznes üzrə Administrasiyasında "Dövlət, iqtisadiyyat və biznes" mövzusunda tədqiqat aparmış və ABŞ iqtisadiyyatının idarə edilməsi təcrübəsini öyrənmişdir.
ABŞ, Meksika, Yaponiya, Almaniya, Avstriya, Fransa, Böyük Britaniya, İtaliya, İspaniya, Belçika, Rumıniya, Çexiya, Slovakiya, Türkiyə, Rusiya, Ukrayna, Gürcüstan, Macarıstan, Makedoniya, Moldova, Estoniya, İsveç, Serbiya, Bolqarıstan kimi ölkələrdə təşkil edilmiş seminar və konfransların, işgüzar görüşlərin iştirakçısı olmuş, təqdimat və məruzələrlə çıxış etmişdir.
Beynəlxalq Valyuta Fondu (IMF), Bilkənt Universiteti (Türkiyə), İctimai-Özəl Əməkdaşlıq İnstitutu (ABŞ), Beynəlxalq İnkişaf Agentliyi (USAID), IREX, Yaponiya Beynəlxalq Əməkdaşlıq Agentliyi (JICA), Telekommunikasiya İnstitutu (USTTI) kimi qurumların sertifikatlarına malikdir.
İctimai fəaliyyəti
1993-cü ildə Gənc İqtisadçılar Birliyini təsis etmiş və onun fəaliyyətinə rəhbərlik etmişdir. 2007-ci ildən İqtisadi İslahatlar Fondunun təsisçisi və prezidentidir.
Ailəsi
Ailəlidir, iki övladı var.
İstinadlar
- ↑ "i.e.n., dos. Əmiraslanov Azər Kamal oğlu". unec.edu.az. İstifadə tarixi: 22 yanvar 2021.
- "A.K.Əmiraslanovun Azərbaycan Respublikası Prezidentinin aqrar siyasət məsələləri üzrə köməkçisi - şöbə müdiri təyin edilməsi haqqında Azərbaycan Respublikası Prezidentinin Sərəncamı". e-qanun.az. 31 may 2017. İstifadə tarixi: 22 yanvar 2021.
- ↑ "Azər Əmiraslanov Prezidentin İcra Aparatının aqrar-siyasət məsələləri şöbəsinin müdiri təyin edilib". apa.az. 25 avqust 2008. İstifadə tarixi: 22 yanvar 2021.
Xarici keçidlər
- Azer Amiraslanov's biography