AS532 helikopterinin qəzası (2021)

AS532 vertolyotunun qəzası — Türkiyə Hərbi Hava Qüvvələrinə məxsus "Eurocopter AS532 Cougar" vertolyotunun 4 mart 2021-ci il tarixində, Türkiyənin Bitlis vilayətində yerləşən Tatvan qəsəbəsinin yaxınlıqlarında qəzaya uğraması ilə baş verən aviasiya hadisəsi. Qəza nəticəsində vertolyotdakı 11 Türkiyə hərbçisi həlak olmuş, ikisi isə yaralanmışdır. Qəza zamanı ilk öncə yaralanan dörd hərbi qulluqçu xəstəxanaya yerləşdirilmiş, onlardan 8-ci Korpus komandiri general-leytenant Osman Erbaş da daxil olmaqla ikisi aldığı yaralardan vəfat etmişdir.

AS532 helikopterinin qəzası
"AS532 Cougar" – qəzaya uğrayan helikopterə oxşar eyni modeldir.
Ümumi məlumatlar
Tarix	4 mart 2021 (2021-03-04)
Qəza səbəbi	bilinmir; istintaq davam edir
Yer	Tatvan, Bitlis, Türkiyə
Sərnişin sayı	13
Yaralı sayı	2
Ölü sayı	11
Aviasiya
Havayolu şirkəti	Türkiyə Hərbi Hava Qüvvələri
Qalxma yeri	Bingöl, Türkiyə
İstiqamət	Tatvan, Bitlis, Türkiyə

Qəza

Türkiyə Hərbi Hava Qüvvələrinə məxsus "Eurocopter AS532 Cougar" vertolyotu Qrinviç saatı ilə 10:55-də Türkiyənin şərqində yerləşən Bingöldən havaya qalxmışdır. Helikopter türk ordusunun ABŞ və Avropa İttifaqı tərəfindən terror təşkilatı olaraq təyin edilmiş Kürdüstan Fəhlə Partiyasının (PKK) silahlılarına qarşı mübarizə apardığı regiona, Türkiyənin əsasən kürdlərin yaşadığı Bitlis vilayətindəki Tatvan qəsəbəsinə gedirdi. Qrinviç saatı ilə 11:25 radələrində vertolyot ilə əlaqə kəsilmişdir. Türkiyə Milli Müdafiə Nazirliyi (MMN) vertolyotun Tatvan qəsəbəsi yaxınlığındakı kənd ərazisinə düşdüyünü açıqlamışdır. Qəza qarla örtülmüş və dumanlı dağlıq bölgədə baş vermişdir.

Qəza nəticəsində 8 türk hərbçisi yerindəcə həlak olmuş, digər 5 hərbçi isə yaralanmışdır. Yaralanan hərbçilər dərhal xəstəxanaya yerləşdirilmiş, onlardan 8-ci Korpus komandiri general-leytenant Osman Erbaş da daxil olmaqla ikisi aldığı yaralardan vəfat etmişdir.

Nəticə

Qəza barədə məlumatı Türkiyə MMN açıqlamışdır. Nazirlik yaralanan personalın xəstəxanaya köçürülməsi üçün səylərin davam etdiyini bildirmiş, hadisə ilə bağlı dərhal istintaq başladıldığını əlavə etmişdir. Türk hərbi rəhbərliyi dərhal axtarış və xilasetmə əməliyyatına başlamış, əraziyə bir PUA, bir "CASA/IPTN CN-235" nəqliyyat təyyarəsi və bir helikopterdən ibarət dəstə göndərmişdir.

Reaksiyalar

Ölkədaxili

Türkiyə MMN hadisədə həlak olanlara Allahdan rəhmət diləmiş, zərərçəkənlərin ailələrinə və dostlarına, o cümlədən Türkiyə xalqına başsağlığı vermiş, hadisəni "çox üzücü bir qəza" adlandırmışdır. Türkiyə Xarici İşlər Naziri Mövlud Çavuşoğlu, Türkiyə Prezidentinin Kommunikasiya Direktoru Fəxrəddin Altun və Fəxrəddin Qoca qəza ilə əlaqədar başsağlığı dilə gətirmişdir.

Xarici

ABŞ-ın Ankaradakı səfirliyi yayımladığı bəyanatda qəzada həlak olan və yaralanan türk əsgərlərinə başsağlığı vermiş, yaralıların sürətli bir şəkildə sağalmasını arzu etmişdir. Azərbaycan Xarici İşlər Naziri Ceyhun Bayramov həlak olanların ailələrinə və yaxınlarına, eləcə də Türkiyə millətinə başsağlığı vermiş, hadisəyə görə kədərləndiyini dilə gətirmişdir.

İstinadlar

1. Khalid, Tuqa (4 mart 2021). "Nine killed in army helicopter crash in eastern Turkey". Al Arabiya. İstifadə tarixi: 4 mart 2021.
2. "9 killed, 4 injured as military helicopter crashes in Turkey". Daily Sabah. 4 mart 2021. İstifadə tarixi: 4 mart 2021.
3. "Military helicopter crash in southeast Turkey kills nine: defence ministry". Reuters. 4 mart 2021. İstifadə tarixi: 4 mart 2021.
4. "9 killed in army helicopter crash in eastern Turkey". Associated Press. 4 mart 2021. İstifadə tarixi: 4 mart 2021 – U.S. News & World Report vasitəsilə.
5. "Nine Turkish Soldiers Killed In Helicopter Crash". Agence France Presse. 4 mart 2021. İstifadə tarixi: 4 mart 2021 – Barron's vasitəsilə.
6. "Nine Turkish soldiers killed in military helicopter crash: Defence ministry". Agence France-Presse. 4 mart 2021. İstifadə tarixi: 4 mart 2021 – Arab News vasitəsilə.
7. "Turkish corps commander among victims of helicopter crash". Daily Sabah. 4 mart 2021. İstifadə tarixi: 4 mart 2021.
8. Zorlu, Faruk (4 mart 2021). "Military helicopter crashes in eastern Turkey, 10 martyred". Anadolu Agentliyi. İstifadə tarixi: 4 mart 2021.
9. Zorlu, Faruk (4 mart 2021). "Military helicopter crashes in eastern Turkey, 9 martyred". Anadolu Agentliyi. İstifadə tarixi: 4 mart 2021.
10. "Ceyhun Bayramov Türkiyədə baş vermiş helikopter qəzası ilə bağlı başsağlığı ünvanlayıb". Azəri Press Agentliyi (azərb.). 4 mart 2021. İstifadə tarixi: 4 mart 2021.