Qafar Əsgərzadə
Qafar Əsgərzadə (tam adı: Qafar Ələsgər oğlu Əsgərzadə d. 31 mart 1963, Azərbaycan, Bakı) — Tanınmış jurnalist, ssenarist, publisist, tərcüməçi, bədii qiraətçi, ictimai xadim, Azərbaycan Jurnalistlər Birliyinin üzvü, əməkdar jurnalist, Rəyasət heyətinin məsul katibi, 2003-cü ildən isə Azərbaycan Qızıl Aypara Cəmiyyətinin vitse-prezidenti, pedaqogika üzrə fəlsəfə doktoru.
Qafar Əsgərzadə | |
---|---|
Qafar Ələsgər oğlu Əsgərzadə | |
Doğum tarixi | |
Doğum yeri | Bakı şəhəri, dağlı məhəlləsi |
Vətəndaşlığı | SSRİ→ Azərbaycan |
Həyat yoldaşı | Əsgərzadə Günay Elman qızı |
Uşaqları | Azadə Əsgərzadə, Ləman Əsgərzadə |
Atası | Əsgərzadə Ələsgər Qafar oğlu |
Anası | Nəzərli Nəcimə Əbdülcavad qızı |
Milliyyəti | azərbaycanlı |
Təhsili | Ç. İldırım adına Azərbaycan Politexnik İnstitutu, 1981-1986 ci il. |
Fəaliyyəti | Tanınmış jurnalist, ssenarist, publisist, tərcüməçi, bədii qiraətçi, ictimai xadim |
Mükafatları | "Azərbaycan Respublikasının əməkdar jurnalisti" |
Həyatı
Qafar Əsgərzadə 1963-cü il mart ayının 31-də Bakı şəhərində məşhur Dağlı məhəlləsində anadan olmuşdu. 1980-ci ildə Yasamal rayonundakı 158 №-li orta məktəbi, 1981-ci ildə Bakı şəhəri 60 №-li texniki məktəbi fərqlənmə diplomu ilə bitirmişdir. 1981-ci ildə Azərbaycan Respublikası Elmlər Akademiyasının Fizika İnstitutunda(indiki Azərbaycan texniki universiteti) Baş texnik vəzifəsində çalışıb. 1981-ci ildə Ç. İldırım adına Azərbaycan Politexnik İnstitutuna daxil olub. 1986-cı ildə Radiotexnika fakultəsini, İnstitutun İctimai fənlər fakultəsinin 5 illik jurnalistika kursunu bitirib. İnstitutda təhsil zamanı Radiotexnika tələbə həmkarlar ittifaqı komitəsinin sədri, İnstitut həmkarlar İttifaqı Komitəsinin sədr müavini vəzifəsində çalışıb.
Ailəsi
2000-ci ildə Günay xanımla ailə qurmuş, bu birgə nigahdan onların 2 qız övladı dünyaya gəlmişdir.
- Azadə Əsgərzadə
- Ləman Əsgərzadə
Fəaliyyəti
Azərbaycan Jurnalistlər Birliyinin üzvü kimi 1981-ci ildən müntəzəm olaraq “Bakı”, “Azərbaycan müəllimi”, “Bakinski raboçi”, “Vışka”, “Azərbaycan məktəbi”, “Mədəniyyət və incəsənət” və başqa mətbuat vasitələrində ədəbiyyat və incəsənətimiz haqqında məqalələrlə çıxış etmişdir. 1986-cı ildə televiziya verilişləri hazırlamağa başlamışdır. 1986-1992-ci illərdə Azərbaycan Respublikası Rabitə Nazirliyinin «Azərrabitəlayihə» layihə-axtarış kontorunda mühəndis vəzifəsində çalışıb, gənclər təşkilatına rəhbərlik etmişdir. 1992-ci ildən bu günə qədər Azərbaycan Qızıl Aypara Cəmiyyətində çalışır. Ayrı-ayrı illərdə baş mütəxəssis; informasiya və mətbuat şöbəsinin müdiri; mətbuat katibi; mətbuat mərkəzinin rəisi; Beynəlxalq əlaqələr, mətbuat, informasiya, yayım, ictimaiyyətlə əlaqələr, miqrasiya və axtarış idarəsinin rəisi; Baş Katibin müavini, Baş Katib əvəzi, Sədr müavini vəzifələrində çalışıb.
Hal-hazırda Azərbaycan Qızıl Aypara Cəmiyyətinin vitse-prezidenti, Rəyasət heyətinin məsul katibi, 2000-ci ildən Cəmiyyətin «Mərhəmət» jurnalının baş redaktorudur. 2000-ci ildən müxtəlif dövrlərdə Azərbaycan Texniki Universitetinin, Bakı Slavyan Universitetinin baş müəllimi olub. Hazırda Azərbaycan Dövlət Pedaqoji Universitetinin ümumi pedaqogika kafedrasının baş müəllimidir «Yuxarı sinif şagirdlərinin estetik mədəniyyətinin yüksəldilməsinə televiziya verilişlərinin təsiri» mövzusuna dair elmi iş müdafiə edərək pedaqogika üzrə fəlsəfə doktoru elmi adına layiq görülüb. Azərbaycan Jurnalistlər Birliyinin üzvüdür. Mütəmadi olaraq dövri mətbuatda onun müəllifliyi ilə 200-ə yaxın bədii, publisistik və 10 elmi məqalə, bir neçə hekayə və esse çap olunub, eləcə də Milli Radioda neçə-neçə veriliş işıq üzü görüb. Milli Televiziyada Hüseyn Cavid, Cəfər Cabbarlı, Süleyman Rüstəm, Səməd Vurğun, Mikayıl Müşfiq, Əhməd Cavad, Məmməd Rahim, Mirmehdi Seyidzadə, Rüfət Zəbioğlu, Ələkbər Ziyatay, Hüseyn Arif, Ənvər Əlibəyli, Vladimir Qafarov, Hacıağa Nəzərli, Telman Hacıyev, Davud Aslan, Zeynəb Xanlarova, Nizami Rəmzi, Bəybala Abbasov, Eldar Eyvazov, Sabir Yusifov və s. həsr olunmuş televerilişlərin müəllifidir. 2008-ci il martın 18-də keçirilmiş Azərbaycan Respublikasında referendum üzrə «Vətəndaş Cəmiyyəti» təşviqat qrupundan vəkil edilmiş şəxs seçilib. Azərbaycan AzQAC Rəyasət Heyətinin, İdarəetmə Şurasının, Baş məclisin üzvüdür. Azərbaycan Respublikası Milli Məclisinə deputatlığa və Yasamal rayon bələdiyyəsi üzvlüyünə namizəd olub.
Kitabları
- ”Azərbaycan jurnalistikasının tarixi” (rus dilində)
- ”Ömür yollarında” (S.Yusifova həsr olunub)
- “Nəğmələrdə döyünən ürək” (S.Rüstəmə həsr olunub)
- 2 kitabın redaktoru: “Mərhəmətin ünvanı”
Redaktoru olduğu kitablar
- “Mərhəmətin ünvanı”
- ”Qızıl Aypara Dünən, Bu gün, Sabah”
Mükafatları
- «Humanizm carçısı» mükafat laureatı (Mükafatı beynəlxalq Qızıl Xaç və Qızıl Aypara Cəmiyyətləri Federasiyasının Azərbaycan Qızıl Aypara Cəmiyyəti ilə birlikdə təsis etmişdir.)
- «Cəfər Cabbarlı» mükafat laureatı (klassik şair və ədiblərimizin yaradıcılığından bəhs edən silsilə verilişlərinə görə)
- Azərbaycan Mətbuat Şurasının diplomu (2015-ci ildə Azərbaycan jurnalistikası tarixinin tədqiqindəki xidmətlərinə görə)
- «Tərəqqi» medalı (2010-cu ildə)
- «Əməkdar jurnalist» fəxri adı (2015-ci ildə)
Haqqında deyilənlər
Xalq şairi, Sosialist Əməyi Qəhrəmanı Süleyman Rüstəm: “Qafar Əsgərzadə klassik və müasir ədəbiyyatımızı dərindən bilir, onu məharətlə təbliğ edir. Qafar öz doğma dilini, millətini, vətənini sevən dəyərli ziyalıdır. Mən onun parlaq və uğurlu gələcəyinə inanıram”.
Xalq artisti, Milli Məclisin deputatı Zeynəb Xanlarova: “Qafar Əsgərzadə çox istedadlı, sənəti duyan və sevən jurnalistlərdəndir. O, daim Azərbaycan mədəniyyətini, incəsənətini, ədəbiyyatını, musiqisini özünəməxsus tərzdə təbliğ edir. Onun musiqili ədəbi verilişləri milli televiziyamızın fondunu bəzəyir. Poeziya olan yerdə musiqi var, musiqi olan yerdə poeziya və onlar bir yerdə olanda demək orda Qafar var”.
Xalq şairi, Milli Məclisin deputatı Cabir Novruz: “Onun verilişləri ədəbiyyat xadimlərinin təbliği yönümündə həmişə uğurlu alınır. Mən də məmnuniyyətlə onun verilişinin qəhrəmanı olmaq istərdim. Amma nə edək? O hələ yaşayan sənət adamları barədə veriliş hazırlamır”.
Əməkdar jurnalist Mailə Muradxanlı: “Qafar Əsgərzadə sevilən, sayılıb seçilən jurnalistlərdəndir. O, öz yüksək mədəniyyəti, tərbiyyəsi, savadı, alicənablığıynan daim diqqət çəkir. Onu digər jurnalistlərdən fərqləndirən cəhət odur ki, Qafar həm qəzet, jurnal, həm də radio və televiziya jurnalistidir. Bu heç də hər jurnalisdə nəsib olmur. Ədəbi dilə mükəmməl yiyələnməklə o, həm aparıcı, həm də mahir qiraətçi kimi özünü təsdiq etməyə müvəffəq olub. Qafar həm də etibarlı, sabitqədəm dostdur. Mənim ona daim hörmətim, rəğbətim vardır. Mən ona bir şəxsiyyət kimi böyük önəm verirəm”.
Nəbi Xəzri: “Mən əvvəl fikirləşirdim ki, Qafar ixtisas seçərkən səhv edib, gərək jurnalistikanı oxuyardı. Sonra gördüm ki, səhv etməyib. Çünki səhv edən adam belə verilişlər ərsəyə gətirə bilməz”.
Xalq rəssamı, professor Kamil Əliyev: “Qafar Əsgərzadə poeziya ilə musiqini elə bir incə şəkildə ahəngdar vəziyyətə salır ki, verilişin istənilən iştirakçısı çəkilişdən məmnunluqla ayrılır. Hələ tamaşaçıların məmnunluğunu demirəm”.
İstinadlar
- Azərbaycan Respublikasının kütləvi informasiya vasitələri əməkdaşlarına fəxri adların verilməsi haqqında Azərbaycan Respublikası Prezidentinin Sərəncamı
- Azərbaycan Qızıl Aypara Cəmiyyətinin vitse-prezidenti Qafar Əsgərzadə çıxış etdi
- AQAC-ın ADPU Bölməsinin İdarə Heyətinin illik hesabat-seçki konfransı keçirilib[ölü keçid]
Xarici keçidlər
- Qafar Əsgərzadə dünyası və ya 55 ilin zirvəsində
- Qafar Əsgərzadə–70 ilin sevinci və ya Məhərrəm Bədirzadə “geriyə baxma…”