Gülər Əhmədova
Gülər Mikayıl qızı Əhmədova (20 avqust 1965, Bakı) — Azərbaycan Respublikası Milli Məclisinin sabiq deputatı, psixologiya elmləri namizədi.
Gülər Əhmədova | |
---|---|
Gülər Mikayıl qızı Əhmədova | |
Şəxsi məlumatlar | |
Partiya | Yeni Azərbaycan Partiyası (2000-2012) Müasir Müsavat Partiyası (2020-) |
Təhsili | Azərbaycan Dövlət Pedagoji Universiteti |
Doğum tarixi | |
Doğum yeri | Bakı, Azərbaycan SSR, SSRİ |
Milliyyəti | azərbaycanlı |
Atası | Mikayıl Əliyev |
Həyat yoldaşı | Fikrət Əhmədov |
gularahmadova.com |
Həyatı
Gülər Əhmədova 1965-ci il avqust ayının 20-də Bakı şəhərində anadan olmuşdur. Azərbaycan Dövlət Pedaqoji İnstitutunun riyaziyyat fakültəsini fərqlənmə diplomu ilə bitirmişdir. Psixologiya elmləri namizədidir. Rus və ingilis dillərini bilir.
1986-cı ildən Bakıda texniki peşə məktəbində müəllim, orta məktəbdə müəllim, direktor müavini vəzifələrində çalışmışdır. 1994-cü ildən Azərbaycan Respublikası Gənclər və İdman Nazirliyinin baş təlimatçısı, şöbə müdiri, idarə rəisi, 1996-cı ildən Azərbaycan Respublikası Uşaq Təşkilatının sədridir. Hazırda Bakı Dövlət Universitetinin müəllimidir.
Evlidir, 3 övladı var.
Siyasi fəaliyyəti
Azərbaycan Respublikası Milli Məclisinin dördüncü çağırış seçkilərində Bakı şəhərinin Xətai rayonundan deputatlığa namizədliyini irəli sürmüş və üçüncü dəfə, Yeni Azərbaycan Partiyası üzvü olaraq deputat seçilmişdir.
Milli Məclisin Beynəlxalq münasibətler və parlamentlərarası əlaqələr komitəsinin üzvüdür. Azərbaycan-Fransa parlamentlərarası əlaqələr üzrə işçi qrupunun rəhbəri, Azərbaycan-Çexiya, Azərbaycan-Rusiya, Azərbaycan-Səudiyyə Ərəbistanı, Azərbaycan-Türkiyə parlamentlərarası əlaqələr üzrə işçi qruplarının üzvü olmuşdur.
Avropa İttifaqı–Azərbaycan parlament əməkdaşlığı komitəsinin üzvü olmuşdur.
"Mərkəz" qəzetinin təsisçisi və baş redaktorudur.
14 dekabr 2012-ci il tarixində Yeni Azərbaycan Partiyası sıralarından xaric edilmişdir.
2020-ci ilin dekabr ayında Müasir Müsavat Partiyası sıralarına qatılmışdır. Daha sonra partiyanın Siyasi Şurasına üzv qəbul olunmuşdur. 11 mart 2020-ci il tarixində MMP Sədrinin Xarici Əlaqələr üzrə Müavini təyin olunmuşdur.
Deputat mandatından imtina etməsi və həbsi
Fəaliyyəti dayandırılmış Azərbaycan Beynəlxalq Universitetinin (ABU) sabiq rektoru Elşad Abdullayevin 2012-ci ilin sentyabrında yaydığı “mandat alveri” ilə bağlı videodan sonra Gülər Əhmədova deputat mandatından imtina edib. Daha sonra ona Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.2-ci (qabaqcadan vəd etmədən ağır cinayəti gizlətmə) maddələri ilə ittiham sürülüb və 2013-cü ilin fevralında Gülər Əhmədova barəsində həbs qətimkan tədbiri seçilib.
Bakı Ağır Cinayətlər Məhkəməsinin hökmü ilə Gülər Əhmədova 3 il müddətinə azadlıqdan məhrum edilib.
2014-cü ildə Gülər Əhmədovaya Bakı Apellyasiya Məhkəməsinin qərarı ilə 3 il sınaq müddəti təyin olunmaqla şərti cəza təyin edilib və o, azadlığa buraxılıb.
Ailəsi
2020-ci ilin fevral ayında Gülər Əhmədovanın qanunsuz silah saxlamaqda təqsirləndirilən, 1987-ci il təvəllüdlü oğlu Toğrul Əhmədov 2 il müddətinə azadlıqdan məhrum edilib.
İstinadlar
- Gülər Əhmədovanın əri işdən çıxıb
- https://www.bbc.com/azeri/azerbaijan/2012/12/121215_gular_expelled
- https://aqreqator.az/az/siyaset/1138088
- https://konkret.az/guler-ehmedovaya-vezife-verildi/
- Gülər Əhmədovanın oğluna 2 il həbs cəzası verildi