Barama İnnovasiya və Sahibkarlıq Mərkəzi
Azərbaycanda yaradılmış ilk biznes inkubator
Barama İnnovasiya və Sahibkarlıq Mərkəzi | |
---|---|
Tipi | Biznes inkubator |
Yaranma tarixi | 2009 |
Təsisçilər | |
Sənaye | |
Sayt | barama.az |
10 ildən artıqdır ki fəaliyyət göstərən Barama İnnovasiya və Sahibkarlıq Mərkəzi, Azercell Telekom MMC və PAŞA Bankın dəstəyi ilə 2009-cu ildə yaradılan Azərbaycanın ilk biznes inkubatorudur. Mərkəzin əsas məqsədi Azərbaycanda rəqəmsal ekosistemi böyütməkdir.
Fəaliyyəti
Barama İnnovasiya və Sahibkarlıq Mərkəzi İnnovasiya Laboratoriyası, Biznes İnkubator və Sahibkarlıq dəstəyi, İş Həlləri və Tərəfdaşlıq sahələrindən ibarətdir.
2017-ci ilə qədər Mərkəz 300-dən çox tədbirə ev sahibliyi etdi, 3500 müraciət toplayaraq 45 startapı işə salıb.
Bundan əlavə, ABŞ-ın Virciniya ştatında bir startap yaradılması və 6 startap müəssisəsinin inkişaflarını gücləndirmək üçün Kaliforniyanın Silikon Vadisini ziyarət etməsinə səbəb oldu.
2019-cu ildən bəri Barama İSM Azərbaycan İnnovasiyalar Agentliyi tərəfindən dəstəklənir.
2020-ci ilin yanvar ayında Barama İnnovasiya və Sahibkarlıq Mərkəzi 30-dan çox beynəlxalq və yerli mentor, 25000 manata qədər maliyyə dəstəyi və ABŞ-da mübadilə proqramı daxil olmaqla erkən mərhələli startaplar üçün ilk pre-akselerasiya proqramını həyata keçirdi. 2019-cu ildə Gəncə və Lənkəranda regional mərkəzlərini yenilədi. Hər bir regional mərkəz bölgələrdə startapları inkişaf etdirmək məqsədi ilə aylıq görüşlər və təlimlər keçirir, startapların inkişafına yardım edir.
2017-ci ilin yanvarın 18-dən Barama İnnovasiya və Sahibkarlıq Mərkəzi Azərbaycan İqtisadi İslahatların Təhlii və Kommunikasiya mərkəzi ilə əməkdaşlığa başlayıb.
2017-ci il iyunun 3-də Gəncə şəhərinin Azərbaycan Texnologiya Universitetinin nəzdində fəaliyyət göstərəcək yeni mərkəzinin açılışı olub.
2017-ci il dekabrın 21-də Azercell və "Azərbaycan Britaniya Kolleci" arasında imzalanan əməkdaşlıq memorandumuna əsasən Barama İnnovasiya və Sahibkarlıq Mərkəzi tərəfindən məktəblilər üçün xüsusi təlim proqramları təşkil olundu. "Sahibkarlıq məktəbi", "İT məktəb" və "İT Media" adlı 3 hissədən ibarət olan proqramda sahibkarlığın əsasları, uğurlu startapların nümunələri və təqdimatlar, proqramlaşdırmanın əsasları kimi təlimlərin aparıldı.
Bundan əlavə, şagirdlərə məktəbdən real biznes aləminə daxil olanadək dəstəyin göstərilməsi, praktiki seminarların aparılması, yay-qış məktəbi proqramlarının, məktəblilər arasında Hackaton yarışmalarının təşkili və İT üzrə Olimpiadalara hazırlıq kurslarında məktəblilərin iştirakı da proqrama daxildir. Əməkdaşlıq çərçivəsində məktəbdə şagirdlər üçün Barama İnnovasiya və Sahibkarlıq Mərkəzinin ofisi açılması da daxildir.
Barama İnnovasiya və Sahibkarlıq Mərkəzi həmin ildə məktəblilər üçün daha bir layihə həyata keçirdi. "Coding Kids – Summer IT School" adlı layihə çərçivəsində uşaqlara 6 həftə ərzində İnformasiya Texnologiyalarına və Kompüter elmlərinə giriş, Kodlaşdırma Texnikası, Mobil Tətbiqlərin Yazılması, Verilənlər Bazası, C++ Proqram dilinin öyrənilməsi və digər maraqlı mövzular tədris edilib.
2019-cu il mayın 22-də Lənkəranda Lənkəran Dövlət Universiteti nəzdində Barama İnnovasiya və Sahibkarlıq Mərkəzinin yeni ofisinin açılış mərasimi keçirilib. Mərkəzin rəhbəri İmran Bağırov yeni istifadəyə verilən mərkəzin əsas məqsədinin kənd təsərrüfatı və texnologiyanı birləşdirmək, bu sahədə ixtisaslı kadrlar, proqramçılar yetişdirmək olduğunu bildirib.
2019-cu ilin iyulunda Barama İnnovasiya və Sahibkarlıq Mərkəzi səfər qrantları üçün qəbul elan edib. Belə ki, sentyabrın 9-dan 12-dək Macarıstanın paytaxtı Budapeştdə təşkil olunacaq "ITU Telecom World" sərgisində iştirak etmək istəyən seçilmiş startaplar üçün bütün xərcləri öz üzərinə götürüb.
Yarandığı müddətdən Barama İnnovasiya və Sahibkarlıq mərkəzi bir neçə uğurlu layihələrə dəstək olmuşdur. Bu layihələrdən bəziləri aşağıdakılardır:
- 2009-cu ildə Barama Layihəsinə təqdim edilən MySİM ideyası qəbul edildi. MySİM "Azercell Telekom" MMC-nin rəsmi dilerlərində satışda olan nömrələr üzrə vahid axtarış xidmətidir. İdeyaya görə bu saytda dilerlərin elektron mağazası yaradılıb.
- Ölkəmizdə istifadə olunan texnoloji cihazların istehsalı ilə məşğul olan "Sumaks" layihəsi. Sumaks — təhlükəsizlik xidmətlərinin yüksək texnologiyalar vasitəsi ilə müştərilərə çatdırmaqla onların təhlükəsizliyini və rahatlığını təmin edilmək məqsədi ilə yaradılıb. Vaxtı ilə yeni layihə olub və hazırda şirkətə çevrilmiş Sumaks: Avtomaks, Fitmaks kimi məhsullar üzərində çalışır və yaxın zamanda onları geniş kütləyə təqdim edəcək.
- "Technote" layihəsi — "Technote Media" — Azərbaycanda və dünyada texnologiya, sosial media, elektron ticarət, rəqəmsal marketinq və startap sahələrində baş verən ən son yenilikləri doğma dildə öz istifadəçi kütləsinə çatdıran yerli informasiya agentliyidir. "Technote" eyni zamanda Rəqəmsal Marketinq şirkəti olaraq korporativ şirkətlərin məhsullarının yerli bazarda tanıdılması və internet üzərində reklamını həyata keçirir.
- Zövqlü və dəbli geyim seçimi hər zaman rəğbət qazanır. "NAVEEN" Azərbaycanda ilk sərfəli dizayner geyim brendi olaraq xanımlara sərfəli, keyfiyyətli və eyni zamanda unikal dizayna sahib geyimlər təklif edir. Geyimlər sıfırdan, trendlərə uyğun və özünəməxsusluq ilə tərtib edilir və bu dizaynlar əsasında dərzi tərəfindən tikilir. Bəzi geyimlər isə tamamilə əl işidir. Bunu etməkdə məqsədimiz daha çox insan üçün əlçatan olmaq və eyni zamanda gələcəkdə xarici podiumlarda Azərbaycan brendi olaraq təmsil olunmaqdır.
- Owbike peşəkar biznes saytlarının yaradılması üçün yerli proqram təminatıdır. Platforma istifadəçidən heç bir ekstra texniki bilik tələb etmir. Owbike-dan istifadə edərək fərdi sahibkarlar qısa zamanda öz bizneslərini təqdim edən bütün müasir dünya standartlarına uyğun vebsayt əldə edirlər.
- "Green Baku" Ekoloji dəftərxanası 2016-cı ilin may ayından kiçik startup şəklində fəaliyyətə başlamışdır. Məqsəd — təkrar emal olunmuş materiallardan Azərbaycanda ilk dəfə ekoloji təmiz dəftərxana brendi yaratmaqdır. "Green Baku" olaraq istehsal olunan məhsullar tam olaraq yenidən emal olunmuş kağızdan hazırlanır.
- "Ustad" şirkətlər və ya təhsil mərkəzləri üçün istifadəyə verilmiş ümumi quiz, imtahan və anket platformasıdır. Bu platforma vasitəsilə şirkətlər müştərilər və ya əməkdaşlar üçün sorğu, imtahan hazırlaya bilərlər. Facebook və Google ilə inteqrasiya olunmuş Android və IOS tətbiqlər istifadəyə verilib. "Ustad" platforması üzərindəki oyun və tətbiqlərin ümumi yüklənmə sayı 13 milyondan çoxdur.
Əlavə olaraq Barama mərkəzi bir neçə beynəlxalq və yerli layihələrin həyata keçirilməsində tərəfdaş və təşkilatçı qismində çıxış etmişdir. "Seedstars World" təşkilatının keçirdiyi "Seedstars Baku" yarışmasının ev sahibliyini Barama mərkəzi edir. Həmçinin, Barama mərkəzi bir neçə uğurlu yerli layihələrə imza atmışdır. Bakı Dövlət Universitetində tələbələr üçün Barama Media studiyası tələbələr üçün qapılarını açıb. Əsasən texnologiya və innovasiya yönümlü layihələrə dəstək verən bu mərkəz üzvlərinin bütün tələbatını nəzərə alaraq onlar üçün əlverişli biznes mühiti yaradır. Bakı İstedadlar Təhsil Kompleksində (Azerbaijan British College) məktəblilər üçün Sahibkarlıq Məktəbi, İT sahəsi ilə ətraflı tanışlıq və Media School dərsləri aparılır.
2021-ci il yanvarın 30-dan Gənc Hüquqşünaslar Şəbəkəsi Barama İnnovasiya və Sahibkarlıq Mərkəzi ilə birgə əməkdaşlığı başlamışdır. Əməkdaşlıq çərçivəsində Baramanın "İnkubasiya 2021" proqramına qoşulan startaplara Şəbəkəmizin peşəkar hüquqşunasları tərəfindən "Data Protection", "Privacy Policy" kimi sahələrdə mentorluq dəstəyi təmin ediləcəkdir.
Rəhbərlik
Barama İnnovasiya və Sahibkarlıq Mərkəzinin idarə heyəti aşağıdakı kimidir:
Zaur Hüseynzadə — Layihə koordinatoru
Fidan Rüstəmova — Layihə koordinatoru
Ülya Rüstəmova — İzləyici Mentor
Camal Ağayev — Texniki məsləhətçi
Elman Kərimli — Texniki məsləhətçi
Dəniz Əliyev — Texniki məsləhətçi
Barama İnkubasiya Proqramı
Barama İnkubasiya proqramının hədəfi yerli startapların sahibkarlıq biliklərini və bacarıqlarını zənginləşdirmək, mentor dəstəyi vermək, uğurlu biznes alətləri və vasitələri ilə məhsulunu daha tez inkişaf etdirmək metodları haqqında məlumatlandırmaq və dünya bazarına çıxış yollarını göstərməkdir. İntensiv 12 həftəlik proqramda dəyər təklifi, məhsulun inkişafı, biznes modeli, habelə hüquqi və maliyyə sahələrində dəstək daxil olmaqla, müxtəlif sahələrdəki mentorlar və mütəxəssislər tərəfindən dəstəklənir.
Proqram Azərbaycan və ingilis dillərində, onlayn və oflayn keçirilir.
İstinadlar
- ↑ http://innovationagency.az/biznes-inkubasiya-merkezi/ 2021-04-25 at the Wayback Machineİnnovasiyalar Agentliyi
- ↑ https://barama.az/ 2021-04-26 at the Wayback Machine Barama
- "Azərbaycanda Startap olmaq asandır!". Azercell. 19.01.2017
- "Gəncədə "Barama" İnnovasiya və Sahibkarlıq mərkəzi açılıb". Salamnews. 03 İyun 2017
- "Barama məktəblilər üçün yeni layihəyə başlayır". ABC. 22.12.2017
- "Barama İnnovasiya və Sahibkarlıq Mərkəzi artıq Lənkəranda". AzərTac. 23.05.2019
- "Barama İnnovasiya və Sahibkarlıq Mərkəzi səfər qrantları üçün qəbul elan edir". Aqreqator. 9 İyul 2019
- "Bu il: Barama İnnovasiya və Sahibkarlıq Mərkəzi". Fins.
- "GƏNC HÜQUQŞÜNASLAR ŞƏBƏKƏSININ BARAMA İNNOVASIYA VƏ SAHIBKARLIQ MƏRKƏZI ILƏ BIRGƏ ƏMƏKDAŞLIĞI". YLN
- ↑ ""Barama İnkubasiya 2021" proqramı davam edir". Xəbərlər.az