Azərbaycan vətəndaşının şəxsiyyət vəsiqəsi

Azərbaycan vətəndaşının şəxsiyyət vəsiqəsi — Azərbaycan Respublikası ərazisində şəxsiyyəti təsdiq edən sənəd.

Azərbaycan vətəndaşının şəxsiyyət vəsiqəsi
Tərəfindən verilib	Azərbaycan
Etibarlılıq	Azərbaycan Türkiyə
Sənəd növü	şəxsiyyət vəsiqəsi
Məqsəd	Şəxsiyyət vəsiqəsi kimi xidmət edir, sadalanan ölkələrdə pasportu əvəz edir.
Uyğunluq tələbləri	Azərbaycan vətəndaşlığı

“Azərbaycan Respublikası vətəndaşının şəxsiyyət vəsiqəsi haqqında” qanun 1994-cü il iyunun 14-də o vaxtkı Azərbaycan Respublikasının Prezidenti Heydər Əliyev tərəfindən qəbul edilmişdir. 2018-ci ilin sentyabr ayından yeni nəsil şəxsiyyət vəsiqələrinin verilməsinə başlanılıb.

1 aprel 2021-ci il tarixindən etibarən Azərbaycan vətəndaşının şəxsiyyət vəsiqəsiylə Türkiyə Respublikasına giriş etmək üçün səyahət sənədi kimi istifadə edilə bilər (yalnız Azərbaycandan birbaşa).

Təsviri

Azərbaycan Respublikası vətəndaşının şəxsiyyət vəsiqəsinin təsviri Azərbaycan Prezidenti İlham Əliyevin 2012-ci il 7 fevral tarixli fərmanı ilə təsdiq edilmişdir.

Şəxsiyyət vəsiqəsinin ölçüləri — 85,6 mm x 54 mm-dir. Ön hissənin yuxarı sol küncündə Azərbaycan Respublikasının dövlət gerbi və “Azərbaycan Respubli̇kası Vətəndaşının Şəxsiyyət Vəsiqəsi” yazısı var. Ön tərəfin sol tərəfində 26 mm x 35 mm ölçülü fotoşəkil üçün yer var.

Sənədin verilməsi

Azərbaycan vətəndaşına şəxsiyyət vəsiqəsi onun ərizəsi, doğum haqqında şəhadətnaməsi, fotoşəkili (16 yaşından yuxarı olanlar üçün), dövlət rüsumunun ödənilməsi haqqında qəbz əsasında verilir. Vətəndaş aşağıdakı hallarda yeni şəxsiyyət vəsiqəsi almalıdır:

• 16, 25, 35, 50 yaşa çatdıqda
• Soyadı, adı, atasının adı, yaşayış yeri, ailə vəziyyəti, hərbi xidmət dəyişdirildikdə
• Sənəd itirildikdə və ya istifadəyə yararsız olduqda

Azərbaycan Respublikası vətəndaşı vəfat etdikdə, şəxsiyyət vəsiqəsi vətəndaşlıq vəziyyəti aktlarının qeydiyyatı orqanına təqdim edilir.

Məzmunu

Azərbaycan Respublikası vətəndaşlarının şəxsiyyət vəsiqələrinin 2 növü var:

• 16 yaşına çatmamış vətəndaşa verilən vəsiqə
• 16 yaşına çatdıqda vətəndaşa verilən vəsiqə

16 yaşına çatmamış Azərbaycan vətəndaşlarına verilən vəsiqədə aşağıdakı məlumatlar olmalıdır:

• vəsiqənin seriyası və nömrəsi
• vətəndaşın soyadı və adı
• atasının soyadı və adı
• anasının soyadı və adı
• doğum tarixi və yeri
• cinsi
• qan qrupu
• yaşayış yeri
• vətəndaşın vəsiqəsini vermiş orqanın adı
• vəsiqənin verilmə tarixi

Azərbaycan vətəndaşlarına 16 yaşına çatdıqda verilən vəsiqədə aşağıdakı məlumatlar olmalıdır:

• vəsiqənin seriyası və nömrəsi
• vətəndaşın soyadı, adı və atasının adı
• doğum tarixi və yeri
• fotosu
• milliyyət haqqında məlumat
• ailə vəziyyəti
• hərbi xidmətə çağırış
• cinsi
• qan qrupu
• yaşayış yeri
• boyu
• göz rəngi
• şəxsi imza
• vətəndaşın vəsiqəsini vermiş orqanın adı
• vəsiqənin verilmə tarixi

Yeni nəsil şəxsiyyət vəsiqəsi

“Azərbaycan vətəndaşının şəxsiyyət vəsiqəsi haqqında” Azərbaycan Respublikası qanununun tətbiqi haqqında əsasnamənin təsdiq edilməsi barədə” 2013-cü il 23 oktyabr tarixli qanunda dəyişikliklər edilməsi barədə fərman imzalanıb. 2018-ci il sentyabrın 1-dən Azərbaycanda yeni nəsil şəxsiyyət vəsiqələrinin tətbiqinə başlanmışdır.

Yeni şəxsiyyət vəsiqəsində vətəndaşın yaşayış yeri üzrə qeydiyyatı, ailə vəziyyəti, biometrik fotoşəkili və şəxsiyyət vəsiqəsi sahibinin digər fərdi göstəriciləri, habelə elektron imzası olan çip quraşdırılıb.

Dövlət rüsumu

• 16 yaşına çatmamış vətəndaşa şəxsiyyət vəsiqəsi verilərkən dövlət rüsumu tutulmur
• qaçqınlara və məcburi köçkünlərə şəxsiyyət vəsiqələri verilərkən dövlət rüsumu tutulmur

16 yaşına çatmış vətəndaşlara şəxsiyyət vəsiqəsi verildikdə rüsum tutulur:

1. 5 manat - 10 gün ərzində
2. 25 manat - 3 iş günü ərzində
3. 35 manat - 1 iş günü ərzində rüsum tutulur

• vəsiqə sahibinin təqsiri olmadan itirildikdə və ya zədələndikdə ödəniş tutulmur
• sahibinin təqsiri üzündən itirildikdə və ya zədələndikdə rüsum tutulur:

1. 15 manat - 10 gün ərzində
2. 35 manat - 3 iş günü ərzində
3. 45 manat - 1 iş günü ərzində

Şəxsiyyət vəsiqəsini qanunsuz yolla əldə etmək və dəyişdirilməsindən imtina etmək qadağandır. Şəxsiyyət vəsiqəsi itirildikdə onun sahibi və ya onun qanuni nümayəndəsi dərhal həmin sənədi verən dövlət orqanına müraciət etməlidir.

Həmçinin bax

• Azərbaycan pasportu
• Azərbaycan vətəndaşlığı

İstinadlar

1. Azərbaycan Respublikası vətəndaşının şəxsiyyət vəsiqəsi haqqında Azərbaycan Respublikasının Qanunu (14 iyun 1994)
2. "Закон Азербайджанской Республики об удостоверении личности гражданина Азербайджанской Республики". 2018-02-08 tarixində arxivləşdirilib. İstifadə tarixi: 2018-07-09.
3. "Вводится удостоверение личности нового поколения". www.turan.az. 2020-06-30 tarixində arxivləşdirilib. İstifadə tarixi: 2020-06-28.
4. Türkiye-Azerbaycan arasında kimlik kartı ile seyahat imkanı
5. "Официальный сайт президента Азербайджанской Республики - ДОКУМЕНТЫ » Указы" (rus). ru.president.az. 2018-04-10 tarixində arxivləşdirilib. İstifadə tarixi: 2018-07-09.
6. "Azərbaycan Respublikası vətəndaşının şəxsiyyət vəsiqəsi haqqında Azərbaycan Respublikasının Qanunu" (az.). mia.gov.az. 2018-07-09 tarixində arxivləşdirilib. İstifadə tarixi: 2018-07-09.
7. ""Azərbaycan Respublikası vətəndaşının şəxsiyyət vəsiqəsi haqqında" Azərbaycan Respublikası Qanununun tətbiqi barədə Əsasnamə" (az.). president.az. 2018-03-25 tarixində arxivləşdirilib. İstifadə tarixi: 2018-07-09.
8. "Azərbaycan Respublikası vətəndaşının şəxsiyyət vəsiqəsi haqqında" (az.). 2020-06-28 tarixində arxivləşdirilib. İstifadə tarixi: 2020-06-28.
9. "ASAN выдает новые удостоверения личности. Как они выглядят?". URBAN.AZ. 2020-06-29 tarixində arxivləşdirilib. İstifadə tarixi: 2020-06-28.
10. "https://www.turan.az/ext/news/2018/9/free/social/ru/74736.htm". www.turan.az. 2020-06-30 tarixində arxivləşdirilib. İstifadə tarixi: 2020-06-28.
11. "Новые удостоверения личности позволят гражданам Азербайджана самостоятельно активизировать е-подпись - замминистра". Trend.Az (rus). 2018-11-30. 2020-06-29 tarixində arxivləşdirilib. İstifadə tarixi: 2020-06-28.
12. "Şəxsiyyət vəsiqələrinin verilməsi və dəyişdirilməsi" (az.). asan.az. 2018-10-24 tarixində arxivləşdirilib. İstifadə tarixi: 2018-07-09.
13. Azerbaijan, The Ministry of Internal Affairs of the Republic of. "News". mia.gov.az. İstifadə tarixi: 27 November 2023.
14. "Türkiye-Azerbaycan arasında kimlik kartı ile seyahat imkanı".
15. Resmi Gazete

Xarici keçidlər

• Texts of the Azerbaijani law on citizenship
• Azerbaijani law on citizenship