Oğlanın sözü. Asfaltda qan

Oğlanın sözü. Asfaltda qan (rus. Слово пацана. Кровь на асфальте) — 2023-cü ildə rejissor Jora Krıjovnikov tərəfindən çəkilmiş rus kriminal dram teleserialıdır. Serial, 1980-ci illərin sonlarında Sovet İttifaqının Tatarıstan bölgəsinin paytaxtı Kazanda baş verən və "Kazan fenomeni" kimi tanınan yeniyetmələrdən ibarət kriminal dəstələrin fəaliyyətini əks etdirir. Serialın ssenarisi tatar jurnalist Robert Karayevin "Oğlan sözü. Kriminal Tatarıstan 1970–2010-cu illərdə" adlı sənədli kitabı əsasında hazırlanmışdır.

Oğlanın sözü. Asfaltda qan
rus. Слово пацана. Кровь на асфальте
Janr	cinayət filmi, dram filmi, triller
İstehsalçı ölkə	Rusiya
Dil	rus dili
İlk buraxılış	9 noyabr 2023
Sonuncu buraxılış	21 dekabr 2023
İstehsal
Prodüser	Fyodor Bondarçuk
Çəkiliş yeri	Yaroslavl
start.ru/watch/slovo-pac…

Süjet

Serialın hadisələri 1980-ci illərin sonlarında Kazanda baş verir. Bu dövrdə şəhərdə və ətraf bölgələrdə yeniyetmələrdən ibarət kriminal dəstələr yaranırdı. Bu dəstələr, yaşadıqları məhəllələri qorumaq və digər qruplaşmalara qarşı mübarizə aparmaq məqsədilə təşkilatlanırdılar. Dəstələr arasında tez-tez kütləvi davalar baş verir, bu qarşıdurmalarda bıçaq, beşbarmaq, dəyənək və odlu silah kimi vasitələrdən istifadə olunurdu. Bəzən bu davalar insan ölümləri ilə nəticələnirdi. Sovet İttifaqının dağılmasından sonra bəzi dəstələr mütəşəkkil cinayətkar qruplaşmalara çevrilərək sahibkarlara qarşı təzyiqlər göstərməyə başlamışdılar.

İstehsal

Serial "Start" onlayn kinoteatrı tərəfindən "Toomuch Production" kinoşirkəti, "Milli Media Qrup" və Rusiyanın "İnternetin İnkişafı İnstitutu" ilə birgə istehsal olunmuşdur. Serialın ilk mövsümünün premyerası 9 noyabr 2023-cü ildə keçirilmiş və ümumilikdə 8 seriyadan ibarət olmuşdur.

Televiziyadakı premyerası, 2024-cü il aprelin 15-dən 25-dək "NTV" kanalında baş tutub.

Təsiri və tənqid

"Oğlanın sözü. Asfaltda qan" serialı Rusiyada və keçmiş postsovet ölkələrində geniş rezonans doğurmuşdur. Serialın hər epizodunda səslənən və "Aiqel" qrupu tərəfindən ifa olunan "Pıyala" mahnısı Rusiyanın musiqi çartlarında, "Spofity" və "Shazam"ın top hitlər sıralamasında ilk pillələrdə yer almışdır.

Bununla yanaşı, serial zorakılığı romantikləşdirməkdə və yeniyetmələri cinayətə sövq etməkdə ittiham olunmuşdur. Tatarıstan rəhbərliyi serialın Kazanda çəkilməsinə icazə verməmiş, nəticədə çəkilişlər Rusiyanın Yaroslavl şəhərində aparılmışdır. Tatarıstan Prezidenti Rüstəm Minnexanov serialın ölkənin apardığı siyasətə uyğun gəlmədiyini bildirmişdir.

Qazaxıstanda da serialın nümayişinin qadağan olunması məsələsi gündəmə gəlmişdir. Qazaxıstanın elm və ali təhsil naziri Sayasat Nurbek və təhsil naziri Qani Beysembayev serialın zorakılığı təbliğ etdiyini və bu cür serialların nümayişinin qarşısının alınmasının vacibliyini vurğulamışlar.

İstinadlar

1. gundem.az. "Tatar dilini məşhurlaşdıran, Azərbaycanda populyarlıq qazanan KRİMİNAL SERİAL". gundem.az. 2025-05-25 tarixində arxivləşdirilib. İstifadə tarixi: 2025-05-17.
2. "Названа дата телепремьеры сериала «Слово пацана. Кровь на асфальте»". РБК Life. 2024-04-02 tarixində arxivləşdirilib. İstifadə tarixi: 2025-05-17.
3. Прокофьев, Никита. "Расписание выхода серий «Слова пацана» по телевизору". www.championat.com (rus). 2024-04-25 tarixində arxivləşdirilib. İstifadə tarixi: 2025-05-17.
4. "Группа «Аигел» возглавила топ мирового чарта Shazam". Инде. 2023-12-04 tarixində arxivləşdirilib. İstifadə tarixi: 2025-05-17.
5. "АИГЕЛ - В титрах не значится - Звуки.Ру". Zvuki.ru (ingilis). 2023-12-04 tarixində arxivləşdirilib. İstifadə tarixi: 2025-05-17.
6. "Qazaxıstan məşhur "Oğlanın sözü" serialını qadağan etməyi düşünür". musavat.ru (az.). 2025-05-26 tarixində arxivləşdirilib. İstifadə tarixi: 2025-05-17.