Yusif Nağıyev
Nağıyev Yusif Həsən oğlu — FHN TTNDA “Azərinşaatlayihə” DBLKT İnstitutunun direktoru, Əməkdar Mühəndis.
Yusif Nağıyev | ||
---|---|---|
Yusif Həsən oğlu Nağıyev | ||
| ||
Şəxsi məlumatlar | ||
Partiya | ||
Təhsili | Moskva Ümumittifaq Yeyinti Sənaye İnstitutu | |
İxtisası | İqtisadçı-mühəndis | |
Doğum tarixi | ||
Doğum yeri | SSRİ, Azərbaycan SSR, Bakı şəhəri | |
Vətəndaşlığı | Azərbaycan | |
| ||
Təltifləri | Əməkdar Mühəndis |
Həyatı
Nağıyev Yusif Həsən oğlu 21 mart 1945-ci ildə Bakı şəhərində ziyalı ailəsində anadan olub. 1952-1962-ci illərdə Bakı şəhərindəki 160 nömrəli rus dilli məktəbdə orta təhsil alıb.
1963-1964 –cü illərdə Leninqrad Politexnik İnstitutunun radioelektronika fakültəsində təhsil alan Y.H. Nağıyev 1967-1974–cü illərdə Moskva şəhərində Ümumittifaq Yeyinti Sənaye İnstitutunun mühəndis iqtisadiyyat fakültəsində təhsil alaraq mühəndis-iqtisadçı ixtisasına yiyələnmişdir.
Y.H. Nağıyev ilk əmək fəaliyyətinə 1962-ci ildə Bakı radio zavodunda başlamış və 1966-cı ilə kimi burada I dərəcəli yığıçı, II dərəcəli tənzimləyici vəzifəsində işləmişdir. 1966-1967-ci illərdə isə o, Bakı Kondisioner zavodunda IV dərəcəli yığıçı-çilingər vəzifəsində çalışmış, müəssisənin və rayonun ictimai həyatında fəal iştirak etmişdir.
Y.H. Nağıyev 1967-1969 – cu illərdə Nərimanov rayon Komsomol Komitəsi Bakı Yeyinti Sənaye Texnikumunda komsmol komitə katibi, 1969-1974 -cü illərdə Bakı şəhər Komsomol Komitəsində təlimatçı, şöbə rəisinin müavini, 1974-1977-ci illərdə Azərbaycan KP MK Bakı şəhər Partiya Komitəsinin təşkilat şöbəsində təlimatçı vəzifəsində çalışmışdır.
Y.H. Nağıyev 1977-ci ildən ixtisası üzrə “Qipropişepnom – 2” layihə institutunun Bakı filialında – indiki “Azərinşaatlayihə” DBLKT İnstitutunda böyük mühəndis kimi işə başlamış, sonrakı illərdə qrup rəhbəri, bölmə rəhbəri, baş mütəxəssis, texniki şöbənin rəisi, istehsalat üzrə direktor müavini vəzifələrində işləmişdir.
Y.H. Nağıyev 1993-cü ilin mart ayından – 23 ildir ki, “Azərinşaatlayihə” DBLKT İnstitutunun direktoru vəzifəsində işləyir. Y.H. Nağıyev 1975-1977-ci illərdə Bakı şəhəri Oktyabr rayon sovetinin deputatı olmuş, bir millət vəkili kimi seçicilərinin mövcud problemlərinin həllində onlara yaxından köməklik göstərmişdir.
O, 12 may 1991-ci ildə Azərbaycan Respublikasının Əməkdar Mühəndisi fəxri adına layiq görülmüşdür.
İnstitut 1966-cı ildə yaranıb. Belə ki, Aqrar Sənaye Kompleksinin obyekt və müəssisələrini layihə-smeta sənədləri ilə təmin etmək üçün 1966-cı ildə keçmiş SSRİ Yeyinti Nazirliyinin əmri ilə Moskvada fəaliyyət göstərən 1974-cü ildə adı dəyişdirilərək “Qipropişeprom-2” olan “Qiprospirtvino” İnstitutunun Bakıda kompleks layihə şöbəsi təşkil edilmişdir. 1975-ci ilin fevralında isə bu kompleks layihə şöbəsi keçmiş SSRİ Yeyinti Sənayesi Nazirliyinin əmri ilə 2 nömrəli Yeyinti Sənayesi Layihə İnstitutunun Bakı filialına çevrilmişdir.
1994-cü ildə instituta “Azərdövlətətsüdsənayelayihə” İnstitutu birləşdirilmiş və institutun adı “Azəryeyintiətsüdsənayelayihə” Dövlət Baş Layihə Konstruktor Texnoloji İnstitutuna dəyişdirilmişdir. İnstitut bu ad altında 2004-cü ilə kimi fəaliyyət göstərmiş və məhz bu illərdə ölkənin layihə sektorunda aparıcı layihə qurumlarından biri kimi özünü təsdiq etmiş, görülən böyük işlərlə institutun maddi-texniki bazasının möhkəmləndirilməsinə nail olunmuşdur.
Dövlət Tikinti və Arxitektura Komitəsinin 22 iyun 2004-cü il tarixli 135 nömrəli əmri ilə institutun adı yenidən başqa bir ada “Azərinşaatlayihə” Dövlət Baş Layihə Konstruktor İnstitutuna dəyişdirilmişdir. Elə buradaca qeyd edək ki, fəaliyyət göstərdiyi illər ərzində institut yüksək maddi-texniki təchizatı olan yüksək səviyyəli, peşəkar mütəxəssislərlə formalaşmış güclü bir müəssisəyə çevrilmişdir.
Arxada qalan illər ərzində institutun layihəçiləri tərəfindən yüzərlə şərab zavodunun, şərab saxlama bazalarının, şərabçılıq tullantıları emal müəssisələrinin layihə-smeta sənədləri hazırlanmaqla faktiki olaraq respublikamızda şərabçılıq sənayesi yaradılmış, 16 konserv zavodlarının, 40 çörəkbişirmə, makaron və qənnadı məmulatı sənayesi, yaşıl çay yarpağının emalı, tütün – fermentasiya zavodlarının, çörək məmulatları kombinatlarının, 37 ət-süd müəssisələrinin, 32 istifadədə olan ət-süd müəssisələrinin yeni avadanlıqla təmin edilərək yenidən qurulmasının layihələri hazırlanmışdır. Eyni zamanda çoxillik bitkilərin əkilməsi, bağların salınması üçün 400-dən çox layihə hazırlanmışdır ki, burada müasir aqrotexnikadan, mütərəqqi texnologiyadan və yeni inşaat konstruksiyalarından istifadə olunmuşdur.
Arxada qalan illərdə institut böyük bir təşkilata, layihə qurumuna çevrilmiş və burada yaxşı, peşəkar mühəndis, layihəçi-konstruktor kadrlar yetişmişdir. Baxmayaraq ki, müasir tariximizin müəyyən mərhələsində durğunluq adlandırdığımız illər olub, ancaq institut heç zaman öz fəaliyyətinə ara verməmiş, bir gün də iş axsamamışdır. Əsasən 1993-cü ildə Ulu Öndər Heydər Əliyev ikinci dəfə Azərbaycan rəhbərliyinə qayıtdıqdan sonra institutda iş tempi artmağa başlamış və 1997-1998-ci illərdən institut tam gücü ilə işləməyə başlamışdır.
Son bir neçə illər ərzində Y.H. Nağıyevin rəhbərliyi altında institutun hazırladığı çoxsaylı layihələrlə respublikamızın bütün bölgələrində, eləcə də paytaxtımız Bakıda yüzlərlə irili-xırdalı mədəni-məişət və istehsalat obyektləri tikilərək istifadəyə verilmişdir.
2006-cı ildə “Azərinşaatlayihə” DBLKT İnstitutu Azərbaycan Respublikası Prezidentinin fərmanı ilə Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinın tabeçiliyinə verildiyi vaxtdan fəaliyyətində dönüş əmələ gəlmiş, yeni bir mərhələ başlamışdır.
Rəhbərlik elədiyi layihələr
Fövqəladə Hallar Nazirliyinin sifarişi ilə - Türkan qəsəbəsində Alayın layihəsi; Gəncə şəhərində briqadanın layihəsi; Sanqaçal qəsəbəsində 200 min tonluq taxıl saxlamaq üçün Elevatorun layihəsi; Xırdalan Pivə zavodunda yenidənqurma layihəsi; Yevlax şəhərində uşaq və gənclər idman məktəbinin layihəsi; Şamaxı rayonunda Astrofizika Rəsədxanasının əsaslı yenidən qurulması; Şəki və Gəncə şəhərlərində arxiv binaları; İmişli rayonunda qaçqınlar və məcburi köçkünlər üçün 550 ailəlik qəsəbə; Füzuli rayonunun Horadiz qəsəbəsində Olimpiya İdman Kompleksi; Sabunçu rayonu ərazisində məcburi köçkünlər üçün 5 mərtəbəli 70 mənzilli yaşayış evi; Əmək və Əhalinin Sosial Müdafiəsi Nazirliyinin sifarişi ilə - əlil və şəhid ailələri üçün 3 ədəd 9 mərtəbəli 81 mənzilli yaşayış binaları; Dövlət Şəhərsalma və Arxitektura Komitəsinin sifarişi ilə - respublikamızın 5 rayonunun - Qəbələ, Oğuz, Ağstafa, Qazax və İmişli şəhərlərinin baş planları; Azərbaycan Standartlaşdırma, Metrologiya və Patent üzrə Dövlət Komitəsinin Bakı şəhərində Labaratoriya binası; Sumqayıtda, Lənkəranda və digər rayonlarda isə onların ərazi bölmələri üçün iki mərtəbəli binalar; Abşeron rayonunun Xırdalan şəhərində Zəhmət-Ruzi şirkəti üçün istehsal sahəsi kompleksi; Şamaxı, Goranboy, Tovuz, Dəvəçi, Qobustan və Biləsuvar rayonlarında parklar, istirahət ünvanları və digər abadlıq işlərinin layihələri; Azərbaycan Respublikası Müdafiə Nazirliyinin Qospitalının 9 mərtəbəli korpusunun layihəsi; Fransanın “Klim” şirkəti ilə birgə Bakıda Balaxanı qəsəbəsində bərk məişət tullantılarının yandırılması zavodu; “Xolsum” alman şirkətinin sifarişi ilə -Qaradağ sement zavodunda Çin mütəxəssisləri ilə birgə 6-cı sobanın layihəsi; MKSİF-in sifarişi ilə - məcburi köçkünlər üçün Ağdam rayonunda 1689 ailəlik 3 yeni qəsəbənin layihələri; “Vizer Constrasion” şirkəti ilə birlikdə Daxili İşlər Nazirliyi üçün Zaqulba qəsəbəsində sanatoriya layihəsi; Xüsusi Mühafizə İdarəsi üçün idman kompleksi; Buta qəsəbəsində Müdafiə Nazirliyi üçün dəniz (morskoy) bazası; seysmoloji mərkəzin sifarişi ilə - respublikamızın 7 rayonunda seysmoloji stansiyalar; Qəbələ rayonunda böyük stadion; Xırdalan Pivə zavodunun yenidənqurulması layihəsi və sair.
Y.H. Nağıyev 50 ildən çox bir müddətdir ki, insanlarla sıx təmasda işləyir, xalq üçün gərəkli bir ömür yaşayır. Təsadüfi deyil ki, 37 il ərzində taleyini bağladığı “Azərinşaatlayihə” DBLKT İnstitutuna 23 ildir ki, bacarıq və səriştə ilə rəhbərlik edir.
Y.H. Nağıyevin respublikamızda layihəçi kadrların yetişməsində əməyi böyükdür. Bu gün bir çox layihə təşkilatlarında vaxtı ilə Yusif Nağıyevin rəhbərliyi altında işləyib təcrübə toplayaraq layihəçı kimi formalaşmış mütəxəssislərə rast gəlmək olar.
Ailəsi
Ailəlidir.
Mükafatları
12 may 1991-ci il tarixdə Yusif Nağıyev Azərbaycan Respublikasında tikinti kompleksindəki xidmətlərinə görə “Əməkdar Mühəndis” fəxri adı ilə təltif edilmişdir.
İstinadlar
- “Azərbaycan Tikinti Kompleksinin Ensiklopediyası” kitabı, I cild, səhifə: 273-277.
- "SSRİ Kənd Təsərrüfatı və Ərzaq Nazirliyi Baş Aqrar-Sənaye Elmi Tədqiqat və Layihə İnstitutu Cənub Dövlət Yeyinti Məhsulları Sənayesi Müəssisələrini və Kənd Təsərrüfatı Obyektlərini Layihələşdirmə İnstitutunun işçilərinə Azərbaycan Respublikası fəxri adlarının verilməsi haqqında" Azərbaycan Respublikası Prezidentinin 12 may 1991-ci il tarixli, 202 nömrəli Fərmanı (azərb.)