Vaqif Məmmədov (inşaatçı-mühəndis)
Məmmədov Vaqif Əlövsət oğlu — "Azəraqrartikinti" ASC-nin Sabirabad Aqrartikinti filialının müdiri
| Vaqif Məmmədov | ||
|---|---|---|
| Vaqif Əlövsət oğlu Məmmədov | ||
| ||
| Şəxsi məlumatlar | ||
| Partiya | ||
| Təhsili | Azərbaycan Politexnik İnstitutu | |
| İxtisası | İnşaatçı-mühəndis | |
| Doğum tarixi | ||
| Doğum yeri | SSRİ, Azərbaycan SSR, Sabirabad rayonu Cavad kəndi | |
| Vətəndaşlığı | Azərbaycan | |
| | ||
| Təltifləri | ||
Həyatı
Məmmədov Vaqif Əlövsət oğlu 23 yanvar 1948-ci ildə Sabirabad rayonunun Cavad kəndində andan olub.
1965-ci ildə Sabirabad şəhər orta məktəbinin 11-ci sinfini bitirib.
Elə həmin ildə - 1965-ci ildə Azərbaycan Politexnik İnstitutunun inşaat fakültəsinə qəbul olunub və 1970-ci ildə həmin ali məktəbi sənaye-mülki tikinti ixtisası üzrə bitirərək inşaatçı-mühəndis diplomu almışdır.
V.Ə. Məmmədov 1971-ci ildən "Azərbaşmeliosutikinti" Baş İdarəsinin Sabirabad rayonundakı 3 nömrəli trestinin 20 nömrəli Tİ-də iş ustası vəzifəsində ilk əmək fəaliyyətinə başlamışdır.
1975-ci ildə həmin təşkilatda baş mühəndis vəzifəsinə irəli çəkilmişdir.
V.Ə. Məmmədov 1977-ci ilin sentyabrından idarə rəisi kimi Sabirabad rayonunda 600 yerlik mədəniyyət sarayının tikintisinə başçılıq etmişdir və həmin obyektin açılışında Ulu Öndər Heydər Əliyev cənabları iştirak etmiş, onların əməyinə yüksək qiymət vermişdir.
1978-ci ilin may ayında "Azərsuçəkilişi" İstehsalat Birliyinin Sabirabad rayonundakı 20 nömrəli Tikinti İdarəsinə rəis təyin edilmişdir.
Azərbaycanda içməli su probleminin mövcud olduğu həmin illərdə V.Ə.Məmmədov Sabirabad rayonunda sutkada 50 min kub metr su istehsal edən Sabirabad və Saatlı rayonunun ərazilərini, kəndlərini, 84 kənd məntəqəsini su ilə təchiz edən layihə üzrə tikintini başlamış və 1980-ci ildə bir hissəsini istifadəyə vermişdir və həmin açılış mərasimində də Ulu Öndər iştirak etmişdir.
Su təmizləyici qurğunun açılışını edən Heydər Əliyev obyektin tikintisini yüksək qiymətləndirmiş və bu tikintinin Azərbaycan Respublikasının Dövlət Mükafatına layiq olduğunu bildirmişdir. 1982-ci ildə Ulu Öndər Heydər Əliyev cənabları Moskvaya - SSRİ-nin dövlət rəhbərliyinə yüksək vəzifəyə təyinat aldıqdan sonra bu obyektin SSRİ Nazirlər Sovetinn xüsusi mükafatına tədim olunmasına nail oldu. Moskvadan Sabirabada mütəxəssislər gəldi və onlar içməli suyun analizini bir neçə dəfə apardıqdan sonra gizli səsvermə yolu ilə bu qurğu SSRİ Nazirlər Sovetinin xüsusi mükafatını aldı.
V.Ə. Məmmədov sutkada 50 min kub metr su istehsal edən sutəmizləyici qurğunun layihələndirmə və tikinti işlərini yeni texnologiyalarla keyfiyyətlə həyata keçirdiyi üçün 1982-ci ildə SSRİ Nazirlər Sovetinin xüsusi mükafatına layiq görülmüşdür.
O, 1989-cu ildə Baş Kolxozlararası Tikinti Birliyinin Sabirabaddakı 3 nömrəli trestinə müdir təyin olunmuşdur.
Bu müddət ərzində V.Ə.Məmmədov Sabirabad, Saatlı, Hacıqabul, Əli Bayramlı rayonlarının ərazisində çoxlu sayda məktəblər, uşaq bağçaları, yaşayış binaları, heyvandarlıq kompleksləri və digər sosial obyektlərin tikintisinə rəhbərlik etmişdir.
V.Ə. Məmmədov 1996-cı ildən "Azəraqrartikinti" ASC-nin Sabirabad Aqrartikinti filialının müdiri kimi fəaliyyətə başlayaraq respublikamızın müxtəlif bölgələrində aparılan bərpa-yenidənqurma layihələrinin həyata keçirilməsində yaxından iştirak etmişdir.
Rəhbərliyi altında tikilən obyektlər
Füzuli rayonunun Horadiz qəsəbəsində, Goranboy rayonunun Aşağı Ağcakənd kəndində 60 yaşayış evləri; həmçinin Goranboy rayonunun ərazisində 150 km uzunluğunda 0.4/10 kv.t-lıq işıq xəttinin çəkilməsi və 40 ədəd transformator yarımstansiyasının quraşdırılması işləri (Ulu öndər 2001-ci ilin sonunda Goranboy rayonunna səfər etmiş və orada açılış etmişdir); Tərtər və Ağdam rayonlarının ərazisində 56 yaşayış məntəqəsini təmin edən 0.4/10 kv.t-lıq işıq xətti çəkilməsi və 40 ədəd transformator yarımstansiyasının quraşdırılması; Mingəçevir şəhərində məcburi köçkünlər üçün 46 yaşayış evinin tikintisi (2001-2003-cü illər); Bakı şəhərində Azərbaycan Milli Tarix Muzeyinin bərpası (2005-ci il); (Açılış mərasimində Azərbaycan Prezidenti cənab İlham Əliyev iştirak etmiş, kollektivin əməyini yüksək qiymətləndirmişdir.); Hökumət Evinin binasında əsaslı təmir və bərpa işləri (2007-2008-ci illər); (Azərbaycan Prezidenti cənab İlham Əliyev açılışda iştirak etmişdir.); R. Mustafayev adına Azərbaycan Dövlət İncəsənət Muzeyinin bərpa yenidənqurma işləri (2009-cu il); (cənab prezident açılış mərasimində iştirak etmişdir.); Kür çayı daşqınları zamanı zərər çəkmiş ərazilərdə Fövqəladə Hallar Nazirliyinin xətti ilə yaşayış evlərinin tikintisi; İncəsənət Muzeyinin əlavə olaraq orta korpusunun tikintisi və ikinci korpusunun bərpa işləri; Ələt qəsəbəsində 300 yerlik Agciyər xəstəlikləri hospitalının tikintisi və s.
V.Ə. Məmmədov "Azəraqrartikinti" ASC İdarə Heyətinin üzvüdür.
Dövlətçiliyimizə hər zaman sadiq olan və əməli işi ilə özünü doğruldan tanınmış inşaat mühəndisi Vaqif Məmmədov 45 ildən çox bir dövrdə ölkə tikintisində fədakar əmək nümayiş etdirərək Azərbaycan dövlətçiliyinə öz sahəsində təmənnasız xidmət etmiş və bu gün də bu böyük amalla çalışır, qurur, yaradır.
Ailəsi
Vaqif Məmmədov ailəlidir, dörd övladı, on bir nəvəsi var.
Mükafatları
SSRİ Nazirlər Sovetinin xüsusi mükafatı - 1982-ci il
Azərbaycan Respublikasında inşaat sahəsi işçilərinin təltif edilməsi haqqında Azərbaycan Respublikası Prezidentinin 10 aprel 2012-ci il tarixli Sərəncamı ilə Məmmədov Vaqif Əlövsət oğlu Azərbaycan Respublikasında inşaat sahəsində səmərəli fəaliyyətlərinə görə “Tərəqqi” medalı ilə təltif edilmişdir..
İstinadlar
- “Azərbycan Tikinti Kompleksinin Ensiklopediyası” kitabı, II cild, səhifə: 165-166.
- "Azərbaycan Respublikasında inşaat sahəsi işçilərinin təltif edilməsi haqqında Azərbaycan Respublikası Prezidentinin 10 aprel 2012-ci il tarixli, 2152 nömrəli Sərəncamı". e-qanun.az (azərb.). 10 aprel 2012. İstifadə tarixi: 22 iyun 2016.