Silez Universiteti
Silez Universiteti (pol. Uniwersytet Śląski w Katowicach, UŚ) — Polşada universitet; İKT üzrə ixtisaslaşmış müasir ali məktəblərdən biri.
| Silez Universiteti | |
|---|---|
| 50°15′26″ şm. e. 19°01′41″ ş. u. | |
| Əsası qoyulub | 1968 |
| Tip | dövlət universiteti |
| Ölkə | |
| Ünvan | Polşa, Katovitsa şəhəri |
| Vikianbarda əlaqəli mediafayllar | |
Tarixi və fəaliyyəti
1968-ci ildə Katovitsada təsis edilmiş Silez Universiteti Polşanın ən böyük dövlət ali məktəblərindən biridir və Yuxarı Sileziya regionunda ən böyük universitetdir. Universitetin strukturunu tələbələrə 53 istiqamət və 160-dan artıq ixtisas, həmçinin 8 ingilis dilli təlim üzrə təhsil təklif edən 12 fakültə və 5 beynəlxalq fakültə vahidi təşkil edir. Ali məktəbdə bakalavriatura, magistratura və aspirantura təhsil pillələri, diplomdan sonrakı təhsil, ixtisasın artırılmasının kursları fəaliyyət göstərir.
Universitetin əsas fakültələri: informatika və materialşünaslıq, Kristof Kislovski adına radio və televiziya, riyaziyyat, fizika və kimya, təbiətşünaslıq, biologiya və ətraf mühitin mühafizəsi, etnologiya, filologiya, sosiologiya, incəsənət, pedaqogika və psixologiya, hüquq və idarə etmə və ilahiyyat.
Hazırda bu ali təhsil ocağında təqribən 40 000 tələbə təhsil alır.
Təhsil haqqı
Silez Universitetinin qəbul komissiyası may ayından sentyabr ayına qədər fəaliyyət göstərir. Sənədlər elektron formada qəbul edilir ki, bu da əcnəbi abituriyentlər üçün çox rahatdır. Sonra sənədlərin Polşa dilinə tərcümə edilmiş və notarial qaydada təsdiqlənmiş orijinal formalarını təqdim etmək lazımdır.
Silez Universitetində xarici tələbələ üçün illik təhsil haqqı 2000-4000 avro arasında dəyişir.
Məlumat üçün bildirək ki, 2013/2014-ci tədris ilində Avropa ittifaqına daxil olmayan ölkələrdən abituriyentlər Silez Universitetində pulsuz təhsil ala biləcəklər. Belə ki, ali məktəb bakalavriatura və magistratura proqramlarını ehtiva edən müxtəlif ixtisas istiqamətləri üzrə 201 ödənişsiz yer təklif edir. Təlim Polşa dilində keçirilir. Ali məktəbə daxil olma müsabiqə əsasında həyata keçirilir. Müsabiqədə abituriyentin orta təhsil şəhadətnaməsində və ya bakalavr diplomundakı qiymətlər və Polşa dili biliyini nəzərə alınacaq. Qeyd edək ki, müsabiqə 2013-cü ilin may ayında başlayacaq.
Universitet şəhərcikləri
Silez universitetinin yataqxanaları üç şəhərdə inşa edilib: Katovitsa, Sosnovts və Teşin.
Katovitsada akademiya şəhərciyi mənzərəli Liqota rayonunun park-meşə zonası yaxınlığında yerləşir. Burada üç yataqxana və infrastruktur obyektlər istifadəyə verilib: tennis kortu, trenajor zalı, kseroks-xidmətlər, “Straşnıy dvor” tələbə klubu, “Panorama” barı, ərzaq mağazaları. Hər yataqxanada idman zalı var.
Poqon rayonundakı Sosnovts akademiya şəhərciyi dörd yataqxanadan ibarətdir. Burada informatika və materialşünaslıq fakültəsinin tədris korpusu, həmçinin yaxınlıqda filolologiya fakültəsinin (xarici dillər bölməsi) binası istifadəyə verilib. Akademiya şəhərciyinin ərazisində tələbə yeməkxanası, tələbə klubu, bərbərxana, kseroks-xidmətlər, taksi dispetçer otağı fəaliyyət göstərir.
Teşindəki akademik universitet şəhərciyinin tərkibinə üç yataqxana, tədris korpusları, idman obyektləri, tələbə yeməkxanası və “Panoptikum” tələbə klubunu daxildir.
Katovitsa şəhərciyi 1300, Teşin və Sosnovts isə 1460 yerə malikdir. Aspirantlar üçün mehmanxana nömrələri və yataqxanalarla birlikdə Silez Universitetinin yaşayış fondu 3000 yer təşkil edir. Hər otaq internetlə təmin edilib, yataqxanalarda televiziyaya baxış üçün xüsusi otaqlar var. Yataqxanalarda yaşayış üçün ödəniş haqqı otağın ölçülərindən asılıdır, aylıq ödəniş 234-474 Polşa zlotısı (100 Polşa zlotısı təqribən 25 AZN təşkil edir) arasında dəyişir.
Tələbə həyatı
Universitetdə təkcə uğurlu təhsil və elmi-tədqiqat fəaliyyəti üçün yüksək şərait yaradılmayıb, həmçinin tələbələrin idman və bədii özfəaliyyətlə məşğul olmasına dəstək verilir. Ali məktəbdə 179 həvəskar dərnək, “Harmoniya” akademik xoru, “Katovitsa” tələbə mahnı və rəqs ansamblı, “Eqida” tələbə radiosu və akademik idman cəmiyyəti yaradılıb. “Eqida” radiosunun işində radio jurnalistikası sahəsində özünü sınamaq istəyən tələbələr iştirak edə bilərlər. Akademik idman cəmiyyətinin üzvü olmaqla tələbələr hovuzlardan və trenajor zallarından pulsuz istifadə edirlər.
Əlil tələbələrə yardım
Universitet binalarının əksəriyyətində fiziki qüsurlu tələbələr üçün də əlverişli şərait yaradılıb. Əlil tələbələr karyera üzrə şəxsi köməkçinin, surdo-tərcüməçinin, psixoloqun və konsultantın dəstəyindən istifadə edə, təhsilə kömək edən multimedia avadanlığını icarəyə götürə bilərlər. Həmçinin yataqxana otaqlarında əlillərin rahatlığı təmin edilib.
Karyeranın inkişafı
Tələbələr üçün ali təhsil müəssisəsində Karyera bürosu yaradılıb. Büro onlara təcrübə qazanmağa və əlverişli iş yeri tapmağa kömək edir. Burada işə düzəltmə üçün kursları, seminarlar və təlimlər təşkil edir. Universitetdə əhəmiyyətli qərarların qəbulunda aktiv iştirak edən güclü tələbə özünüidarəetmə təşkilatı fəaliyyət göstərir. Xüsusilə aktiv tələbələr üçün təşkilatda iştirak karyerada başlanğıc və lider və təşkilatçılıq qabiliyyətlərinin inkişafı üçün məktəb rolunu oynayır.
Beynəlxalq əlaqələr
Beynəlxalq əməkdaşlıq ali təhsil ocağının fəaliyyətində prioritet ealn etdiyi sahələrdən biridir. Universitet dünyanın 36 ölkəsində yerləşən 500-dən artıq ali məktəb ilə əməkdaşlıq müqaviləsi imzalayıb. Erasmus proqramı çərçivəsində Silez Universitetinin bütün tələbələri 3-12 ay boyunca Avropa ölkələrində təhsil ala bilərlər. Ali məktəbdə yerli tələbələrlə yanaşı Avropa ittifaqı ölkələri, Belarus, Ukrayna, Rusiya, Gürcüstan, Qazaxıstan, Monqolustan və Çindən olan tələbələr oxuyurlar. Universitetin məzunları Avropa nümunəsi diplomu alırlar ki, bu da Avropa ittifaqının bütün ölkələrində tanınır.
Dil kursları
Silez Universitetində tədris əsasən Polşa dilində aparılır, buna görə də vacibdir ki, əcnəbi tələbə bu dili mühazirə və seminar materiallarını mənimsəməyə imkan verən səviyyədə öyrənsin. Universitetdə Polşa dilinin öyrədilməsi məqsədilə Polşa dili və mədəniyyəti Məktəbi yaradılıb. Burada fərdi və qrup şəkildə dilin bütün səviyyələri üzrə kurslar keçirilir.
Məktəbdə Polşa dili üzrə aylıq və semestr kursları, fərdi kurslar, Polşa dilinin illik intensiv kursu, Polşada təhsil almağı planlaşdıran əcnəbilər üçün Polşa dili kursu, “Polşa dili xarici dil kimi” Dövlət sertifikatına imtahana hazırlıq üzrə kurslar təşkil edilir.
Silez Universitetinin əcnəbi tələbələri dil kursları üçün ödənişdən azad olunurlar. Dövlət sertifikatı üzrə imtahana hazırlayan kurs ödənişlidir.
Kitabxana
Silez Universiteti regionda ən böyük ənənəvi və elektron resurslarla təchiz edilmiş müasir kitabxana şəbəkəsinə malikdir. Katovitsada 1 milyondan artıq nəşrin daxil olduğu mərkəzi kitabxana yaradılıb. Bundan əlavə, hər fakültə konkret ixtisaslar üzrə ədəbiyyatı ehtiva edən şəxsi kitabxanaya malikdir.
Mənbə
- Cahangir Atakişiyev. "Rabitə dünyası" qəzeti. № 15 (762), 26 aprel 2013, səh. 33. (azərb.)