Rəna Əliyeva
Əliyeva Rəna Qurban qızı (21 yanvar 1948, Bakı) — Əməkdar elm xadimi, Əməkdar həkim. Tibb elmləri doktoru. Azərbaycan Stomatoloqlar Assosiasiyasının (ASA) prezidenti. Azərbaycan Tibb Universitetinin uşaq stomatologiyası kafedrasının müdiri, Azərbaycan Tibb Universitetinin Elmi Şurası, Stomatologiya fakültəsinin Elmi Şurası, Dissertasiya Şurasının üzvüdür.
| Rəna Əliyeva | |
|---|---|
| Əliyeva Rəna Qurban qızı | |
| Doğum tarixi | |
| Doğum yeri | Bakı, Azərbaycan SSR, SSRİ |
| Vətəndaşlığı | SSRİ → Azərbaycan |
| Həyat yoldaşları | Yaşar Əliyev |
| Uşağı | qızı: Səbinə Əliyeva |
| Elm sahəsi | tibb |
| Elmi dərəcəsi | professor |
| Elmi adı | tibb elmləri doktoru |
| İş yeri | Azərbaycan Dövlət Tibb Universiteti |
| Təhsili | ali |
| Mükafatları | |
Həyatı
Əliyeva Rəna Qurban qızı 21 yanvar 1948-ci ildə Azərbaycan Respublikasının paytaxtı Bakı şəhərində anadan olmuşdur. 1966-cı ildə Bakı şəhəri 8 №-li orta məktəbi medalla bitirmiş, N. Nərimanov adına Azərbaycan Dövlət Tibb İnstitutunun stomatologiya fakültəsinə daxil olmuşdur. İnstitutun Elmi Şurasının qərarı ilə 1971-ci ildə Azərbaycan Tibb İnstitutunun cərrahi stomatologiya kafedrasına klinik ordinaturaya göndərilmişdir. 1973-cü ildə Ə. Əliyev adına Azərbaycan Dövlət Həkimlərin Təkmilləşdirmə İnstitutunun stomatologiya kafedrasına işə qəbul edilmiş, ardıcıl olaraq baş laborant vəzifəsindən dosent vəzifəsinə kimi yüksəlmişdir.
Elmi fəaliyyəti
1991-ci ildə R. Əliyeva Moskva şəhərində, SSRİ Səhiyyə Nazirliyinin Mərkəzi Elmi Tədqiqat Stomatologiya İnstitutunda "Üz-çənə nahiyəsinin fleqmonası olan xəstələrdə böyrəküstü, mədəaltı və qalxanabənzər vəzilərin funksional vəziyyəti" mövzusunda dissertasiyasını böyük uğurla müdafiə etmiş (elmi məsləhətçilər: SSRİ Tibb Elmləri Akademiyasının müxbir üzvü, tibb elmləri doktoru, professor N. N. Bajanov və SSRİ Tibb Elmləri Akademiyasının həqiqi üzvü, tibb elmləri doktoru, professor İ. İ. Dedov) və tibb elmləri namizədi elmi dərəcəsini almışdır. Sonra, 1998-ci illərə qədər R. Əliyeva əmək fəaliyyətini Ə. Əliyev adına Azərbaycan Dövlət Həkimlərin Təkmilləşdirmə İnstitutunda davam etmişdir.
Bu tədqiqatların nəticəsi olaraq 2001-ci il tarixində Moskva şəhərində Rusiya Federasiyası Səhiyyə Nazirliyinin Mərkəzi Elmi Tədqiqat Stomatologiya İnstitutunda tibb elmləri doktoru alimlik dərəcəsi almaq üçün "Azərbaycan Respublikasının uşaq əhalisinə stomatoloji xidmətin optimal inkişaf modelinin işlənib hazırlanması" mövzusunda dissertasiya müdafiə etmişdir (elmi məsləhətçi — Rusiya Tibb Elmləri Akademiyasının həqiqi üzvü, professor A. K. Leontiyev). R. Əliyeva 6 dərslik, 10 dərs vəsaiti daxil olmaqla 50-dən çox elmi əsərin müəllifidir, əsərləri dünyanın müxtəlif ölkələrində nəşr edilmişdir.
Əmək fəaliyyəti
1998-ci il aprel ayında R. Əliyeva Azərbaycan Tibb Universitetinin uşaq stomatologiyası kafedrasının müdiri vəzifəsinə seçilərək bu günə qədər həmin kafedraya rəhbərlik edir. R. Əliyeva Azərbaycan Tibb Universitetinin Elmi Şurası, Stomatologiya fakültəsinin Elmi Şurası, Dissertasiya Şurasının üzvüdür. R. Əliyeva gənc mütəxəssislərin, eləcə də elmi və praktiki kadrların hazırlanmasına da böyük diqqət yetirir. Onun rəhbərliyi altında 8 namizədlik dissertasiyası tamamlanmış, hazırda isə 2 doktorluq və 4 magistr dissertasiyası icra olunur. YAP Qadınlar Şurasının İdarə Heyətinin üzvüdür
R. Əliyeva geniş diapozona malik olan bir elm adamı olaraq, 2005-ci ildə Beynəlxalq İnformasiyalaşdırma Akademiyasının (Kanada, Monreal), 2007-ci ildə isə ABŞ-ın Beynəlxalq Stomatologiya Akademiyasının (Academy of Dentistry International, USA) üzvü seçilmişdir.
1997-ci ildən etibarən Azərbaycan Stomatoloqlar Assosiasiyasının (ASA) prezidenti, Cənubi Qafqaz və Azərbaycanda "Qafqazın Stomatoloji yenilikləri" ("Вестник Стоматологии Кавказа") adlı ilk tibbi beynəlxalq jurnalının təsisçisi və baş redaktorudur.
R. Əliyeva Rusiyanın "Маэстро стоматологии", Özbəkistanın "Стоматология" jurnallarının redaksiya heyətinin üzvüdür.
Rəhbərlik etdiyi Azərbaycan Stomatoloqlar Assosiasiyası tərəfindən stomatologiyanın aktual problemlərini əks etdirən 20-dən çox beynəlxalq konfrans və simpozium təşkil edilmiş və keçirilmişdir. Azərbaycan Stomatoloqlar Assosiasiyası 20 ildir ki Dünya Stomatoloqlar Federasiyasının (FDI) üzvü, 2003-cü ildən etibarən Avropa Regional Təşkilatının (ERO) üzvüdür. R. Əliyeva bu illər ərzində Dünya Stomatoloqlar Federasiyasının, Avropa Regional Təşkilatının, Rusiyanın Stomatoloji Assosiasiyasının, Türkiyə, Qazaxıstan, Özbəkistan, Gürcüstan və digər ölkələrin assosiasiyalarının konqreslərində iştirak edərək Azərbaycan stomatologiyasını beynəlxalq səviyyədə layiqincə təmsil etmişdir.
Mükafatları
Uzun illər əmək fəaliyyəti və Azərbaycan səhiyyəsinin inkişafındakı xidmətlərinə görə, Azərbaycan Respublikasının Prezidenti İlham Əliyevin fərmanı ilə R. Əliyeva "Əməkdar elm xadimi" və "Əməkdar həkim" adına layiq görülmüş, "Fədakar əməyə görə" medal və Səhiyyə Nazirliyinin Fəxri Fərmanı ilə təltif edilmişdir.
Ailəsi
- Yaşar Əliyev (Həyat yoldaşı) — Azərbaycan Milli Məclisinin I və II çağırış üzvü; Azərbaycan Milli Məclisinin sədr müavini (1995–2002), Azərbaycan Ali Sovetinin sədr müavini (1994–1995), Azərbaycanın Çində (2002–2011), Vyetnam, Cənubi Koreya, Şimali Koreya və Monqolustanda (2004–2011) olan Fövqəladə və Səlahiyyətli Səfiri.
- Səbinə Əliyeva (Qızı) — 1980-ci ildən anadan olub. Bakı Dövlət Universitetini bitirib. İxtisasca hüquqşünasdır. 2019-cu ildən Azərbaycanın İnsan Haqları üzrə Ombudsmanıdır.
- Rüfət Əliyev (Oğlu) — 1973-cü ildən anadan olun. Azərbaycan Tibb Universitetini bitirib. Tibb xidməti üzrə DTX zabitidir. 2015-ci ildən "Vətən uğrunda" medalı ilə təltif edilib.
Həmçinin bax
İstinadlar
- "Kafedra müdiri, professor Rəna Əliyeva". 2021-12-17 tarixində . İstifadə tarixi: 2021-12-17.
- "YAP Qadınlar Şurasının İdarə Heyətindəki 24 tanınmış xanım". 2021-12-17 tarixində . İstifadə tarixi: 2021-12-17.
- "Azərbaycan Tibb Universitetinin əməkdaşlarına fəxri adların verilməsi haqqında Azərbaycan Respublikası Prezidentinin Sərəncamı". 2021-12-17 tarixində . İstifadə tarixi: 2021-12-17.