Fuad Bağırov

Fuad Allahverdi oğlu Bağırov (3 noyabr 1991; Şirvan, Azərbaycan — 1 fevral 2022; Alagöllər, Kəlbəcər rayonu, Azərbaycan) — Azərbaycan Silahlı Qüvvələrinin baş leytenantı, Vətən müharibəsi iştirakçısı, şəhid.

Fuad Bağırov
Şəxsi məlumatlar
Doğum tarixi	3 noyabr 1991
Doğum yeri	Şirvan, Azərbaycan
Vəfat tarixi	1 fevral 2022 (30 yaşında)
Vəfat yeri	Alagöllər, Kəlbəcər rayonu, Azərbaycan
Dəfn yeri	Şirvan Şəhidlər Xiyabanı
Vətəndaşlığı	Azərbaycan
Atası	Allahverdi Bağırov
Təhsili	Heydər Əliyev adına Azərbaycan Ali Hərbi Məktəbi
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2009—2022
Rütbə	Baş leytenant
Döyüşlər	Aprel döyüşləri Vətən müharibəsi  • Murovdağ döyüşləri
Təltifləri	2022 2020

Həyatı

Fuad Bağırov 3 noyabr 1991-ci ildə Şirvan şəhərində anadan olmuşdur. 1998-2009-cu illərdə Mübariz İsrayılov adına Şirvan şəhər 18 nömrəli tam orta məktəbdə, 2009-2013-cü illərdə Heydər Əliyev adına Azərbaycan Ali Hərbi Məktəbində təhsil almışdır. Ailəli idi, 1 oğul və 1 qızı yadigar qaldı.

Hərbi xidməti

Fuad Bağırov 2013-cü ildə "leytenant" rütbəsində Azərbaycan Silahlı Qüvvələrinin sıralarında xidmətə başlamışdır.

Aprel döyüşləri

  Əsas məqalə: Aprel döyüşləri

2016-cı il aprelin 1-dən 2-nə ötən gecədən başlayaraq Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başlamışdır. Tarixə Aprel döyüşləri olaraq yazılan döyüşlər zamanı Fuad Bağırov zabit olaraq döyüşlərdə iştirak etmişdir. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunmuşdur. Həmin döyüşlərdə Ermənistanın müdafiə naziri Seyran Ohanyan tərəfindən qurulan və Ermənistan Ordusunun "yenilməz Ohanyan xətti" olaraq tanınan müdafiə xətti 40 dəqiqə ərzində darmadağın edilmişdir.

Müharibədən sonra Fuad Bağırov qısa zamanda "baş leytenant" rütbəsinə yüksəlmişdir.

Azərbaycan Ordusunun baş leytenantı olan Fuad Bağırov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində rabitəçi olaraq iştirak etmişdir. Murovdağın azadlığı uğrunda gedən döyüşlərdə vuruşmuşdur.

Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Fuad Bağırov "Kəlbəcərin azad olunmasına görə" medalı ilə təltif edildi.

Fuad Bağırov müharibədən sonra Kəlbəcər rayonunda yerləşən "N" saylı hərbi hissədə xidmətinə davam etmişdir.

29 yanvar 2022-ci ildə Kəlbəcər rayonunun Alagöllər sahəsində hava şəraitinin qəfil dəyişməsi və çovğun səbəbindən 3 hərbi qulluqçu ilə birgə itkin düşən Fuad Bağırov 3 gün müddətində axtarılmış, onun axtarışı aidiyyəti qurumlar tərəfindən davam etdirilmişdir. Onun nəşi 31 yanvar 2022-ci ildə tapılmış və ertəsi gün Şirvan Şəhidlər Xiyabanında dəfn edilmişdir. Müdafiə Nazirliyinin Mətbuat Xidmətinin rəisi Anar Eyvazov Fuad Bağırova şəhid statusunun verildiyini açıqlamışdır.

Azərbaycan Respublikasının müstəqilliyinin, ərazi bütövlüyünün qorunub saxlanılmasında xüsusi xidmətlərinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiyinə görə Azərbaycan Prezidenti İlham Əliyevin 25.06.2022-ci il tarixli Sərəncamına əsasən Fuad Bağırov ölümündən sonra "Vətən uğrunda" medalı ilə təltif edildi.

Təltifləri

•   (26.06.2013) — "Azərbaycan Silahlı Qüvvələrinin 95 illiyi" yubiley medalı
•   (26.06.2018) — "Azərbaycan Ordusunun 100 illiyi" yubiley medalı
•   (29.12.2020) — "Kəlbəcərin azad olunmasına görə" medalı
•   (25.06.2022) — "Vətən uğrunda" medalı (ölümündən sonra)

İstinadlar

1. "Azərbaycan Silahlı Qüvvələrinin hərbi qulluqçularının "Kəlbəcərin azad olunmasına görə" medalı ilə təltif edilməsi haqqında Azərbaycan Prezidentinin 29.12.2020-ci il tarixli Sərəncamı". 29.12.2020. 2020-12-29 tarixində . İstifadə tarixi: 29.12.2020.
2. Müdafiə Nazirliyi. "Kəlbəcər istiqamətində hərbi qulluqçumuzun axtarışı davam etdirilir". www.mod.gov.az (az.). 29.01.2022. 2022-02-01 tarixində arxivləşdirilib. İstifadə tarixi: 01.02.2022.
3. Müdafiə Nazirliyi. "Kəlbəcər istiqamətində yolu azan hərbi qulluqçumuzun axtarışı davam edir - VİDEO". www.mod.gov.az (az.). 31.01.2022. 2022-02-01 tarixində arxivləşdirilib. İstifadə tarixi: 01.02.2022.
4. ATV. "Şəhid Fuad Bağırovun həyat yolu" (az.). Youtube.com. 03.11.2022. 2022-11-04 tarixində . İstifadə tarixi: 2022-11-04.
5. Azərbaycan Prezidentinin rəsmi saytı. "Azərbaycan Respublikası Müdafiə Nazirliyinin hərbi qulluqçularının təltif edilməsi haqqında Azərbaycan Respublikası Prezidentinin Sərəncamı". www.president.az (az.). 25.06.2022. 2022-06-25 tarixində arxivləşdirilib. İstifadə tarixi: 25.06.2022.
6. "Azərbaycan Silahlı Qüvvələrinin hərbi qulluqçularının "Kəlbəcərin azad olunmasına görə" medalı ilə təltif edilməsi haqqında Azərbaycan Prezidentinin 29.12.2020-ci il tarixli Sərəncamı". e-qanun.az. 29.12.2020. 2021-01-18 tarixində arxivləşdirilib. İstifadə tarixi: 29.12.2020.
7. Azərbaycan Prezidentinin rəsmi saytı. "Azərbaycan Respublikası Müdafiə Nazirliyinin hərbi qulluqçularının təltif edilməsi haqqında Azərbaycan Respublikası Prezidentinin Sərəncamı". www.president.az (az.). 25.06.2022. 2022-06-25 tarixində arxivləşdirilib. İstifadə tarixi: 25.06.2022.