İradə Hüseynova (tarixçi)

Vikipediyada bu ad-soyadlı digər şəxslər haqqında da məqalələr var; bax: İradə Hüseynova.

İradə Mehdiqulu qızı Hüseynova (19 aprel 1963(1963-04-19), Bakı) — Bakı Dövlət Universitetinin "Qafqaz xalqları tarixi" kafedrasının müdiri, "Erməni araşdırmaları" elmi-tədqiqat laboratoriyasının rəhbəri, tarix elmləri doktoru, professor, Elm, təhsil və innovasiyaların inkişafında xidmətlərinə görə Beynəlxalq "Sokrat" mükafatı laureatı (İngiltərə), Azərbaycan Respublikasının Əməkdar müəllimi. 2009–2011-ci illərdə Azərbaycan Respublikası Təhsil Nazirinin müavini vəzifəsində çalışıb."De-institusionalizasiya-dövlət müəssisələrindən uşaqların ailələrə verilməsi və alternativ qayğı" Dövlət Proqramının Respublika Əlaqələndirmə Şurasının sədri, milli koordinatoru, həmçinin "İnklüziv təhsil" Dövlət Proqramının Milli koordinatoru olmuşdur. Görkəmli dövlət və siyasi xadim, ümummilli lider Heydər Əliyev haqqında "Müstəqil Azərbaycan dövlətinin yaranması və möhkəmləndirilməsində Heydər Əliyevin rolu" adlı ilk doktorluq dissertasiyasının müəllifidir. Yeni Azərbaycan partiyasının Siyasi Şurasının üzvü (1999).

İradə Hüseynova
İradə Mehtiqulu qızı Hüseynova
Azərbaycan Respublikası Təhsil Nazirinin müavini 7 avqust 2002 — 11 sentyabr 2011
Şəxsi məlumatlar
Partiya	Yeni Azərbaycan Partiyası
Doğum tarixi	19 aprel 1963 (58 yaş)
Doğum yeri	Bakı, Azərbaycan SSR, SSRİ
Elmi fəaliyyəti
Elmi dərəcəsi	tarix elmləri doktoru
İş yeri	Bakı Dövlət Universiteti
Təltifləri

Həyatı

İradə Hüseynova Bakı şəhərində anadan olmuşdur. 1980-ci ildə Bakı şəhərinin 8 saylı orta məktəbini əla qiymətlərlə bitirmişdir. Həmin ildə Azərbaycan Dövlət Universitetinin tarix fakültəsinin əyani şöbəsinə daxil olmuşdur. Universitetdə oxuduğu müddət ərzində elmi cəmiyyətin fəaliyyətində, respublika və İttifaq səviyyəli ictimai-siyasi işlərdə fəal iştirak etmişdir. Müntəzəm olaraq Azərbaycan SSR və SSRİ Həmkarlar İttifaqı qurultaylarının nümayəndəsi, SSRİ Həmkarlar İttifaqının Mərkəzi Təftiş Komissiyasının, Rəyasət Heyətinin üzvü seçilmiş və 1982–1987-ci illər ərzində Azərbaycanı İttifaq səviyyəsində təmsil etmişdir.

O, 1985-ci ildə Azərbaycan Dövlət Universitetini fərqlənmə diplomu ilə bitirib. Elmi-pedaqoji fəaliyyətini davam etdirmək üçün Elmi Şuranın qərarı və Təhsil Nazirliyinin təyinatı ilə universitetdə saxlanılmışdır. Universitetdə kafedrada baş laborant, müəllim, baş müəllim, dosent, professor vəzifələrində çalışıb. Namizədlik və doktorluq dissertasiyalarını müdafiə etmişdir.

 Görkəmli dövlət və siyasi xadim, ümummilli lider Heydər Əliyev haqqında "Müstəqil Azərbaycan dövlətinin yaranması və möhkəmləndirilməsində Heydər Əliyevin rolu" adlı ilk doktorluq dissertasiyasının müəllifidir. Doktorluq dissertasiyasının müdafiəsi ilə elmin yeni istiqaməti — Əliyevşünaslıq elminin əsası qoyulmuşdur.

Hal-hazırda Bakı Dövlət Universitetinin "Qafqaz xalqları tarixi" kafedrasının müdiri, "Erməni araşdırmaları" laboratoriyasının rəhbəridir.

Əliyevşünas və qafqazşünas alim İradə xanım Hüseynova 300-ə yaxın elmi əsərin, o cümlədən 2018-ci ildə "The revolution of 1917 and the public –political, economic situation in Azerbaijan" adlı məqaləsi yüksək beynəlxalq reytinqli (Thomson Reuters. SNİP: 2.049, Impact factor: 1.145. 5-Yr impact factor: 2.075.) The American Historical Review Oxford University press. (2018 p. 1999–2017.) jurnalında çap edilmişdir. – Əliyevşünaslıq elminə dəyərli töhfələr olan "Dövlətçilik naminə" (Bakı, 2001), "Müstəqilliyimizin təminatçısı" (Bakı, 2003), "Müstəqil Azərbaycan dövlətinin qurucusu" (Bakı, 2004), "Гейдар Алиев – от политического руководителя к общенациональному лидеру" (Bakı, 2005), "Tarix.Zaman.Düşüncələr". I cild. (Bakı 2016) adlı monoqrafiyaların, Qafqazşünaslıq sahəsində — "Qafqaz xalqlarının tarixi" (Bakı, 2006); "Heydər Əliyev və Qafqazda sülh prosesi" (Bakı, 2008) adlı fundamental dərsliklərin, "Историческая энциклопедия Кавказа" (Bakı, 2010) ensiklopedik nəşrin, Qafqaz xalqlarının tarixinə dair ümumi kurs proqramlarının (Bakı, 1998; 2014), magistr hazırlığı üçün "Heydər Əliyev və Qafqazda sülh prosesi" (Azərbaycan, rus və ingilis dillərində, Bakı, 2003), "Qafqazşünaslığa giriş" (Bakı 2014), "Qafqazın siyasi sistemi" (Azərbaycan və rus dillərində, Bakı, 2016), "Qafqazın xarici siyasəti" (Azərbaycan və rus dillərində, Bakı, 2016), "Qafqaz və Yaxın Şərqin ərəb ölkələri" (Azərbaycan və rus dillərində, Bakı, 2016), "Qafqaz tarixinin aktual problemləri" (Bakı, 2017), magistr hazırlığı üçün "İlham Əliyev və müasir dövrdə Qafqazda əməkdaşlığın inkişafı" (Bakı, 2017) tədris proqramlarının, Qafqaz xalqlarının tarixinə dair dərs vəsaitlərinin müəllifidir.

Professor İradə Hüseynovanın monoqrafiyaları, o cümlədən "Историческая энциклопедия Кавказа" dünyanın 63 ölkəsinin aparıcı milli kitabxanalarına göndərilmiş, ABŞ, Rusiya, Yaponiya, Tayvan, Kanada, Misir, Avropa ölkələrindən onun kitablarını yenidən əldə etmək üçün sifarişlər, təkliflər gəlmişdir. Onun monoqrafiyaları və dərslikləri respublikamızın bir çox universitetlərində, həmçinin xarici ölkələrin — Almaniya, İngiltərə Rusiya və Gürcüstanın ali məktəblərində Qafqaz tarixinin tədrisi üçün əsas olmuşdur.

Professor İradə Hüseynovanın araşdırmaları ardıcıl surətdə Milli Elmlər Akademiyasının hesabatlarında mühüm elmi nəticə kimi qiymətləndirilmişdir.

İradə Hüseynova Azərbaycan elmini və təhsilini ABŞ, İtaliya, Fransa, Kanada, İsveç, İsveçrə, Rumıniya, Bolqarıstan, Rusiya, Türkiyə, Gürcüstan, Türkmənistan, Belarus, İsrail və s. ölkələrdə keçirilmiş bir çox beynəlxalq elmi simpozium və konfranslarda təmsil etmiş, orada məruzələrlə çıxışlar etmişdir. Məruzələri nüfuzlu elmi dərgilərdə dərc olunmuşdur. 7–8 oktyabr 2004-cü ildə keçirilən MDB dövlətlərinin yaradıcı ziyalılarının I Forumunun nümayəndəsi olmuşdur. Avropa Şurasının Strasburq şəhərində 6–7 dekabr 2001-ci il tarixində "Təhsildə demokratik və vətəndaşlıq prinsipləri" mövzusunda keçirilən beynəlxalq seminarda məruzə ilə çıxış etmişdir. 2007-ci ildə Avropa Komissiyası TEMPUS Fərdi Səfərlər Qrantının qalibi olmuş və TEMPUS Proqramı çərçivəsində elm və təhsil problemləri ilə bağlı İsveçdə keçirilən beynəlxalq konfransda elmi məruzə ilə çıxış etmişdir.

Rusiya Federasiyası Pedaqoji Akademiyasının, Nyu-York Elmlər Akademiyasının, Beynəlxalq Kadr Akademiyasının həqiqi üzvüdür.

Onun gənc elmi kadrların hazırlanmasında böyük xidmətləri vardır. İradə xanımın elmi rəhbərliyi ilə bir çox gənc alim elmi-tədqiqat işləri aparmış, fəlsəfə doktoru və elmlər doktoru adını almaq üçün dissertasiyalar müdafiə etmişdir, bu proses bu gün də əzmlə davam etdirilir.

İradə xanım ayrı-ayrı illərdə Azərbaycan Respublikasının Prezidenti yanında Ali Attestasiya Komissiyasının Ekspert Şurasının üzvü, Respublika Elmi-Metodiki Şuranın Rəyasət Heyətinin sədr müavini olmuşdur.

İradə Hüseynova 2006-cı ildə Azərbaycan Respublikasının Prezidenti İlham Əliyevin sərəncamları ilə Azərbaycan Respublikası – Belarus Respublikası Dövlətlərarası Komissiyasının, Azərbaycan Respublikasının Moskva şəhəri ilə əməkdaşlıq üzrə Hökumət Komissiyasının, 2007-ci ildə isə Azərbaycan Respublikası ilə Rusiya Federasiyasının Dağıstan Respublikası arasında iqtisadi və humanitar sahələrdə əməkdaşlıq üzrə hökumətlərarası komissiyasının üzvü təyin edilmişdir. Azərbaycan Respublikasının Prezidenti İlham Əliyevin 12 mart 2007-ci il tarixli sərəncamı ilə "Bioloji müxtəlifliyin genetik ehtiyatları üzrə" Dövlət Komissiyasının üzvü təyin edilmişdir.

 2009-cu il noyabrın 18-də AMEA-nın Respublika Elmi Tədqiqatların Təşkili və Əlaqələndirilməsi Şurasına üzv seçilmişdir. Professor İ.M.Hüseynova Azərbaycan Respublikasının Prezidenti yanında Ali Attestasiya Komissiyası tərəfindən dissertasiyaların əsas nəticələrinin dərc olunması tövsiyə edilən elmi nəşrlərin siyahısına daxil edilmiş "Tarix. İnsan. Cəmiyyət" elmi-metodiki jurnalının baş redaktoru olmuşdur.

İradə Hüseynova Bakı Dövlət Universiteti nəzdində elmlər doktoru və fəlsəfə doktoru elmi dərəcəsi almaq üçün Dissertasiya Şurasının, AMEA-nın Hüquq və İnsan Haqları İnstitutunun Elmi Şurasının, Respublika Elmi tədqiqatların təşkili və əlaqələndirilməsi Şurası Tarix üzrə Problem Şurasının, Tarix fakültəsi Elmi Şurasının üzvüdür. İradə xanım Azərbaycan Tarix Müəllimləri İctimai Birliyinin üzvüdür. O, "Dirçəliş – XXI əsr", "Journal of Qafqaz University" və Gürcüstanda nəşr olunan "Межкультурные коммуникации" adlı beynəlxalq elmi jurnalların redaksiya heyətinin üzvüdür.

İradə xanım Azərbaycan Respublikasının ictimai-siyasi və dövlətçilik həyatında hər zaman fəal iştirak etmişdir. Uzun illər məsul dövlət vəzifələrində işləmişdir. Belə ki, Azərbaycan Respublikasının Prezidenti Heydər Əliyevin 7 avqust 2002-ci il tarixli sərəncamı ilə Azərbaycan Respublikası təhsil nazirinin müavini təyin edilmiş və bu vəzifədə 2002–2011-ci illərdə çalışmışdır. Azərbaycan Respublikası təhsil nazirinin müavini işlədiyi zaman Azərbaycanın ali təhsil sisteminə, elm sahəsinə, Azərbaycan Respublikasında təhsilin idarə olunmasına, təhsilin strategiyasının müəyyənləşdirilməsinə, şagird nailiyyətlərinin qiymətləndirilməsinə, təhsildə İKT-nin tətbiqinə, təhsilin idarə olunmasında məlumat sisteminin yaradılmasına, xüsusi qayğıya ehtiyacı olan uşaqların təhsilinin təşkilinə, inklüziv təhsilə, təhsil sistemində gender məsələlərinin həllinə və s. kimi sahələrə rəhbərlik etmişdir.

O, "De-institusionalizasiya-dövlət müəssisələrindən uşaqların ailələrə verilməsi və alternativ qayğı" Dövlət Proqramının Respublika Əlaqələndirmə Şurasının sədri, milli koordinatoru olmuşdur. Həmçinin, "İnklüziv təhsil" Dövlət Proqramının Milli koordinatoru olmuşdur. Onun rəhbərliyi ilə bir çox beynəlxalq və respublika əhəmiyyətli elmi konfranslar, simpozium və seminarlar keçirilmiş, müntəzəm olaraq gənc alim və tədqiqatçıların, o cümlədən tələbələrin Respublika elmi-praktiki konfransları təşkil olunmuşdur. İradə xanım Azərbaycan Milli Elmlər Akademiyasının ümumi yığıncaqlarında — illik hesabatlarda ali təhsil elminin inkişafı ilə bağlı məruzələrlə çıxışlar etmişdir.

Eyni zamanda, o, BMT təşkilatlarının (YUNİSEF, YUNESKO,YUNİFEM), UAFA, World Vision, Save the children proqramlarının aktiv iştirakçısı olmuş, beynəlxalq təşkilatların müxtəlif diplom və sertifikatları ilə təltif olunmuşdur.

Fəaliyyətinin aktual və prioritet istiqamətlərindən biri də genderşünaslıq məsələlərini araşdırmaq olmuşdur. Hələ 1998-ci ilin fevral ayında Türkiyənin paytaxtı Ankara şəhərində Orta Doğu Texniki Universitetində İngiltərənin "Britiş Kounsl" təşkilatının Avropa Araşdırma və Tətbiq Mərkəzi ilə birgə "Gender inkişafda və qadın təhsili" proqramı çərçivəsində keçirilən beynəlxalq konfransda Azərbaycanı təmsil etmisdir. Eyni zamanda, bir neçə dəfə gender problemləri ilə bağlı ABŞ-ın Nyu-York şəhərində Azərbaycan nümayəndə heyətinin tərkibində iştirak etmiş, BMT-nin kürsüsündən qadın və kişilərin hüquqları, cəmiyyətdə yeri və rolu, təhsil sistemində gender problemləri ilə bağlı çıxışlar etmişdir.

Azərbaycan Respublikasının Prezidenti İlham Əliyevin sərəncamları ilə (9 yanvar 2007-ci il; 19 iyun 2008-ci il) Birləşmiş Millətlər Təşkilatının "Qadınlara münasibətdə ayrı-seçkiliyin bütün formalarının ləğv olunması haqqında" və "Uşaq hüquqları haqqında" Konvensiyalarına uyğun olaraq Azərbaycan Respublikasının öz öhdəliklərini yerinə yetirməsi ilə bağlı həyata keçirdiyi tədbirlər barədə dördüncü dövri hesabatlarının hazırlanması üzrə işçi qruplarının üzvü təyin olunmuşdur.

30 may — 2 iyun 2011-ci il tarixlərində Bakı şəhərində YUNESKO-nun Beynəlxalq Bioetika Komitəsinin 18-ci sessiyasının keçirilməsi üzrə işçi qrupunun üzvü olmuşdur.

O, elm və təhsil sahəsindəki nailiyyətlərinə görə 2008-ci ildə Azərbaycan Respublikasının Prezidenti İlham Əliyev tərəfindən "Əməkdar müəllim" fəxri adına layiq görülmüşdür.

2011-ci ilin iyun ayında elm, təhsil və innovasiyaların inkişafında xidmətlərinə görə İngiltərədə Oksford Universitetində Beynəlxalq "Sokrat" mükafatına layiq görülmüşdür.

Tarix, dövlətçilik, sosial-iqtisadi, siyasi, mədəni problemlərlə bağlı fəal çıxışlarına, səmərəli elmi yaradıcılığına görə "Azərbaycan bayrağı" və "Qızıl qələm" mükafatları ilə təltif edilmişdir.

2012-ci il 2–5 sentyabr, 2013-cü il 19–21 noyabr tarixlərində YUNESKO-nun VIII və IX Bioetika, tibbi hüquq, insan hüquqları ilə bağlı beynəlxalq elmi konfranslarında geniş elmi məruzə ilə çıxış etmiş, xüsusi diplom və sertifikatlarla təltif olunmuşdur.

31 oktyabr-1 noyabr 2013-cü il, 4–5 oktyabr 2014-cü il tarixlərində III və IV Bakı Beynəlxalq Humanitar Forumlarında iştirak etmiş və məruzə ilə çıxış etmişdir.

2014-cü il 10–11 noyabr tarixində keçirilən I Bakı Elm Festivalında "Multikulturalizm müstəqil Azərbaycan Respublikasının dövlət siyasətinin prioritet istiqaməti kimi" mövzusunda geniş məruzə ilə çıxış etmişdir.

2014-cü il 19 dekabrda keçirilən Azərbaycan alimlərinin I Qurultayının nümayəndəsi olmuşdur.

Elmi əsərləri ilə bağlı Azərbaycan Respublikası Müəllif Hüquqları Agentliyi tərəfindən verilmiş doqquz müəlliflik şəhadətnaməsi var.

Professor İ.M.Hüseynovanın 2000-ci ildə proporsional sistem üzrə Milli Məclisə seçkilərdə namizədliyi irəli sürülmüşdür. O, hakim partiyanın — Yeni Azərbaycan Partiyasının I–V qurultaylarının müntəzəm olaraq nümayəndəsi olmuşdur. YAP-ın I qurultayından etibarən hal-hazıradək partiyanın ali rəhbər orqanı olan Siyasi Şuranın üzvüdür. Həmçinin, Bakı Dövlət Universitetində YAP Qadınlar Şurasının sədridir. 2014-cü ilin fevral ayında YAP-ın Humanitar məsələlər üzrə komissiyasının sədr müavini, 2014-cü ilin may ayında isə Respublika üzrə YAP Qadınlar Şurasının və İdarə Heyətinin üzvü seçilmişdir.

4 aprel 2015-ci ildə YUNESKO xətti ilə Müəllimlərin Beynəlxalq Forumuna üzv seçilmişdir.

16–28 iyun 2015-ci ildə Belarusun paytaxtı Minsk şəhərində keçirilən tarixçilərin beynəlxalq məktəbində iştirak etmiş, orada mühazirələr aparmışdır.

2015-ci il 24–25 sentyabr tarixlərində Sankt-Peterburq şəhərində keçirilən MDB Parlamentlərarası Assambleya Şurasının və MDB-yə üzv dövlətlərinin qərarı ilə Avrasiya Qadınlar Forumunun nümayəndəsi olmuş, orada çıxış etmiş və nüfüzlu beynəlxalq forumda Azərbaycanı layiqincə təmsil etmişdir.

2015-ci ildə Azərbaycan Yazıçılar Birliyinin üzvü seçilmişdir.

2015-ci ildə Heydər Əliyev irsini araşdıran ilk alim kimi, Azərbaycan Respublikasının dövlət müstəqilliyinin inkişafında, elmin, təhsilin inkişafında və elmi kadrların hazırlanmasında xidmətlərinə görə 15 iyun – Milli Qurtuluş Günü münasibətilə "Zamanla birgə" İctimai Birliyinin qərarı ilə Fəxri diploma layiq görülmüşdür. Həmin ildə ümummilli lider Heydər Əliyevin siyasi və dövlətçilik fəaliyyətinin ilk elmi tədqiqatçısı, Heydər Əliyev haqqında ilk doktorluq dissertasiyasının müəllifi kimi, həmçinin elm, təhsil və innovasiyaların inkişafındakı xidmətlərinə görə "Bizim lider" təşkilatının qərarı ilə Fəxri Diplomla təltif edilmişdir. 

Bakı Dövlət Universitetinin rektoru A.M.Məhərrəmovun 26–28 iyun 2016-cı il tarixli əmrinə əsasən, Moskva şəhərində "Beynəlxalq Əlillər Cəmiyyəti" İctimai Birliyi ilə Moskva Dövlət Humanitar-İqtisad Universitetinin birgə keçirdiyi tədbirdə iştirak və çıxış etmişdir.

Azərbaycan Kütləvi İnformasiya Vasitələri Həmkarlar İttifaqı (AzərKİVİHİ) Rəyasət Heyətinin qərarı ilə tarix elmləri doktoru, professor İradə Mehtiqulu qızı Hüseynova 2016-cı ildə "İlin alimi" fəxri adına layiq görülmüşdür.

27 dekabr 2016-cı ildə Azərbaycan Respublikasında tarix elminin və ali təhsil mədəniyyətinin inkişafında xidmətləri, yüksək şəxsi mədəniyyəti, vətəndaşlıq mövqeyi, milli təəssübkeşliyinə görə Azərbaycan Mədəniyyət Assosiasiyası tərəfindən Fəxri fərmanla təltif edilmişdir.

25 oktyabr 2017-ci il tarixdə Yeni Azərbaycan Partiyası yaranmasının 25-ci ildönümü münasibəti və partiyada fəal ictimai- siyasi fəaliyyətinə görə Fəxri Fərmanla təltif olunub.

26–29 sentyabr 2017-ci il tarixində Rusiya Federasiyasının Elmlər Akademiyasının Moskva şəhərində Ümumi Tarix İnstitunun və Moskva Dövlət Beynəlxalq Münasibətlər İnstitutunun (МГИМО) birgə təşkil etdiyi "Революция 1917 года и ее место в истории XX века" adlı Beylnəlxalq elmi konfransda Azərbaycanı yüksək səviyyədə təmsil edərək, maraqlı elmi məruzə ilə çıxış etmiş və elmi ictimaiyyətin böyük marağına səbəb olmuşdur. 

23–28 fevral 2018-ci il tarixlərində Xocalı soyqırımının 26 cı ildönümü münasibəti ilə Türkiyənin Trabzon şəhərində təşkil olunmuş silsilə tədbirlərdə, beynəlxalq elmi konfransda geniş məruzə ilə çıxış etmişdir . 

2018 fevral ayının 8-də Yeni Azərbaycan Partiyasının VI qurultayının nümayəndəsi olmuşdur. 

2018-ci il tarixdə Azərbaycan Respublikası Qadın və uşaq problemləri üzrə Dövlət Komitəsi tərəfindən səmərəli fəaliyyətinə görə Fəxri diplomla təltif edilmişdir. 

Eyni zamanda professor İradə Hüseynova 22 may 2018-ci il tarixdə Türkiyənin Ankara şəhərində fəaliyyət göstərən Türk Dünyası Araşdırmaları Beynəlxalq Elmlər Akademiyasının həqiqi üzvü seçilmiş və həmin akademiyanın Beynəlxalq Qızıl ulduz mükafatına layiq görülmüşdür. 

19–22 sentyabr 2018-ci il tarixdə professor İradə Hüseynova Rusiya Federasiyasının Federal yığıncağının Federasiya Şurasının və MDB dövlətlərinin Parlamentlərarası Assambleyasının təşkilatçılığı ilə II Avrasiya Qadınlar Forumunda iştirak etmişdir.

Professor İ.M.Hüseynova öz üzərində usanmadan işləyən, işinə böyük məsuliyyətlə yanaşan, ədalətli, obyektiv və səmimi insandır. O, böyük təcrübəyə malik, yüksək biliyi, mənəvi-əxlaqi keyfiyyətləri, zəngin intellektual potensialı, peşəkarlığı, vətənpərvərliyi, milli təəssübkeşliyi ilə seçilən tanınmış ictimai xadim, təhsil təşkilatçısı, dəyərli ziyalı, gözəl pedaqoq və görkəmli alim kimi Azərbaycan cəmiyyətində və elmində böyük hörmət, nüfuz qazanmışdır.

Ailəlidir, iki qizi, üç nəvəsi var.

Kitabları

• Qafqaz xalqlarının tarixinə dair ümumi kurs proqramının (Bakı, 1998), 25 s.
• Qafqaz xalqlarının tarixinə dair ümumi kurs proqramının (dərs vəsaiti) (Bakı, 1999), 86 s.
• "Dövlətçilik naminə" (Bakı, 2001), 287 s.,
• "Heydər Əliyev və Qafqazda sülh prosesi" (Bakı, 2003; Azərbaycan, rus və ingilis dillərində),110 s.
• "Müstəqilliyimizin təminatçısı" (Bakı, 2003), 504 s.
• "Müstəqil Azərbaycan dövlətinin qurucusu" (Bakı, 2004),472 s.
• "Гейдар Алиев – от политического руководителя к общенациональному лидеру" (Bakı, 2005), 504 s.
• "Qafqaz xalqlarının tarixi" (Bakı, 2006), 604 s.
• "Heydər Əliyev və Qafqazda sülh prosesi" (Bakı, 2008), 672 s.
• "Qafqaz tarixi ensiklopediyası"nın (Bakı, 2010), 956 s.
• Tarix.Zaman.Düşüncələr. (Bakı, 2016), 512 s.
• Qafqaz xalqlarının tarixinə dair ümumi kurs proqramlarının (Bakı, 1998; 2014),168 s.
• Введение в Кавказоведение. (Баку, 2014) 64 с.
• "Qafqazın siyasi sistemi" (Azərbaycan və rus dillərində, Bakı, 2016), 28 s.
• Политическая система стран Кавказа. Учебная программа для подготовки бакалавров. (Баку, 2016) 36 c.
• "Qafqazın xarici siyasəti" (Azərbaycan və rus dillərində, Bakı, 2016), 28 s.
• Внешняя политика Кавказа. Учебная программа для подготовки бакалавров. (Баку, 2016), 32 c.
• "Qafqaz və Yaxın Şərqin ərəb ölkələri" (Azərbaycan və rus dillərində, Bakı, 2016),16 s. 
•  Кавказ и aрабские страны Ближнего Востока. Учебная программа для подготовки бакалавров.(Баку, 2016), 20 с.
• "Актуальные проблемы истории народов Кавказа" (Баку, 2017), 25 s.
• Magistr hazırlığı üçün "İlham Əliyev və müasir dövrdə Qafqazda əməkdaşlığın inkişafı" tədris proqramı.(Bakı, 2017), 23 s.
• "История народов Кавказа" (с древнейших времен до наших дней), (Баку, 2018), 1248 с.

İstinadlar

1. "Azərbaycan qadınlarının bir qrupuna fəxri adların verilməsi haqqında Azərbaycan Respublikası Prezidentinin 25 sentyabr 2008-ci il tarixli, 3062 nömrəli Sərəncamı" (azərb.). e-qanun.az. 2008-09-25. 2020-04-08 tarixində . İstifadə tarixi: 2020-04-08.