Penza Dövlət Universiteti
Penza Dövlət Universiteti (rus. Пензенский государственный университет) — Rusiyada universitet; Zəngin İT infrastuktura malik, informasiya-kommunikasiya texnologiyalarının tədris prosesində geniş tətbiq olunduğu və İT ixtisaslarına xüsusi diqqət yetirildiyi ali təhsil müəssisələrindən biri.
| Penza Dövlət Universiteti | |
|---|---|
| 53°11′03″ şm. e. 44°59′59″ ş. u. | |
| Əsası qoyulub | 1943 |
| Tip | dövlət ali məktəbi |
| Ölkə | |
| Ünvan | Rusiya, Penza şəhəri |
| Vikianbarda əlaqəli mediafayllar | |
Tarixi və fəaliyyəti
Böyük Vətən müharibəsinin çətin illərində - 1943-cü ildə fəaliyyətə başlayan Penza Dövlət Universiteti sənaye institutundan klassik universitetə qədər böyük formalaşma və inkişaf yolu keçib. Universitet bu gün intellektual potensialın formalaşması, təmin edilməsi və regionun sosial-iqtisadi inkişafı baxımından Volqaboyu universitetləri sırasında ən böyük və çoxistiqamətli ali məktəblərdən biridir. Universitet dəfələrlə "Rusiyanın 100 ən yaxşı ali məktəbi" nominasiyası üzrə "Avropa keyfiyyəti" qızıl medalına layiq görülüb. Universitet və onun filiallarında 1500 professor-müəllim heyəti fəaliyyət göstərir, 20000 tələbə təhsil alır. Magistratura və doktorantura təhsil pilləsi üzrə yüksək ixtisaslı kadr hazırlığına xüsusi diqqət yetirilir.
Maddi-texniki təminatı
Universitetin Kuznets İnformasiya və İdarəetmə Texnologiyaları İnstitutu, Nijnelomov və Serdobsk filialları istifadəyə verilib.
Penza Dövlət Universiteti təxminən 28 hektar ərazidə yerləşir. Ali məktəbin tədris-laboratoriya binalarının ümumi ərazisi təxminən 107 min kv.m təşkil edir. Universitetdə tədris prosesin həyata keçirilməsi üçün 18 tədris korpusu inşa edilib. Bu korpuslarda mühazirə auditoriyaları, praktik məşğələlər üçün auditoriyalar, laboratoriyalar, elmi kitabxana (12 tədris korpusunda), qiraət zalları, 3 akt zalı, konfrans zalı, İ.İ Sprıqin adına botanika bağı yerləşir.
Bədən tərbiyəsi məşğuliyyətləri üçün "Temp" idman-mədəni mərkəzi, "Trud" idman-sağlamlıq kompleksi, idman zalları, xizək bazası, hovuz mövcuddur. Örtülü idman tikililərinin sahəsi təxminən 11 min kv.m təşkil edir.
Universitetdə 4 yeməkxana və bufet tələbələrin və işçilərin ixtiyarına verilib.
Bütün kompüter sinifləri və universitetin əməkdaşlarının iş yerləri korporativ hesablama şəbəkəsinə birləşdirilib, yüksək sürətli internetə çıxış var.
Tələbə yataqxanalarının ərazisi təxminən 23 min kv.m. təşkil edir. Universitetin tələbə şəhərciyinin tərkibinə 3200 yerlik 7 yataqxana korpusu daxildir. Tələbə şəhərciyində yaşamaq, sərbəst məşğuliyyətlər və istirahət, həmçinin dərsdənkənar, mədəni-kütləvi işlərin təşkili üçün lazımi şərait yaradılıb.
Tədris istiqamətləri
Hazırda Penzen Dövlət Universitetində 15 fakültə fəaliyyət göstərir: hesablama texnikası, cihazqayırma, informasiya texnologiyaları və sistemləri, elektroenergetika, nanotexnologiya və radioelektronika, fizika-riyaziyyat, təbiət elmləri, qiyabi təhsil, qiyabi pedaqoji təhsil, tarix-filologiya, maşınqayırma və nəqliyyat, əyani-qiyabi və distant təhsil, pedaqogika, psoxologiya və sosial elmlər, yüksək ixtisaslaşma və əlavə təhsil, bədən tərbiyəsi və idman, iqtisadiyyat və idarəetmə, hüquq.
Universitetin informasiya texnologiyaları sahəsi üzrə ixtisaslaşan 3 fakültəsi var.
Ali məktəbin əsas bölmələrindən biri hesab olunan hesablama texnikası fakültəsində kompüter texnikası, onun planlaşdırılması, istismarı, proqram təminatının hazırlanması və fəaliyyətin bütün sferalarında yeni informasiya texnologiyalarının tətbiqi, həmçinin idarəetmə sahəsində mütəxəssislərin hazırlığı həyata keçirilir. Burada informatika və hesablama texnikası, informasiya sistemi və texnologiya, proqram mühəndisliyi, tətbiqi informatika, riyazi təminat və informasiya sistemlərinin idarə edilməsi, sənədləşmə və arxivşünaslıq kafedraları yaradılıb.
Cihazqayırma, informasiya texnologiyaları və sistemləri texniki sistemlərdə idarəetmə, obyektlərin təhlükəsizliyi sistemlərinin informasiya idarəetmə kompleksi, mexatronik və robot texnikası, döyüş sursatı və partladıcı, xüsusi təşkilatı-texniki sistemlər, telekommunikasiya sistemlərinin informasiya təhlükəsizliyi, avtomatlaşdırılmış sistemlərin informasiya təhlükəsizliyi, cihazqayırma, informasiya - ölçü texnikası və texnologiyalar, standartlaşdırma və metrologiya sahələri üzrə kadrlar hazırlanır.
Elektroenergetika, nanotexnologiya və radioelektronika fakültəsinin tələbələri innovasiya texnikasının və texnologiyanın yaradılması üzrə Rusiyanın yüksəktexnologiyalı şirkətlərinin nüfuzlu hazırlamalarında bacarıqla iştirak edirlər. Fakültədə avtomatlaşdırılmış elektrik enerjisi sistemləri, radioaparaturanın qurulması və istehsalı, nano və mikroelektronika, radiotexnika və radio elektron sistemlər, texnosferna təhlükəsizlik, elektrotexnika və nəqliyyat elektrik avadanlığı kafedraları fəaliyyət göstərir.
Bunlarla yanaşı, universitetdə Tədrisdə İnnovasiya Texnologiyaları, Beynəlxalq Əməkdaşlıq, Tibb, Hərbi Tədris, V.Q.Belinski adına Pedaqoji institutları mövcuddur.
Mənbə
- Cahangir Atakişiyev. "Rabitə dünyası" qəzeti. № 38 (785), 4 oktyabr 2013, səh. 33. (azərb.)