Knut Hamsun

Knut Hamsun (norv. Knut Hamsun) və ya əsl adı Knud Pedersen (norv. Knud Pedersen; 4 avqust 1859(1859-08-04)^[…], Vågå^[d], Oppland^[d] və ya Lom^[d], Oppland^[d] – 19 fevral 1952(1952-02-19)^[…], Grimstad^[d], Aust-Agder^[d]) — Norveç yazıçısı, Ədəbiyyat üzrə Nobel mükafatı laureatı (1920) ("Əsrlərlə torpağa bağlılığını və patriarxal ənənəyə sadiqliyini qoruyub saxlayan" Norveç kəndlilərinin həyatından bəhs edən möhtəşəm əsəri -"Torpağın şirələri"nə görə").

Knut Hamsun
norv. Knut Hamsun
Doğum tarixi	4 avqust 1859(1859-08-04)^[…]
Doğum yeri	Vågå^[d], Oppland^[d], Norveç və ya Lom^[d], Oppland^[d], Norveç
Vəfat tarixi	19 fevral 1952(1952-02-19)^[…] (92 yaşında)
Vəfat yeri	Grimstad^[d], Aust-Agder^[d], Norveç
Vətəndaşlığı	Norveç
Fəaliyyəti	yazıçı, şair, roman yazıçısı, dramaturq, tənqidçi, yazıçı
Fəaliyyət illəri	1877–1949
Tanınmış əsərləri	Aclıq
hamsunsenteret.no/…​ (ing.)
Vikianbarda əlaqəli mediafayllar

Həyatı: erkən illər

Əsl adı və soyadı Knud Pedersendir. Norveçin mərkəzi hissəsində, yoxsul kəndli ailəsində doğulmuşdur. Knut üç yaşında olarkən ailələri Şimal Qütbünün 100 km.-də yerləşən Nurlan şəhərinə köçümüşdü. Atası qaynına məxsus Hamsund fermasını icarədar kimi işlədirdi. Kiçik yaşlarından kəndli əməyinin bütün çətinliklərinə alışan Knut da ədəbi təxəllüsünü həmin fermanın adından almışdır.

Lakin kənd idilliyası çox tez başa çatdı. Pedersen ailəsi qohumlarının borc asılılığına düşdü. Sərt, dindar adam olan dayısı Hans Olsen kiçik yaşlı muzdurunu – Knutu tez-tez döyür və ac saxlayırdı. Nəticədə o, evdən qaçmalı, yerini və işini mütəmadi dəyişməli olurdu. Səyyar ticarətçi, mağazada satıcı, çəkməçi işləmişdi. Belə şəraitdə hər hansı ardıcıl təhsildən söhbət gedə bilməzdi. Lakin təbiət bu kəndli oğluna yazmaq istedadı vermişdi. Ona görə də üzləşdiyi bütün məhrumiyyətlərə baxmayaraq 18 yaşında "Sirli adam" adlı ilk povestini (1877) çap etdirmişdi.

İlk əsərləri. “Aclıq”

1878-ci ildə Knut Hamsunun "Bürger" romanı işıq üzü görmüşdü. O, paytaxtı fəth etmək və ədəbi zəhmətinin qazancı ilə yaşamaq üçün 1878-ci ildə Nurlandakı bir tacirdən borc aldığı pulla Xristianiyaya (indiki Oslo) yollasnmışdı. Əziyyətlə üzləşsə də, qarşısına qoyduğu məqsədi gerçəkləşdirə bilməmişdi. Bir müddət yol fəhləsi kimi çalışdıqdan sonra bəxtini daha uzaqlarda - ABŞ-da sınamaq qərarına gəlmişdi. Burada da aclıq və ehtiyacın hər üzünü görmüş, uğursuzluğa düçar olmuş, xəstələnmişdi. 1884-cü ildə Rembrandtın məşhur tablosundakı "yolunu azmış oğul" kimi yenidən Norveçə qayıtmışdı.

Knut Hamsun daha bir dəfə (1886) okeanın o tayına üz tutmuş, Çikaqoda tramvay konduktoru, Dakotada muzdur işləmişdi. Amma yenə də Amerikanı fəth edə bilməyib məmləkətinə dönmüşdü. Kopenhagendə yazdığı son povestini Georq Brandesin qardaşı, yerli jurnallardan birinin redaktoru Edvard Brandesə göstərmişdi. Adı müəllifinin vəziyyətinə uyğun gələn "Aclıq" romanı (1890) həm jurnalda, həm də ayrıca kitab şəklində çap olunmuş və ədəbi sensassiyaya çevrilmişdi.

"Aclıq" romanında Knut Hamsun Skandinaviya nəsrində dəbdə olan tənqidi realizmdən və ədəbiyyatın vəzifəsini insan həyatının yaxşılaşdırılmasına xidmət kimi başa düşən yanlış təsəvvürlərdən imtina etmişdi. Bitkin süjeti olmayan povestdə Osloda yaşayan və yazıçılıq niyyətinə düşən bir gəncdən söhbət gedirdi. Bu gənc öz dahiliyinə inandığından aclıq və ehtiyac içərisində yaşamağı istək və iddiasından əl çəkməkdən daha üstün tutur. O, təkcə yemək deyil, insani ünsiyyət, seksual tələbat və özünüifadə ehtiyacı ilə də üzləşir. Bir sözlə, aclıq onun həyatının bütün sahələrini əhatə edir, onu hər cəhətdən yeyir, çökdürür.

Digər əsərləri

Hamsun "Misteriya" romanında (1892) insanın şüuraltı həyatına və subyektiv dünyasına, "Pan" (1895) romanında isə təbiətlə münasibətlərinə aydınlıq gətirməyə çalışmışdı. Müəllif Artur Şopenhauer, Eduard fon Hartman, Fridrix Nitsşe fəlsəfəsinə əsaslanan subyektiv nəsr konsepsiyasını yalnız bədii əsərlərində deyil, həm də "Qəlbin şüuraltı həyatı haqqında" essesində əsaslandırmışdı.

XIX əsrin son illərində o, dram yaradıcılığına da müraciət etmiş, filosofun həyatından bəhs edən "Hakimiyyətin qapısı önündə" (1895), "Həyat dramı" (1896) və "Axşam şəfəqi" (1898) dramatik trilogiyasını yazmışdı. Lakin tənqidçilərin fikrincə Hamsunun səhnə əsərləri xarakterlərin dərinliyi baxımından romanları ilə müqayisə olunmayacaq dərəcədə zəifdir. Müəllif gənclik illərində yazdığı şeirlərin çoxunu yandırsa da, 1904-cü ildə çıxan "Vəhşi xor" poetik məcmuəsi onun poeziya sahəsində də orijinal istedad sahibi olduğunu nümayiş etdirmişdir.

Yaradıcılıq təcrübəsi artdıqca Knut Hamsun personajların çoxluğu və hadisələrin mürəkkəbliyi ilə diqqəti çəkən mürəkkəb əsərlər yazmağa meyl göstərirdi. Onun "Əsrin övladları" (1913) və iki cildlik "Segefoss şəhəri" (1915) romanları bu qəbildən olan epik əsərlərindən idi.

Knut Hamsun milli ədəbiyyat tarixinə partiarxal Norveç həyatının tərənnümçüsü kimi daxil olmuşdu. O, sənayeləşmənin cəmiyyətə gətirdiyi yenilikləri yaxına buraxmaq istəmirdi. Xalqın həqiqi simasının yalnız kəndlərdə qorunduğu fikrini ardıcıl müdafiə edirdi. Bu əhvali-ruhiyyə yazıçının ən mühüm əsəri olan "Torpağın gücü" (1917) romanında yüksək sənətkarlıqla əks olunmuşdu. Hamsun torpağa və patriarxal ənənələrə bağlılığını qoruyub saxlayan sadə Norveç kəndlilərinin – İsak və İngerin həyatlarından böyük məhəbbətlə söz açmışdı.

İllər keçdikcə Hamsun yaradıcılığında bədbin, qaranlıq səhifələr çoxalmağa başlamışdı. "Qadınlar quyu başında" əsərində (1920) müəllif balaca bir dənizkənarı kəndin müasirləşmə sevdasına düşməsi və məhv olması prosesini təsvir etmişdi. İki cildlik "Son fəsil" romanında isə (1923) kənd sanatoriyasının ürəksıxan, kədərli tarixçəsi öz əksini tapmışdı.

Təbii ki, Hamsun rəngləri tündləşdirdikcə, tənqid də ona eyni sərtlik və inamsızlıqla yanaşırdı. Bütün bunlardan sarsılan müəllifin bir müddət psixoanaliz metodu ilə müalicə alması barəsində məlumatlar mövcuddur.

Knut Hamsunun 1927-1933-cü illərdə yaratdığı trilogiyanın ("Səfillər", "Avqust", "Həyat davam edir") əsas qəhrəmanı həyatda heç bir məqsəd və məramı olmayan Avqust adlı səfildir. "Dairə qapanır" adlı sonuncu romanında (1936) isə Hamsun ümumiyyətlə insan həyatının mənasızlığı qənaətinə gəlib çıxmışdı.

Şəxsi həyatı

1898-ci ildə Hamsun Berqliot Behlə evləndi. Lakin bu nigah cəmi 8 il sürdü. 1909-cu ildə o ikinci dəfə evlənir. Bu dəfə o aktrisa Mari Anderseni seçmişdi. Mari toydan sonra karyerasından imtina edərək ömrünü Hamsuna həsr etmişdi.

Bakıya səfəri: “Nağıllar ölkəsində”

1898-ci ildə Norveç Yazıçılar İttifaqından 1200 kron təqaüd alan Hamsun Rusiya, Azərbaycan və Osmanlı imperiyasını ziyarət etmişdi. Hamsun həyat yoldaşı Berqliotla birlikdə əvvəlcə Sankt- Peterburqa, oradan Moskvaya, Moskvadan isə Qafqaza gəlmişdi. Bu səyahətin nəticəsi olaraq yazıçı 1903-cü ildə “Nağıllar ölkəsində” və “Aypara ölkəsində” adlanan oçerklərini nəşr edir.

Hamsun Bakını belə gördü: “Səhər saat 7-nin yarısıdır. Bakı nəhəng ağ toz dumanına bürünmüşdür. Burada hər şey ya ağ, ya da bozdur. Əhəng tozu insanların, heyvanların, evlərin, pəncərələrin, parkda bitən azsaylı ağac və kolların üzərini örtüb. Hər yer adama qəribə gəlir, çünki ağdır. Mehmanxananın tozlu stolunun üstündə mən hərflər yazıram, lakin az müddət sonra onlar yenə toza qərq olub yoxa çıxır.

Nobel müxtəlif boyaqlar axtarıb tapır, ancaq bu lənətlənmiş Bakıda əhəng hər yeri o qədər ağardıb ki, adam ağlını itirər. Şəhəri 13 indiqo növü ilə boyamaq ağlagəlməz bir şeydir! Şəhəri al-əlvan etməyə heç Nobelin də imkanları çatmaz.

Şəhərin havasından kerosin qoxusu gəlir. Bu qoxu insanları hər yerdə, həm evlərdə, həm də küçələrdə təqib edir. Vərdiş etməyənlərdə bu qoxu öskürək yaradır. Kerosin küçədəki toza qarışır və külək əsəndə (külək isə burada həmişə əsir) kerosin hopmuş bu toz paltarlarda yağlı ləkələr qoyur.

Bakıda 125 minə yaxın əhali var, bura Xəzər dənizinin sahilində yerləşmiş ən mühüm ticarət şəhəridir. Daima vurnuxan müasir həyat və hər anbarın qarşısında uzanmış çoxsaylı dəvələr qəribə təəssürat doğurur. Biz Qara Şəhərə, kerosin şirkətlərinin iqamətgahına getməliydik. Bizi oraya iranlı aparır; şəhərdə əksər faytonçular iranlıdır, onlar faytonu əsl şeytan kimi sürürlər, bir kəlmə kəsməyə imkan da yoxdur, onlar bir xristianın “atlara rəhm edin” mənasında verdiyi işarələri başa düşmək istəmirlər. Ancaq bir şey qalır: sakit oturmaq və bir də- ekipajdan çıxmaq.

Biz Nobelin evinin yerini soruşduq - bu, ona oxşayır ki, Xristianiyada kral sarayının harada olduğunu soruşasan.”

Hamsunun həyat yoldaşı Berqlot isə rəfiqəsinə yazırdı: “Biz indi Avropanın ən şərqində, Xəzər dənizinin sahilində yerləşən şəhərdəyik. Burada kerosin və neft torpağın altından fontan vurur”.

Bakının iki sivilizasiyanın qovşağında yerləşməsini vurğulayan Hamsun bu barədə yazırdı:

“Bütün insanlar az-çox qeyri-adi görünən paltarlar geyinirlər; şəhər o qədər iranlıdır ki, artıq Avropa şəhəri olmaqdan çıxıb, lakin şəhər o dərəcədə avropalı qalıb ki, hələ iranlı olmayıb”.

Knut Hamsun İçərişəhər haqqında da yazmışdır: “Köhnə Bakının mərkəzində yerləşən qalanın divarları fars-bizans üslubunda ucaldılıb. Divarlar xanın sarayını və iki məscidi dövrələyib. Hazırda saray hərbi anbara çevrilib və içəri daxil olmaq üçün komendantın icazəsi zəruridir. İcazə üçün isə komendanta öz vizit vərəqimi göstərməliyəm, o isə məndə yoxdur. Vladiqafqazdakı kimi, burada da dostum Ventsel Hagelstamın vərəqindən yararlanmağa cəhd edirəm. Növbətçiyə üzərində “Fru Mariya Hagelstam” yazılmış kartı uzadıram, o, başını yırğalayır və pasportumu istəyir. Ürəyimdə “Tanrı, kömək et” söyləyib pasportumu uzadıram. Növbətçi hər iki sənədə baxır, adları müqayisə edir və ona elə gəlir ki, hərflər uyğundur. Sonra qapını döyəcləyir və sənədləri komendanta aparır. Bu saxtarakarlığın baş tutacağına elə də ümid bəsləmirdim. Növbətçi qayıdır, pasportumu qaytarır və gənc poruçiki hər şeyi göstərməsi üçün mənə qoşur. Xilas oldum. Tüfəngli kazak mənimlə poruçikin ardınca gəlir.

Poruçik deyir ki, Bakının son xanının 50 arvadı olub və ruslar 1806-cı ildə Bakını fəth edən zaman hamısını götürüb qaçıb. Bu Hüseynqulu xan Bakının fatehi general Sisianovu şəhər açarlarını ona təqdim etmək anında xəncərlə öldürtdürüb.

Burada 2 məscid də yerləşib və biz gözləyirdik ki, hansısa molla minarədən əzan verəcək, ancaq saat 12-dən keçsə də, molla gəlib çıxmadı. Bu barədə poruçikdən soruşanda, o, dərhal məscidin yaxınlığında əyləşmiş əmmaməli bir neçə qocanın üstünə qışqırdı, onlar poruçiki axır ki başa düşəndə isə başlarını yanlara yırğaladılar: molla xəstələnibmiş.

Biz Qız Qalasına da getmək istəyirdik, ancaq isti o qədər boğucuydu ki, bu niyyətimizdən daşındıq və parka yollandıq. Günəşdən bütün bitkilər yanmışdı, tozla örtülmüşdü. Mənzərə ağır təəssürat oyadırdı. Vur-tut bir neçə xırda akasiya, badam və əncir ağacına rast gəlinirdi”.

Vladiqafqazda, daha sonra isə Tiflisdə olan yazıçını Bakı təəccübləndirsə də, neft buruqlarında o proqress deyil, ətraf mühiti dağıdan çirk və şər görürdü. O yazırdı: “Amerika öz maşınlarının səs-küyü ilə buraya da müdaxilə etmişdir. Bir dəfə parslar məbədə gələndə (Atəşgah nəzərdə tutulur) ziyarətgahın yanında kerosin zavodu tikildiyini görürlər. Hücrələrdəki balaca günəşlər söndürülmüş, qaz şırnaqları isə zavoda istiqamətləndirilmişdi”.

Nobel mükafatı

İsveç Akademiyası 1920-ci ildə öz tarixində ilk dəfə konkret əsərə Nobel mükafatı vermişdi – Knut Hamsun "monumental "Torpağın şirələri" romanına görə" ədəbiyyat sahəsində laureat olmuşdu. Akademiyanın üzvü Harald Yerne bu əsəri "harada yaşamasından, hansı işi görməsindən asılı olmayaraq bütün insanların həqiqi həyat hekayəsi" kimi dəyərləndirmişdi. Knut Hamsun ənənəvi Nobel mühazirəsi ilə çıxış etməkdən boyun qaçırmışdı.

Mükafatın qonorarı ilə yazıçı Norveçin cənubunda özünə malikanə almışdı. O, burada təkcə yeni əsərlərini yazmırdı, həm də təsərrüfat işləri ilə məşğul olurdu.

 

Knut Hamsun (1929)

Nasizmə münasibəti

 

Knut Hamsun (1939, iyul)

Hamsunun gerilikçi, hətta mürtəce baxışları təkcə ədəbiyyata deyil, ictimai-siyasi həyat hadisələrinə münasibətdə də özünü aydın şəkildə büruzə verir. Knut Hamsun Almaniya və İtaliyada faşistlərin hakimiyyətə gəlməsini açıq şəkildə təqdir edən azsaylı Avropa intellektuallarından biri idi. Onun fikrincə, sovet ayısının və Britaniya buldoqunun pəncəsindən xilas olmaq üçün Norveçin yeganə xilas yolu Hitlerlə müttəfiqlikdən keçirdi.

Hamsunun Almaniyaya və nasizmə olan münasibətində aydın olmayan və mübahisəli məqamlar çoxdur. İlk növbədə, qeyd edilməlidir ki, güclü şəxsiyyət axtarışında olan Hamsun onu Almaniyada tapır. Bu Nitşe idi.

Nəzərə almaq lazımdır ki, öz dünya şöhrətinə görə Hamsun məhz Almaniyaya borcludur. Hamsun haqqında ilk kitabı 1910-cu ildə alman Karl Morburger yazmışdı. 1898-ci ildə Hamsuna dövlət təqaüdü verilməsindən imtina edildikdə, onun Almaniyadakı naşiri Albert Langen yazıçıya maddi dəstək göstərərək "Viktoriya" romanının yazılması üçün şərait yaratmışdı.

İkincisi, Hamsun Amerika və Britaniyanı sevmir, Almaniyanı onlara qarşı qoyurdu. O hələ 1889-cu ildə "Müasir Amerikanın mənəvi həyatı haqqında" yol oçerkləri kitabında yazırdı ki, Amerikada heç bir mənəvi həyat yoxdur, maşınların səs-küyü amerikan cəmiyyətində mədəniyyət haqqında bütün xatirələri məhv edibdir. Hətta 30 il sonra Hamsun məktublarının birində yazırdı: "Mən yenə də gəncliyimdə formalaşmış fikrimin təsdiqini görürəm."

Hamsun həm çıxışlarında, həm məktublarında, həm də əsərlərində ingilisləri ələ salırdı. Onların özləri haqqında çox yüksək fikirli olmalarını və başqa millətləri insan hesab etmədiklərini qeyd edirdi. Onun ingilislərə mənfi münasibəti elə güclü idi ki, onun qızı Viktoriya ingilisə ərə getmək istəyəndə, Hamsun ona yazmışdı: "Əgər sən öz ingilisini seçsən mənə daha bel bağlama".

1914-cü ildə Almaniya ilə İngiltərə arasında müharibə başlayanda Hamsun ilk dəfə açıq-aşkar Almaniya tərəfdarı olduğunu bildirdi. O naşir Langenə yazırdı:

"Bütün bu illər ərzində, hələ müharibədən çox-çox qabaq mən Almaniyaya dost kimi yanaşırdım, çünki mən germanam!"

İkinci Dünya müharibəsi zamanı Norveçin alman işğalına uğraması fikrini Hamsun qətiyyən yaxın buraxmırdı. Əksinə, Hitlerin kiçik Norveç xalqına yardım əli uzatdığını iddia edirdi. Müharibə dövründə Hamsun faşistpərəst Viskun Kvislinq hökuməti ilə əməkdaşlıq edən və onu dəstəkləyən yeganə tanınmış ziyalı idi. Lakin onun mövqeyi təzadlı idi.

Yəhudiləri sevməsə də, Hamsun müharibə zamanı onlardan çoxunu xilas edir, nasist Norveç hökumətinin rəhbəri olan Terbovenə müraciət edərək konsentrasiya düşərgələrinin yaradılmasına etiraz edir. Hitlerin mətbuat katibi Ditrix isə deyirdi ki, Hamsun fürerə etiraz etməyə cəsarət tapan yeganə şəxs idi.

1943-cü ildə Knut Hamsun Hitler və Göbbelslə görüşmüş və öz Nobel mükafatı laureatı medalını hədiyyə kimi alman reyxskanslerinə bağışlamışdı. Lakin bu görüşdə o Hitlerdən tələb etmişdi ki, Norveçi Kvislinq rejimindən azad etsin və bununla da, Hitleri hittədləndirmişdi.

Hitlerlə həmin görüşü barədə Hamsun daha sonra xatırlayırdı: "Mən sanki divarla danışırdım". Özündən çıxan Hitler görüşü yarımçıq tərk edərək "Bir daha bu tip personajları burada görmək istəmirəm" deyir. Pərt olmuş Hamsun peşman halda Osloya qayıtsa da, bu hadisə də onun nasizmə münasibətini sarsıtmır.

Hirlerin ölüm xəbəri yayılanda isə Hamsun Norveçin "Avanpost" qəzetində nekroloq çap etdirərək onu dövrün böyük şəxsiyyətlərindən biri kimi dəyərləndirmişdi. O Hitleri "Xalqların azadlığı uğrunda mübariz", özünü isə "fürerin yaxın tərəfdaşı" adlandırır və onun xatirəsi önündə baş əydiyini əlavə edir.

O, italyan faşistlərinin lideri Mussolini ilə də əlaqələr yaratmağa çalışmış və yazılarında duçedən rəğbət hissi ilə söz açmışdı.

Yazıçının nasist Almaniyasına və onun liderlərinə sevgisini spontan qərar, müvəqqəti maraq və ya qocalıq marazmı hesab etmək olmaz. Sonralar da peşmanlıq ifadə etməyərək 1947-ci ilin dekabrında məhkəmə prosesində yazıçı bəyan etmişdi: "Yazdıqlarım səhv deyildi. Yazdığım zamanda da səhv deyildi. Mən öümdən narazı deyiləm və vicdanım təmizdir".

Bütün bunlara görə norveçlilər öz böyük yazıçılarından üz döndərmişdilər. Etiraz əlaməti kimi onun minlərlə kitabı müəllifin ünvanına göndərilmişdi. 1945-ci ilin payızında faşistlərlə əməkdaşlığa görə Knut Hamsun və ikinci arvadı, keçmiş akrtisa Mariya Andersen həbs edilmişdi. Hamsun dörd ay həbsdə saxlanmış, sonra isə Landvikdəki qocalar evinə köçürülmüşdü.

1947-ci ildə məhkəmə qarşısına çıxarılan yazıçının ittiham üzrə günahı sübuta yetirilmişdir. Eyni zamanda oğlunun almanların seçmə hərbi hissələrində qulluq etdiyi faktı aşkar olunmuşdu. 88 yaşlı Hamsuna qarşı iddianı dövlət deyil, fərd qaldırır. Məhkəmədə Hamsun yenə də peşman olmayaraq onu ittiham edənlərə meydan oxuyur. O müharibə illərində evindən çıxmadığını, bir çox nasist cinayətlərindən xəbərsiz olduğunu, Norveçi çox sevdiyini söyləyir və sual verir: "Mən otağımda oturub ölkəmi satdım?"

Lakin həkim komissiyası haqqında "əqli deqradasiya" qərarı çıxardığından Hansun həbsdən canını qurtara bilmişdi. Məhkəmə onu 425 min Norveç kronu (təxminən 80 min ABŞ dolları) cərimə etmişdi. 1949-cu ildə Knut Hamsun özünə qarşı yönələn ittihamlar və üzərində qurulan məhkəmə prosesi ilə əlaqədar "Ot basmış cığırlarla" adlı müdafiə xarakterli kitabını yazmışdı. Tənqidçilərin fikrincə "canlı, müxtəsər və parlaq" üslubda qələmə alınan bu kitab 90 yaşlı yazıçıya hüquqi cəhətdən haqq qazandırmağa əsas verməsə də, şəxsiyyətinə və yaradıcılığına olan marağı xeyli artırmışdı. Son dövrlərdə Norveçdə Hamsunun məhkəmə prosesinə fərqli münasibət ifadə edən, hətta onun müdafiəsinə yönələn kitab və məqalələr çap olunmuşdur.

Vəfatı

Knut Hamsun 19 fevral 1952-ci ildə vəfat etmişdir. Ölümündən 2 il sonra onun əsərlərinin toplusu çapdan çıxmışdı.

Əsərləri

• "Aclıq" (1890)
• "Misteriyalar" (1892)
• "Redaktor Lünge" (1892)
• "Yeni şəfəqlər" (1893)
• "Pan" (1894)
• "Viktoriya" (1898)
• "Payız ulduzları altında" (1906)
• "Benoni" (1908)
• "Xəlvəti oynayan qərib" (1909)
• "Əsrin övladları" (1913)
• "Seqelfoss qəsəbəsi" (1915)
• "Torpağın bərəkəti" (1917)
• "Quyu başındakı qadınlar" (1920)
• "Sonuncu fəsil" (1923)
• "Avaralar" (1927)
• "Avqust" (1930)
• "Həyat axır" (1933)
• "Çevrə qapanır" (1936)
• "Ot basmış cığırlarla" (1949)

Xarici keçidlər

• Knut Hamsunun bioqrafiyası, əsərləri, məqalələri (rusca), foto şəkilləri
• K.Hamsunun əsərlərinin qısa məzmunu (rusca)
• Knut Hamsunun əsərləri (rusca)
• Knut Hamsun. Nağıllar ölkəsində (rusca)
• "В_сказoчнoй_стране". Bakıya səfəri haqqında (rusca)
• Bakıya səfəri haqqında^{[ölü keçid]}
• Гамсун и нацизм 2016-03-05 at the Wayback Machine
• Наталия Будур Гамсун. Мистерия жизни^{[ölü keçid]}

İstinadlar

1. Bibliothèque nationale de France BnF identifikatoru (fr.): açıq məlumat platforması — 2011.
2. Knut Hamsun // Encyclopædia Britannica (ing.)
3. Knut Hamsun // Internet Speculative Fiction Database (ing.) — 1995.
4. Гамсун Кнут // Большая советская энциклопедия (rus.): [в 30 т.] / под ред. А. М. Прохорова — 3-е изд. — Москва: Советская энциклопедия, 1969.
5. Knut Hamsun — Norsk biografisk leksikon.
6. LIBRIS — 2013.
7. "В_сказочной_стране" http://www.ourbaku.com/index.php5/Кнут_Гамсун_"В_сказочной_стране" (#bare_url_missing_title).
8. Кнут Гамсун. В сказoчнoй стране.
9. , 2013-02-13 tarixində orijinalından arxivləşdirilib, İstifadə tarixi: 2014-04-05.
10. Наталия Будур Гамсун. Мистерия жизни^{[ölü keçid]}.
11. M.Süleymanov. Ədəbi portretlər, Bakı. Qanun. 2013. İSBN 978-9952-26-556-9.Səhifə 26-30
12. M.Süleymanov. Ədəbi portretlər, Bakı. Qanun. 2013. İSBN 978-9952-26-556-9.Səhifə 26-31