Fərhad Əsgərov
Fərhad Əsgərov — Azərbaycan Jurnalistlər Birliyinin (1997) və Azərbaycan Yazıçılar Birliyinin (2002) üzvü. “Qızıl qələm” və “İti qələm” mükafatları laureatı.
Həyatı
Əsgərov Fərhad Ramiz oğlu 1960-cı il dekabr ayının 24-də Bakının Mərdəkan qəsəbəsində anadan olub. Mərdəkandakı 181 saylı orta məktəbi bitirib. M.Ə.Sabir adına Bakı Pedaqoji Texnikumunun məzunudur, ixtisasca texniki əmək və rəsmxət müəllimidir. Sonralar jurnalistika ixtisası üzrə də ali təhsil alıb. İlk əmək fəaliyyətinə 1980-ci ildə Kəlbəcər rayonunun Kilsəli kənd orta məktəbində müəllim kimi başlayıb. Həmin məktəbdə üç ay işlədikdən sonra könüllü olaraq əsgəri xidmətə yollanıb. 1980-82-ci illərdə Qazaxıstan Respublikası, Kızılorda vilayətinin Leninsk şəhərində - Baykonurda həqiqi hərbi xidmətdə olub. Əsgəri xidmətdən sonra Kəlbəcər rayonunun Seyidlər kənd orta məktəbində çalışıb. Daha sonra isə Bakının bir neçə məktəbində müəllim işləyib.
Fərhad Əsgərovun ilk məqaləsi 1978-ci ildə hələ tələbə ikən "Azərbaycan müəllimi" qəzetində dərc edilmişdir. Onun 1983-cü ildən başlayaraq mütəmadi olaraq informasiya və məqalələri işıq üzü görüb. Keçmiş İttifaqın dövründə onun müxtəlif sahələrlə bağlı informasiya və məqalələri “Azərbaycan müəllimi”, “Azərbaycan gəncləri”, “İdman”, “Bakı”, “Vışka”, “Bakinskiy raboçiy”, “Molodyoj Azerbaydjana” qəzetlərində, eləcə də “Mədəni maarif işi”, “Təşviqatçı” jurnallarında dərc edilib. Respublika radiosunda xeyli yazıları səsləndirilib. Respublikamızın müstəqilliyi illərində isə müxtəlif səpkili yazıları “Səhər”, “Açıq söz”, “7 gün +”, “Sərbəst düşüncə”, "Hürriyyət", "Mozalan", "Maarifçi", “Yurddaş”, “Yeni dünya”, “Azərbaycan dünyası”, “Karvan yolu”, “İnsan hüquqları”, “El qəzeti”, “Hakimiyyət”, “Yeni təfəkkür”, “Paklıq”, “Nəbz” qəzetlərində işıq üzü görüb. O, bir qəzetdə çalışsa da, adları çəkilən qəzetlərlə əməkdaşlıq edib. 2005-ci ildə “Nüanslar” ictimai-siyasi publisistik qəzetini təsis edib. Qəzetin hər bir sayında verilən informasiya, məqalə və bədii yazılar öz obyektivliyi, maraqlı olması və oxunaqlığı ilə oxucuların diqqətini cəlb etmişdir.
Fərhad Əsgərov ədəbi yaradıcılığa hələ gənclik illərindən başlayıb. O, alleqorik janrda nağıl və poemalar, sənədli povestlər, monoloq, novella, olmuş hadisələr, gənclər, eləcə də kiçik yaşlı uşaqlar üçün hekayələr yazmışdır. O, həmçinin 50-dən çox oçerkin müəllifidir. Onun bədii əsərləri “Ulduz”, “Xəzan” jurnallarında, “Mir literaturı”, “Yeni təfəkkür”, “Nüanslar”, “Türk dünyası ağsaqqalları” qəzetlərində dərc edilmişdir. Fərhad Əsgərovun müxtəlif illərdə “Tale”, “Ötən günlər”, “Yurd həsrəti, Vətən sevgisi”, “Ya iskal Lyudmilu”, “Neslomlennıy repressiyami”, “Filin dərdi böyükdü”, “Ömür elə qısadır ki...”, “Prokuror-ümid qapısı”, “El ağsaqqalı”, “Ürəklərdən gələn səs”, “Qaranlıq meşədə gizli oyunlar”, “Əsl dost”, ”Seçilmiş əsərləri”, “Ömürdə izlər”, “Qara qızıl fatehi”, “Tyomnıye iqrı v tyomnom lesu” adlı kitabları işıq üzü görmüşdür. 2014-cü ildə 288 səhifəlik “İllərin nəfəsi” adlı kitabı çapdan çıxmışdır. Kitabda yazıçının müxtəlif illərdə yazdığı hekayələr, olmuş hadisələr, alleqorik nağıl və poemalar, oçerklərdən nümunələr, monoloq, novella toplanmışdır. Kitabda həmçinin yazıçı-jurnalistin müxtəlif qəzetlərdə dərc edilmiş məqalələrindən nümunələr də verilmişdir. Oxucuların ixtiyarına verilmiş bu kitabdakı əsərlər oxucuları düzlüyə, ədalətə, işdə məsuliyyətli olmağa və digər insani keyfiyyətlərə səsləyir.
Onun 96 səhifədən ibarət olan “Vicdan və nəfs” kitabı 2018-ci ildə çapdan çıxmışdır. Bu kitabda toplanmış 12 hekayəni və “Təsirləndiyim məqamlar” başlığı altında dərc edilmiş həyat düşüncələrini oxuyarkən məlum olur ki, müəllif yaşadığı cəmiyyətdə daim ədalət, düzgünlük, halallıq, insanlıq axtarır.
Fərhad Əsgərovun xarici ölkələrdə də bədii əsərləri çap edilmişdir. Belə ki, 2020-ci ildə onun “Vicdan və nəfs” adlı kitabı İran İslam Respublikasının Təbriz şəhərində çapdan çıxmışdır. Kitabda müəllifin son illərdə yazdığı hekayələr toplanmışdır. O, həmçinin Rusiyanın Moskva şəhərində nəşr olunan "Rossiyskaya literatura" jurnalı ilə də əməkdaşlıq etmişdir. Rusiyada nəşr olunan almanaxlarda və Qazaxıstan Respublikasının Turkestan şəhərində nəşr olunan "Sara söz" jurnalında hekayələri, eləcə də alleqorik əsərləri dərc edilmişdir.
Fərhad Əsgərov 1997-ci ildən Azərbaycan Jurnalistlər Birliyinin, 2002-ci ildən Azərbaycan Yazıçılar Birliyinin üzvüdür. 2015-ci ildə birillik Prezident təqaüdünə layiq görülmüşdür. “Qızıl qələm” və “İti qələm” mükafatları laureatıdır.
Bir qız övladı var.
Dərc edilmiş bədii əsərləri
ALLEQORİK NAĞILLAR
- Qaranlıq meşədə gizli oyunlar (azərbaycan və rus dillərində)
- Boz Pələngin yuxusu (azərbaycan, qazax və rus dillərində)
ALLEQORİK POEMALAR
- Filin dərdi böyükdü (azərbaycan və rus dillərində)
- Ditdili şantaj edir (azərbaycan və rus dillərində)
UŞAQ HEKAYƏLƏRİ
- Əkiz qardaşlar
- Yad cücələr
- Yalanın üstü açıldı
- Uşaqların borcu
- Samirin arzusu
NOVELLA
- İki qızın anası
MONOLOQ
- Desəm öldürərlər
SƏNƏDLİ POVESTLƏR
- Yurd həsrəti Vətən sevgisi
- Ürəklərdən gələn səs
- Prokuror – ümid qapısı
- El ağsaqqalı
- Neslomlennıy repressiyami (azərbaycan və rus dillərində)
HEKAYƏLƏR
- Qız atasını tapdı
- Əzizim, bəxti yarım
- Kələklə gələn, küləklə gedər
- Qatilin aqibəti
- Şantaj
- Çıxış yolu həmişə var
- Boş sinifdə dərs danışan müəllim (azərbaycan, qazax və rus dillərində)
- Tamahkar
- Yelləncəklərin taleyi
- Tale (azərbaycan, qazax və rus dillərində)
- Məchul qonağın xeyirxahlığı (azərbaycan, qazax və rus dillərində)
- Təmtərağa uymayın
- Qısqanclıq xəstəliyi
- Rüşvət necə gizlədilirdi
- Sirri torpaq apardı
- Çıxış yolu tükənəndə (azərbaycan, qazax və rus dillərində)
- Kolxoz
- Vicdan və nəfs (azərbaycan, qazax və rus dillərində)
- Vicdanlı “baba”
- Demokratik iclas
- Xəyanət
- Tələbələrin söhbəti
- Mayor Şahbazovun “səmimiliyi”
- Alimin oynaya bilmədiyi mahnı
- Hay-hayla gələn vay-vayla gedər