Əli Cəfəroğlu
Bu məqaləni vikiləşdirmək lazımdır. Lütfən, məqaləni ümumvikipediya və redaktə qaydalarına uyğun şəkildə tərtib edin. |
Əliyev Əli Cəfər oğlu (Əli Cəfəroğlu) – Azərbaycan yazıçısı, Azərbaycan Yazıçılar Birliyinin üzvü (2006), Azərbaycan Jurnalistlər Birliyinin üzvü (2014), İraq Türkmən Ədəbiyyatçı və Yazarlar Birliyinin üzvü (2018), Şimali Amerika Yazıçılar Birliyinin üzvü (2021), Prezident təqaüdçüsü (2014).
| Əli Cəfəroğlu | |
|---|---|
| Əli Cəfər oğlu Əliyev | |
| İlk adı | Əli Əliyev |
| Təxəllüsü | Əli Cəfəroğlu |
| Doğum tarixi | |
| Doğum yeri | Qazax rayonu, Azərbaycan SSR, SSRİ |
| Vətəndaşlığı | Azərbaycan |
| Milliyyəti | azərbaycanlı |
| Təhsili | Bakı Dövlət Universitetinin tarix fakultəsi |
| İxtisası | tarixçı. |
| Fəaliyyəti | yazıçı |
| Əsərlərinin dili | azərbaycanca |
| İlk əsəri | "Atam mənim xoşbəxtliyim" (mənsur şeir) |
| Mükafatları | Prezident təqaüdçüsü (01.05.2014), "Qızıl qələm" media mükafatı laureatı (2014) |
Həyatı
Əli Cəfəroğlu Əliyev 4 iyul 1968-ci ildə Qazax şəhərində ziyalı ailəsində anadan olmuşdur. 1992-ci ildə Bakı Dövlət Universitetinin tarix fakultəsini bitirmişdir.
1992-1993-cü illərdə Ağstafa rayonunun Həsənsu kənd orta məktəbində müəllim, 1993-cü ildə Ağstafa Rayon İcra Hakimiyyəti başçısının köməkçisi, 1993-1995-ci illərdə Gəncə Dövlət Pedaqoji İnstitutunun Qazax filialında müəllim, 1995-1999-cu illərdə Rayon Gənclər və İdman İdarəsində baş inspektor, 1999-2011-ci illərdə Ağstafa Rayon İcra Hakimiyyətinin təhsil, səhiyyə və mədəniyyət şöbəsində baş məsləhətçi vəzifələrində işləmişdir. 2011-ci ildən Ağstafa rayon təhsil şöbəsində aparıcı məsləhətçi vəzifəsində çalışır və 2-ci dərəcəli dövlət qulluqçusudur.
Yaradıcılığı
İlk bədii yazısı olan "Atam mənim xoşbəxtliyim" şeiri 1989-cu ildə "Azərbaycan gəncləri" qəzetində dərc olunmuşdur. İlk hekayəsi "Savalan" qəzetində, ilk nağılı "Göyərçin" jurnalında, aforizmləri isə "Həqiqət" qəzetində çap olunmuşdur. 7 jurnal və 30-dan çox qəzetdə bədii-publisistik yazıları, Kultaz.com saytında hekayələri, Bebe.az, Körpəm.net intellektual uşaq portallarında nağılları dərc olunmuşdur.
2002-ci ildə "Atam mənim xoşbəxtliyim" adlı ilk bədii kitabı "Şirvannəşr"də nəşr olunmuşdur. Kitabda yazıçının povestləri, hekayələri, nağılları, aforizmləri, mənsur şeirləri toplanmışdır. "Sahibsiz" povestində yetimlik həyatının açılarını dadmış gənclik çətin və şərəfli mübarizə yolunu qələmə almış, "Gül və qız" adlı nağıl povestində eşq və məhəbbətin gücünü göstərmiş, hekayə və nağıllarında cansız əşyaları danışdırmaqla uşaqlarda tərbiyəvi fikirlər aşılamağa çalışmışdır.
2003-cü ildə "Zirvəyə doğru" adlı ikinci kitabı "Şirvannəşr"də çapdan çıxmışdır. Kitabda povestlər, hekayələr, nağıllar, mənsur şeirlər və aforizmlər toplanmışdır. "Assuriyalılar" povestində assurların başına gətirilən bəlalardan, onların qaçqınlıq və didərginlik taleyindən bəhs olunur. "Zirvəyə doğru" povestində isə erməni əsirliyində işgəncələrə məruz qalmış azərbaycanlı zabitin fədakarlığı əks olunmuşdur.
2006-cı ildə "Həkimin arzuları" adlı bədii kitabı nəşr olunmuşdur. Kitabın əsas qayəsini vətənpərvərlik, ana yurda məhəbbət, mənəvi saflıq təşkil edir. Yeni nəslin tərbiyəsi mövzusu yazıçının yaradıcılığından ana xətt kimi keçir.
2008-ci ildə nəşr olunmuş "Səksən beş ilin baharı" kitabında müəllif rayonda yaşayan bir nəslin keçmişinə, bu gününə tarixilik nöqteyindən nəzər salmış, xalqımızın adət-ənənələrini, mənəvi və maddi mədəniyyətini əks etdirmişdir.
2013-cü ildə "Dənizçinin səyahəti" adlı kitabı nəşr olunmuşdur. Eyni adlı povestdə Avropa və Asiyanın müxtəlif ölkələri haqqında maraqlı məlumatlar verilmiş, hekayələrdə isə vətən eşqi vətənpərvərlik, milli-mənəvi dəyərlərimizə sevgi hissləri öz əksini tapmışdır.
2014-cü ildə "Aforizm çələngi"adlı kitabı nəşr olunmuşdur. Bu kitabda yazıçının müxtəlif illərdə qələmə aldığı aforizmləri toplanmışdır.
2019-cu ildə İran İslam Respublikasının Zəncan şəhərində "Dənizçinin səyahəti" adlı kitabı fars dilində nəşr edilmişdir.
2011-ci ildə nəşr olunmuş "Azərbaycan yazıçıları XX-XXI yüzillikdə" ensiklopediyasında ( Bakı, 2011), "Yurdumuz".adlı ensiklopediyada (Bakı.,2010), həmçinin "Savalan" və "Ağstafa" qəzetlərində Əli Cəfəroğlu haqqında məlumatlar öz əksini tapmışdır.
Azərbaycan mətbuatında bədii-publisistik yazılarla çıxış etmişdir.
20-dən çox əsəri Azərbaycan radiosunda səsləndirilmişdir. 1992-ci ildə Ağstafa rayonu haqqında çəkilmiş televiziya filminin ssenari müəllifi olmuşdur.
Yeddi kitab müəllifidir. 2006-cı ildən Azərbaycan Yazıçılar Birliyinin, 2014-cü ildən isə Azərbaycan Jurnalistlər Birliyinin üzvüdür. 2018-ci ildə İraq Türkmən Ədəbiyyatçı və Yazarlar Birliyininə, 2021-ci ildə isə mərkəzi Kanadada yerləşən Şimali Amerika Yazıçılar Birliyinə üzv qəbul olunmuşdur.
Əli Cəfəroğlu 2014-cü ilin may ayından Prezident təqaüdçüsüdür.
2015-ci ildə "Çinar və taxta parçası" adlı hekayəsi Azərbaycan Respublikasının ümumtəhsil məktəblərinin rus bölmələrinin VIII sinifləri üçün dərc olunmuş "Azərbaycan dili" dərsliyinə salınmışdır.
"Qızıl qələm" media mükafatı laureatıdır (2014-cü il).
Təhsil sahəsində fəaliyyətində fərqləndiyinə görə Ağstafa rayon İcra hakimiyyəti başçısının 05.09.2016-cı il tarixli 167 nömrəli sərəncamı ilə rayon İcra hakimiyyətinin Fəxri Fərmanı ilə təltif edilmişdir.
2019-cu ildə "Əfqanıstandan sovet qoşunlarının çıxarılmasının 30 illiyi" medalı ilə təltif edilmişdir.
2014-cü il dekabr ayının 10-da Azərbaycan Respublikasının İnsan Hüquqları üzrə Müvəkkilinin (Ombudsman) ənənəvi olaraq keçirdiyi “Hüquqlar hamı üçün!” mövzusunda jurnalist yazıları müsabiqəsində II mükafatı, 2017-ci ildə I mükafatı qazanmışdır. 2015-ci ildə Dövlət Sərhəd Xidmətinin vətənpərvərlik mövzusunda keçirdiyi müsabiqədə hekayə nominasiyası üzrə III yeri, 2019-cu ildə I mükafatı qazanmışdır. 2016-cı ildə Azərbaycan Respublikası Təhsil Nazirliyinin “Kiçikyaşlı uşaqlar üçün nəzm, nəsr və dram əsərləri müsabiqəsi”ndə nəsr nominasiyası üzrə IV yeri, 2018-ci ildə Özbəkistan Respublikasında Azərbaycan Xalq Cümhuriyyətinin 100 illiyinə həsr edilmiş esse müsabiqəsində I yeri tutmuşdur. 2018-ci ildə mənsur şeirləri Türkiyədə nəşr olunmuş “Karabağdan Kerkükden Çanakkaleye” adlı şeir antologiyasında, “Azərbaycan qadınları repressiya illərində” adlı məqaləsi “Cümhuriyyətə işıq saçan qadınlar” adlı araşdırma yazılar toplusunda nəşr edilmişdir.
2017-ci ildə Əli Cəfəroğlunun “Beş kuruş” (“Beş qəpik”) adlı hekayəsi Türkiyə Respublikasının Adana şəhərində “Adana haber postası” adlı qəzetdə türk dilində, "Beş tiyin" ("Beş qəpik") hekayəsi isə Özbəkistan Respublikasının Daşkənd şəhərində "Kitob dunyosi" adlı qəzetdə özbək dilində, 2018-ci ildə "Çinar və taxta parçası" adlı hekayəsi Gürcüstan Respublikasının Tbilisi şəhərində "Müasir dünya uşaq ədəbiyyatı" jurnalında, "Beş kuruş" adlı hekayəsi Qazaxıstan Respublikasının Qolden Bridgen New Xəbər Agentliyində, Vatanpress.com saytında türk dilində , "Доброта Вальтера" ("Valterin yaxşılığı") adlı hekayəsi Qazaxıstan Respublikasında rus dilində və "Pyat kopeek" adlı hekayəsi Belorus Respublikasının Qomel şəhərində "Metamorfoza" adlı jurnalın 3 cü nömrəsində rus dilində, həmçinin 2 hekayəsi 2019-cu ildə Belarusda "Ekoloq i ya" jurnalında rus dilində dərc edilmişdir. 2019-cu ildə Tacikistanda "Ədəbiyyat və cəmiyyət" adlı qəzetdə 2 hekayəsi tacik dilində, 2021-ci ilin may ayında "Çinar və taxta parçası" adlı hekayəsi Ukrayna Respublikasının Kiyev şəhərində "Solneçnıy qorod" adlı beynəlxalq almanaxda ingilis və Ukrayna dillərində dərc edilmişdir.
Ümumilikdə Əli Cəfəroğlunun hekayələri dünyanın 8 dilinə - ingilis, rus, türk, fars, Ukrayna, gürcü, özbək və tacik dillərinə tərcümə edilərək dünyanın 8 ölkəsində - Türkiyə, İran, Ukrayna, Belarus, Qazaxıstan, Özbəkistan, Tacikistan və Gürcüstanda dərc edilmişdir.
Evlidir, bir oğlu, iki qızı var.
Əsərləri
- "Atam mənim xoşbəxtliyim". Bakı: Şirvannəşr, 2002, 130 səh
- "Zirvəyə doğru". Bakı: Şirvannəşr, 2003, 130 səh.
- "Həkimin arzuları". Bakı: Şirvannəşr, 2006, 130 səh.
- "Səksən beş ilin baharı". Bakı: Şirvannəşr, 2008, 100 səh.
- "Dənizçinin səyahəti". Bakı: Zərdabi LTD, 2013, 168 səh.
6. "Aforizm çələngi Zərdabi LTD, 2014, 160 səh.
7. "Dənizçinin səyahəti", İran İslam Respublikası, Zəncan şəhəri, Qələme-mehr nəşriyyatı, 2020ci il, 206 səh.
Mənbələr
- T.Əhmədov. Azərbaycan yazıçıları XX-XXI yüzillikdə. Bakı: 2011, səh.263
- F.Turan. Yurdumuz. Bakı: 2010
- "Savalan" qəzeti, 2014
- "Ağstafa" qəzeti, 2014, 2015, 2016
- "Palitra " qəzeti, 5 oktyabr 2018, səh.13
- "Ədəbiyyat" qəzeti, iyul, 2018