Sahibkarlığın İnkişafı Fondu (Azərbaycan)
Azərbaycan Respublikası Sahibkarlığın İnkişafı Fondu (ing. Entrepreneurship Development Fund of the Republic of Azerbaijan) — sahibkarlıq fəaliyyətinin maliyyələşdirilməsi və təşviq edilməsi istiqamətində fəaliyyət göstərən publik hüquqi şəxsdir. Fond ölkədə sahibkarlığın inkişafına dəstək verməklə qeyri-neft sektorunda innovativ texnologiyalara əsaslanan yeni istehsal, emal və infrastruktur müəssisələrinin yaradılmasına, ixracyönümlü və idxalı əvəzedən məhsul istehsalının artırılmasına, real sektora investisiya qoyuluşlarının sürətləndirilməsi ilə iqtisadiyyatda özəl sektorun payının daha da artırılmasına xidmət edir.
| Sahibkarlığın İnkişaf Fondu | |
| Ölkə: | Azərbaycan Respublikası |
| Yaradılıb: | 12 oktyabr 1992 |
| Tabeçilik: | Azərbaycan Respublikasının İqtisadiyyat Nazirliyi |
| Ünvan: | A. Şərifzadə küç., 172, AZ1122 |
| Rəhbərlik | |
| Rəhbər: | Kənan Nəcəfov |
| Müavin: | Arif Vəliməmmədov Osman Xaliyev |
| Sayt | |
| http://www.edf.gov.az/ | |
Tarixi
12 oktyabr 1992-ci ildə Azərbaycan Respublikasının Prezidentinin 269 nömrəli Fərmanına əsasən "Azərbaycan Respublikası Sahibkarlığa Kömək Milli Fondunun Əsasnamə"sinin təsdiq edilməsi ilə dövlət büdcəsinin vəsaiti hesabına güzəştli kreditlər verəcək ilk maliyyə qurumunun əsası qoyuldu.
1993-cü ilin fevralından Dövlət Antiinhisar Siyasəti və Sahibkarlığa Kömək Komitəsinin xüsusi struktur bölməsi kimi yaradılan Sahibkarlığa Kömək Milli Fondu fəaliyyətə başlamışdır.
27 avqust 2002-ci ildə dövlət büdcəsinin vəsaiti hesabına verilən güzəştli kreditlərin istifadəsində yaranmış problemlərin aradan qaldırılması, Sahibkarlığa Kömək Milli Fondunun fəaliyyətinin Azərbaycan iqtisadiyyatının inkişafının prioritetləri və mərhələlər üzrə həlli tələb olunan vəzifələrlə uzlaşdırılması, sahibkarlığa dövlət dəstəyinin gücləndirilməsi və bu fəaliyyətin genişləndirilməsinin təmin edilməsi məqsədilə Ümummilli lider Heydər Əliyevin 779 nömrəli Fərmanı ilə "Azərbaycan Respublikasının Sahibkarlığa Kömək Milli Fondu haqqında Əsasnamə"nin və ’’Azərbaycan Respublikası Sahibkarlığa Kömək Milli Fondunun vəsaitinin istifadəsi Qaydaları’nın təsdiq edilməsi ilə Sahibkarlığa Kömək Milli Fondunun fəaliyyəti və sahibkarlıq subyektlərinin investisiya layihələrinin güzəştli şərtlərlə maliyyələşdirilməsi mexanizmi yenidən qurulmuş və bununla da, Fond daha aktiv fəaliyyət fazasına daxil olmuşdur.
31 iyul 2018-ci ildə Azərbaycan Respublikasının Sahibkarlığa Kömək Milli Fondu ləğv edilmiş və Azərbaycan Respublikası İqtisadiyyat Nazirliyinin tabeliyində Azərbaycan Respublikasının Sahibkarlığın İnkişafı Fondu publik hüquqi şəxs təsis edilmişdir.
Əsas vəzifələri
Fond Azərbaycan Respublikası Sahibkarlığın İnkişafı Fondunun Nizamnaməsi ilə müəyyən edilmiş bir sıra vəzifələri həyata keçirir:
- Fondun vəsaiti hesabına Azərbaycan Respublikasının sosial-iqtisadi inkişafının prioritet istiqamətləri üzrə sahibkarlıq subyektlərinin investisiya layihələrini maliyyələşdirmək;
- Fonda sahibkarlıq subyektlərinin maliyyələşdirilməsi üçün verilmiş vəsaitdən səmərəli və təyinatı üzrə istifadəni təmin etmək;
- Fonda təqdim olunan investisiya layihələrinin ekspertizasını həyata keçirmək;
- Sahibkarlığın inkişafına yönəldilmiş dövlət proqramlarından irəli gələn investisiya layihələrinin maliyyələşdirilməsinə üstünlük vermək;
- Sahibkarlığın inkişafını, yeni iş yerlərinin yaradılmasını təmin edən sahəvi və regional proqramların işlənib hazırlanmasında və həyata keçirilməsində iştirak etmək;
- Fonda təqdim olunan investisiya layihələrinin tərtib olunmasına dair minimal tələbləri və investisiya layihələrinin qiymətləndirilmə meyarlarını müəyyən etmək;
- Kreditlərdən öz təyinatına uyğun istifadə olunmasına nəzarət etmək məqsədilə monitorinqlərin keçirilməsi qaydasını müəyyən etmək;
- Sahibkarlıq subyektlərinə zəruri hüquqi, iqtisadi və digər məlumatların toplanmasında və yayılmasında, bazar konyunkturunun öyrənilməsində, sahibkarlıq fəaliyyəti ilə bağlı proqramların və investisiya layihələrinin işlənib hazırlanmasında kömək etmək;
- İqtisadiyyatın sahələri üzrə beynəlxalq təcrübəni öyrənmək, müvafiq təhlil və araşdırmalar aparmaq;
- Sahibkarlıq subyektləri üçün zəruri elmi-texniki biliklərin və yeniliklərin təbliğinə kömək etmək;
- Azərbaycan Respublikası Prezidentinin aktları ilə müəyyən edilmiş digər vəzifələri həyata keçirmək.
Fəaliyyət istiqamətləri
Azərbaycan Respublikası Sahibkarlığın İnkişafı Fondunun Nizamnaməsi ilə Fondun aşağıdakı fəaliyyət istiqamətləri müəyyən edilmişdir:
- Azərbaycan Respublikasının sosial-iqtisadi inkişafının prioritet istiqamətləri üzrə sahibkarlıq subyektlərinin investisiya layihələrini güzəştli kredit vəsaiti hesabına maliyyələşdirmək;
- Azərbaycan Respublikasının Nazirlər Kabineti tərəfindən müəyyən edilən hallarda və qaydada sahibkarlıq subyektlərinin manatla aldıqları kreditlərə zəmanət və faiz subsidiyası vermək;
- Sahibkarlığın inkişafına dəstək sahəsində proqramların (o cümlədən dövlət proqramlarının) hazırlanmasında, həyata keçirilməsində və maliyyələşdirilməsində iştirak etmək;
- Müasir texnologiyalara əsaslanan investisiya layihələri üzrə qabaqcıl beynəlxalq təcrübənin öyrənilməsi məqsədilə müvafiq təhlil və araşdırmalar aparmaq;
- Sahibkarların yeni bazarlara çıxış imkanlarını öyrənmək və əldə olunan beynəlxalq təcrübəni sahibkarlara çatdırmaq, maarifləndirmə işləri aparmaq və onlara məsləhət xidmətləri göstərmək.
Dəstək mexanizmləri
Sahibkarlığın inkişafı məqsədilə Fond maliyyələşdirmə, maarifləndirmə və məsləhət xidmətlərini həyata keçirir.
Maliyyə dəstəyi mexanizmləri
Güzəştli kredit mexanizmi — Fondun güzəştli kredit vəsaiti ölkənin sosial-iqtisadi inkişafı istiqamətləri çərçivəsində Azərbaycan Respublikası Prezidentinin aktları ilə, eləcə də Fondun Müşahidə Şurasının qərarı ilə müəyyən edilmiş prioritet sahələr, xüsusilə qeyri-neft sektorunun inkişafı, innovativ texnologiyaların tətbiqi və ixrac əməliyyatları üzrə investisiya layihələrinin maliyyələşdirilməsinə yönəldilir. Güzəştli kreditin məbləği 5 min manatdan 10 milyon manatadək, faiz dərəcəsi illik 5%-dək, kreditin müddəti 10 ilədək, kredit üzrə güzəşt müddəti isə kredit müddətinin yarısınadək müəyyən olunmuşdur. Güzəştli kreditlərin sahibkarlıq subyektlərinə çatdırılması müvəkkil banklar və ya bank olmayan kredit təşkilatları vasitəsilə onların öz adından və öz riskləri hesabına həyata keçirilir.
Avadanlıq krediti mexanizmi — Avadanlıqların girov qoyulması yolu ilə mövcud avadanlıqlarını yeniləmək və ya yeni avadanlıqlar əldə etmək istəyən sahibkarlıq subyektlərinə verilir. Kreditin məbləği 5 min manatdan 3 milyon manatadək, faiz dərəcəsi illik 9%-dək, kreditin müddəti 5 ilədək, güzəşt müddəti avadanlığın quraşdırılması üçün tələb olunan vaxt nəzərə alınmaqla, 12 ayadək müddəti təşkil edir.
Dövlət zəmanəti və subsidiya mexanizmi — Dövlət zəmanəti pandemiyadan (COVİD-19) zərər çəkmiş sahələrin iqtisadi fəaliyyət növləri üzrə fəaliyyət göstərən sahibkarlıq subyektlərinin müvəkkil kredit təşkilatlarından almaq istədikləri kreditlərə verilir. Zəmanət verilən kreditlərə faiz subsidiyaları da ödənilir. Dövlət zəmanəti ilə kredit mexanizmi məbləği 3 milyon manatadək, illik faiz dərəcəsi 15%-dək, müddəti 3 ilədək olan kreditlərə şamil edilir. Kreditlər üzrə 12 ayadək güzəşt müddəti tətbiq edilir. Bu mexanizmə əsasən, kreditlərin 60%-dək hissəsinə dövlət zəmanəti verilir, həmçinin həmin kreditlərin illik faiz dərəcəsinin 50%-i dövlət tərəfindən subsidiyalaşdırılır.
Mövcud kredit portfeli üzrə subsidiya mexanizmi — Faiz subsidiyası pandemiyadan zərər çəkmiş sahələrdə fəaliyyət göstərən və 2020-ci il 10 mart tarixinə aktiv kredit borcu olan sahibkarların kredit təşkilatlarından manatla aldıqları kreditlərə verilir. Faiz subsidiyası kreditlərin illik faiz dərəcəsinin 10% bəndi həcmində və 2020-ci ilin mart ayından başlayaraq 12 aydan çox olmayan müddətdə ödənilir.
Sahibkarlara Xidmət Mərkəzi - müasir informasiya-kommunikasiya imkanlarından istifadə etməklə sahibkarların müraciətlərinin operativ şəkildə cavablandırılması məqsədilə yaradılıb. Mərkəz tərəfindən sahibkarlara məlumat, maarifləndirmə, məsləhət və digər xidmətlərdən istifadə imkanları təqdim olunur.
Elektron Kredit Platforması (e-edf.gov.az)
"Elektron kredit platforması" vasitəsilə dövlət zəmanətli kreditlərin verilməsi və kredit faizlərinin subsidiyalaşdırılması həyata keçirilir və bu məqsədilə sahibkarların müraciəti onlayn qaydada qeydə alınır. Elektron Kredit Platforması vasitəsilə sahibkarlar müvəkkil kredit təşkilatına getmədən onlayn rejimdə biznes kreditləri üçün müraciət etmək, müraciətlərin statusunu real vaxt rejimində izləmək və eyni anda 3 müvəkkil kredit təşkilatına müraciət etmək imkanı əldə edirlər.
İstinadlar
- http://www.e-qanun.az/framework/7820
- http://www.e-qanun.az/framework/1577
- http://femida.az/az/news/86684/ilham-eliyev-bu-qurumu-legv-etdi-ferman
- https://az.trend.az/azerbaijan/politics/2935841.html
- http://e-qanun.az/framework/39705
- http://www.anl.az/down/meqale/xalqqazeti/2018/avqust/601672.pdf
- https://fed.az/az/iqtisadiyyat/sahibkarligin-inkisafi-fondunun-nizamnamesi-tesdiq-edilib-34585
- https://azertag.az/xeber/Azerbaycan_Respublikasi_Sahibkarligin_Inkisafi_Fondunun_NIZAMNAMASI-1183963
- http://e-qanun.az/framework/39705
- http://edf.gov.az/az/content/104
- http://edf.gov.az/az/content/105,
- http://www.e-qanun.az/framework/45150
- https://banker.az/az%C9%99rbaycanda-dovl%C9%99tin-maliyy%C9%99-d%C9%99st%C9%99yi-mexanizml%C9%99ri/
- http://www.e-qanun.az/framework/45150
- https://apa.az/az/xeber/maliyye/Sahibkarligin-Inkisafi-Fondunun-vsaiti-hesabina-guzstli-kreditlrin-verilmsi-Qaydasi-tsdiq-edilib-590184
- http://www.e-qanun.az/framework/45150
- https://vergiler.az/news/economy/8924.html
- https://oxu.az/economy/514009
- http://www.e-qanun.az/framework/45150
- https://banco.az/az/news/sahibkarligin-inkisafi-fondu-kreditler-uzre-faizlerin-subsidiyalasdirilmasi-mexanizmlerini-serh
- http://e-qanun.az/framework/45384
- https://qafqazinfo.az/news/detail/pandemiya-dovrunde-sahibkarlara-destek-modeli-nece-qurulub-293908
- http://e-qanun.az/framework/45384
- http://e-qanun.az/framework/45384
- https://apa.az/az/xeber/maliyye/Pandemiyadan-zrr-ckmis-sahibkarlarin-movcud-kredit-portfeli-uzr-kredit-faizlri-subsidiyalasdirilacaq-595829
- https://www.economy.gov.az/article/sahibkarlara-xidmet-ve-biznes-inkubasiya-merkezleri-fealiyyete-bashlayib/30046
- http://edf.gov.az/az/content/55
- https://e-edf.gov.az/
- https://apa.az/az/xeber/sahibkarliq/Elektron-Kredit-Platformasi-uzrindn-495-mln-manatliq-biznes-krediti-sifarislri-daxil-olub-598117
Xarici keçidlər
- Sahibkarlığın İnkişafı Fondunun rəsmi səhifəsi
- Elektron Kredit Platforması
- Sahibkarlığın İnkişafı Fondunun rəsmi Facebook səhifəsi
- Sahibkarlığın İnkişafı Fondunun rəsmi Twitter səhifəsi
- Sahibkarlığın İnkişafı Fondunun rəsmi LinkedIn səhifəsi[ölü keçid]
- Sahibkarlığın İnkişafı Fondunun rəsmi Instagram səhifəsi
- Sahibkarlığın İnkişafı Fondunun rəsmi Youtube kanalı