Azərbaycan Sənaye Korporasiyası
Bu məqaləni vikiləşdirmək lazımdır. Lütfən, məqaləni ümumvikipediya və redaktə qaydalarına uyğun şəkildə tərtib edin. |
"Azərbaycan Sənaye Korporasiyası" Açıq Səhmdar Cəmiyyəti
"Azərbaycan Sənaye Korporasiyası" Açıq Səhmdar Cəmiyyəti | |
Ölkə: | Azərbaycan |
Yaradılıb: | 6 Noyabr 2017 |
Ünvan: | Bakı, İzmir küçəsi 14, AZ1065 |
Rəhbərlik | |
Rəhbər: | Kamran_Nəbizadə |
Müavin: | İlqar İsayev |
Sayt | |
www.ask.gov.az |
Yaradılması
“Azərbaycan Sənaye Korporasiyası” Açıq Səhmdar Cəmiyyəti - “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Azərbaycan Respublikası Prezidentinin 2016-cı il 6 dekabr tarixli 1138 nömrəli Fərmanına əsasən 06 noyabr 2017-ci ildə yaradılıb.
Azərbaycan Respublikası Prezidentinin 06 noyabr 2017-ci il tarixli Sərəncamı ilə Kamran Telman oğlu Nəbizadə “Azərbaycan Sənaye Korporasiyası” Açıq Səhmdar Cəmiyyətinin Baş direktoru təyin edilib.
Struktur
“Azərbaycan Sənaye Korporasiyası” ASC-də 5 üzvdən ibarət Müşahidə Şurası yaradılıb. Cəmiyyətin strukturunun təsdiqini, işçilərin əmək haqqlarının müəyyənləşdirilməsini və nizamnamə ilə Müşahidə Şurasına həvalə edilmiş digər səlahiyyətləri “Azərbaycan Sənaye Korporasiyası” ASC-nin Müşahidə Şurası, Cəmiyyətin fəaliyyətinə cari rəhbərliyi Baş direktor həyata keçirir.
Müşahidə Şurasının sədri :
- Natiq Əmirov : Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin müdiri
Müşahidə Şurasının üzvləri :
- İnam Kərimov : Azərbaycan Respublikasının Kənd təsərrüfatı naziri
- Xalid Əhədov : Azərbaycan Respublikasının Birinci vitse-prezidentinin köməkçisi
- Mikayıl Cabbarov : Azərbaycan Respublikasının İqtisadiyyat naziri
- Samir Şərifov : Azərbaycan Respublikasının Maliyyə naziri
- Elman Rüstəmov : Azərbaycan Respublikası Mərkəzi Bankının sədri
“Azərbaycan Sənaye Korporasiyası” Açıq Səhmdar Cəmiyyətinin yaradılmasında məqsəd
- “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Fərmanın tətbiqi ilə əlaqədar dövlət əmlakının idarə edilməsinin səmərəliliyini artırmaq.
- Korporativ idarəetmə prinsiplərinə əsaslanan hesabatlılıq və nəzarət sistemini formalaşdırmaq.
- Dövlətə məxsus müəssisələr arasında əlverişli kooperasiya əlaqələrinin yaradılmasına və istehsal potensialının dəyər zəncirinin həlqələri üzrə artırılmasına nail olmaq.
- Ölkədə iqtisadiyyatın tarazlı, rəqabətqabiliyyətli və dayanıqlı inkişafını təmin etmək.
- Uğurlu inkişafın təmin edilməsi üçün növbəti dövrlərdə də, müasir çağırışlar və yeni təşəbbüslər nəzərə alınmaqla, iqtisadi islahatların əsas strateji hədəflərinə uyğun bir sıra tədbirləri həyata keçirmək, o cümlədən mövcud təbii və iqtisadi resursları təsərrüfat dövriyyəsinə cəlb etmək, dövlət mülkiyyətində olan və paylarının nəzarət zərfi dövlətə məxsus olan əmlakları daha səmərəli idarə etmək.
- Qeyri-neft sektorunun inkişaf sürətini artırmaq, regionlarda və bütövlükdə respublikada yeni iş yerlərinin açılması ilə işsizliyi aradan qaldırmaq, əhalinin maddi-rifah halının yüksəldirməsini təmin etmək.
"Azərbaycan Sənaye Korporasiyası" Açıq Səhmdar Cəmiyyətinin tərkibində olan müəssisələr
Hazırda "ASK" ASC-nin nəzdində iqtisadiyyatın müxtəlif sahələrini təmsil edən 19 törəmə müəssisə fəaliyyət göstərir.
“Azəralüminium” MMC
Azərbaycan Respublikasının əlvan metallurgiya sənayesinin aparıcı sahəsi olan boksit və alunit filizindən alüminium – oksid (gil-torpaq), ilkin alüminium və yarımfabrikat (alüminium vərəq-lövhə, zolaq hər iki üzü boyanmış vərəq və lövhə, billet, külcə və rulon şəklində) məhsullarının istehsalı sahəsi üzrə aparıcı şirkətdir. "Azəralüminium" MMC-nin "Gəncə Alüminium Kompleksi" Gəncə şəhərində yerləşir. Kompleksin tərkibinə 4 zavod (Elektroliz Zavodu, Anod Prosesləri Zavodu, Metal Tökmə və Fasiləsiz Yayma Zavodu, Təzyiqlə Emal və Boyama Zavodu), 2 köməkçi sahə (110 kvt-luq və Silisium Düzləndirici Yarımstansiya, Mexaniki Təmir Stansiyası) və sosial obyektlər daxildir.
Kompleksdə avtomatlaşdırılmış, müasir texnologiyalara əsaslanan, ildə 52 000 ton ilkin alüminium istehsal gücündə zavodlar fəaliyyət göstərir. Kompleksdə istehsal olunan maye şəkilli ilkin alüminiumdan istifadə edərək, dünya standartlarına cavab verən Metaltökmə və Fasiləsiz Yayma Zavodu, Təzyiqlə Emal və Boyama Zavodu fəaliyyət göstərir.
"Azəralüminium" MMC tərəfindən qabaqcıl texnologiyalar əsasında istehsal olunan məhsullar Avropa Birliyi standartlarının bütün tələblərinə cavab verir.
“Azərpambıq ASK” MMC
Azərbaycan Respublikasının Prezidenti cənab İlham Əliyevin irəli sürdüyü prinsipləri rəhbər tutaraq "Azərbaycan Sənaye Korporasiyası" ASC-nin təsisi ilə 25 may 2018-ci il tarixdə "Azərpambıq Aqrar Sənaye Kompleksi" MMC yaradılmışdır. Cəmiyyət pambıq istehsalı, tədarükü, emalı və emaldan alınan məhsulların (pambıq mahlıcı, texniki çiyid, pambıq yağı, köməkçi məhsullar, çiyid cecəsi və s.) satışı ilə məşğul olur. Cəmiyyətin tabeliyində 6 pambıq istehsalı və tədarükü məntəqəsi və Biləsuvar rayonunda yerləşən Təcrübə-Sınaq Təsərrüfatı, Bərdə rayonunda da 2,0 min hektar ərazidə yeni Təcrübə-Sınaq Təsərrüfatı yaradılması nəzərdə tutulub. Mövcud 6 pambıq istehsalı və emalı zavodu, bundan əlavə Bərdə rayonunda Təcrübə-Sınaq Təsərrüfatında yeni 15,0 min ton gücündə xam pambıq emalı zavodunun inşası nəzərdə tutulub. Şirvan Pambıq Emalı zavodunda texniki çiyiddən yağ emal edən sex də fəaliyyət göstərir.
Cəmiyyət üzrə 2018-ci il mövsümündə respublikanın 14 rayonunda 29,0 min hektarda pambıq əkini aparılmış və bu günə qədər 49,3 min ton xam pambıq tədarük edilmiş, hədəf isə 58,0 min ton xam pambıq yığılmasına nail olmaqdır. Növbəti mövsüm ilində isə Cəmiyyət üzrə 32,1 min hektarda pambıq əkini nəzərdə tutulub. Cəmiyyətin hesabında pambığın əkilməsi, becərilməsi və yığılması üçün 2993 sayda müxtəlif müasir tipli kənd təsərrüfatı texnikaları mövcuddur ("JOHN-Deere" markalı pambıq yığan kombayn, şum-mala, becərmə traktorları, qoşqular, kotan, kultivasiya aqreqatları və s.). "Aqrolizinq" ASC-nin xətti ilə tələbata uyğun yeni texnikaların alınması da nəzərdə tutulur.
“Azərtütün ASK” MMC
Azərbaycan Respublikası Prezidentinin 04 dekabr 2017-ci il tarixli, 1704 saylı Fərmanına uyğun olaraq, "İntertobacco" MMC-nin əmlakları "Azərbaycan Sənaye Korporasiyası" ASC-nin mülkiyyətinə götürülmüş və 25 may 2018-ci il tarixdən "Azərtütün ASK" MMC qeydiyyata alınaraq fəaliyyətə başlamışdır. "Azərtütün ASK" MMC-nin Balakən, Zaqatala, Qax və Şəki rayonlarında 266 ədəd müasir odla qurutma kamerası, anbar və ofis binaları, habelə digər zəruri infrastruktura malik 4 ədəd Tütün istehsalı və emalı məntəqəsi, Zaqatala rayonunda isə bir Tütün emalı zavodu fəaliyyət göstərir. Qurutma kameraları Bolqarıstanın "Ronis" və İtaliyanın "De Cloet", emal zavodunun avadanlıqları isə ABŞ-ın "MacTavish Evans" və İtaliyanın "Goddiolli Bellanti" şirkətlərinin istehsalıdır. Ümumilkdə, "Azərtütün ASK" MMC və onun strukturuna daxil olan müəssisə və obyektlərdə 194 daimi iş yeri vardır, mövsümdə isə 500–550 nəfər müvəqqəti işçi cəlb edilir.
“Azəripək” MMC
2018-ci ildə yaradılıb. Cəmiyyətin tərkibində olan istehsal sahələrinə baramadan xam ipəyi açan istehsalat, toxucu istehsalatı, boyaq-bəzək istehsalatı, pambıq əyirici istehsalat, burucu sex daxildir. Qeyri-istehsal sahələri isə idarə binası, mexanika, energetika, avtonəqliyyat və xammal sahələrindən ibarətdir.
Pambıqəyirmə istehsalatının 3 növbəli iş rejimində illik istehsal gücü 3 min ton olan mahlıc emalı, baramadan xam ipəyi açan istehsalatın 1 növbəli iş rejimində illik istehsal gücü 500 ton olan yaş barama emalı, toxucu istehsalatının 1 növbəli iş rejimində illik istehsal gücü 50 min p/m olan ipək parça, 40 min p/m olan pambıq parça istehsalı, boyaq-bəzək istehsalatının 1 növbəli iş rejimində illik istehsal gücü əl üsulu ilə 10 min ədəd olan kəlağayı və 5 min ədəd olan şərf təşkil edir. İstehsal olunan məhsullar xam ipək, xam ipək parça, kəlağayı və ipək ipliklərdir.
“ASK Şüşə” MMC
2018-ci ilin fevral ayında təsis edilib. Müəssisə 22 ha ərazidə yerləşir və İtaliyadan gətirilmiş ən müasir avadanlıqlarla təchiz olunub. Müəssisənin illik istehsal potensialı 70–75 milyon ədəd şüşə qab təşkil etməkdədir. Ümumilikdə "ASK Şüşə" MMC-də istehsal prosesinə 320 nəfərdən çox yerli və xarici mütəxəssis cəlb edilib. Burada 120 tonluq şüşəbişirmə sobası, əlavə korpus və sexlər yerləşir. İstehsalat sahəsi yeni sistemli qablaşdırma sexi, laboratoriya və anbardan ibarətdir. İstehsalat prosesinə aid bütün mərhələlər nəzarət altındadır, xammal və hazır məhsulun keyfiyyəti fasiləsiz olaraq yoxlanılır. Müəssisə regionda ən geniş imkanları olan istehsalçıdır. Əsas xammalın müəyyən hissəsi ölkədə istehsal olunur, müəyyən hissəsi isə Rusiya, Ukrayna, Türkiyə və digər ölkələrdən gətirilir.
“ASK Şəki Şərab” MMC
2018-ci ildən "ASK" ASC-nin nəzdində fəaliyyət göstərir. Zavod istehsal sexi, emal sexi, inzibati bina və anbardan ibarətdir. Müəssisədə quraşdırılmış avadanlıqlar İtaliyanın tanınmış şirkətlərindən olan "Della Toffola SPA" şirkətinin istehsalıdır. Zavodun əsas fəaliyyət istiqaməti şərab istehsalıdır. Zavodun illik üzüm qəbulu 3 min tondur. Xammal kimi istifadə olunan üzüm Azərbaycanın rayonlarından yığılır. Müəssisənin əsas məqsədi istehsal etdiyi şərabların dünya standartlarına uyğun olmasını təmin etməkdir. Bu illər ərzində "ASK Şəki Şərab" zavodu istehsal olunan şərab növlərinin daxili və xarici bazarlarda satışını həyata keçirir
"Azərbaycan Sənaye Korporasiyası" ASC-nin tərkibinə daxil olduğu müddətdə 400 000 kq üzüm qəbul edilib və həmin xammaldan 500 000 litr şərab materialı istehsal olunub.
“ASK Ayaqqabı Fabriki” MMC
Ümumi sahəsi — 27079 m2, istehsal sahəsi — 7914.9 m2, anbar sahəsi — 3000m2 və ofis sahəsi — 609.5m2 təşkil edir. Cəmiyyətin 4 istehsal sexi, elektro-mexaniki sexi və labaratoriyası var. 1 №-li sex — ayaqqabıların üzlük hissələrinin yığılması, pəstahların formalaşdırılması, 2 №-li sex — ayaqqabı altlıqlarının injeksiya üsulu ilə tökülməsi, 3 №-li sex — ayaqqabıların üzlük, içlik hissələrinin kəsilməsi və altlıq hissələrinin hazırlanması, 4 №-li sex — zabit heyəti üçün yay və qış çəkmələri, kişi və qadın üçün gündəlik ayaqqabılar, o cümlədən idman ayaqqabılarının istehsalı ilə məşğuldur. Laboratoriyada isə daxil olan materialların və istehsal edilən ayaqqabıların test və sınaqları aparılır, onların keyfiyyət və davamlılıq göstəriciləri yoxlanılır.
"ASK Ayaqqabı Fabriki" MMC Azərbaycan Respublikasının Güc Nazirlikləri üçün ( AR Müdafiə Nazirliyi, AR DİN-nin Daxili Qoşunları, AR DİN-in Təchizat İdarəsi, AR Dövlət Sərhəd Xidməti, AR Xüsusi Dövlət Mühafizə Xidməti — Milli Qvardiya) təbii dəridən uzunboğaz əsgər və dənizçi botları, zabit heyəti və qadın hərbi qulluqçuları üçün yay və qış çəkmələri, kazarma və hospital başmaqları, o cümlədən istehsalatda, tikintidə, limanda, dəmir yollarında çalışan fəhlələr üçün xüsusi ayaqqabılar, həmçinin kişi və qadınlar üçün müxtəlif çeşiddə ayaqqabılar, idman ayaqqabıları istehsal etmişdir.
“ASK Tekstil” MMC
"ASK Tekstil" MMC-nin nəzdində olan fabrikin iplik istehsal sahəsində 100 faiz pambıq olan 2 növ iplik istehsal edilir. Tam avtomatlaşdırılmış trikotaj toxuma avadanlıqları vasitəsilə Türkiyədən gətirilən akril ipliklərdən və fabrikin istehsalı olan pambıq ipliklərindən kişi, qadın və uşaqlar üçün müxtəlif növ trikotaj məhsulları istehsal edilir. Köynək istehsalı sahəsində isə əsasən tərkibi 100 faiz pambıq olan parçalardan istifadə olunur. Ənənəvi istehsal sahələrindən biri də xalça istehsalı sahəsidir. Burada bitki mənşəli boyalardan istifadə edilir və Azərbaycanın bütün xalçaçılıq məktəblərinin çeşidlərini görmək olar.
“ASK Security” MMC
"ASK Security" Məhdud Məsuliyyətli Cəmiyyəti "Azərbaycan Sənaye Korporasiyası" ASC və onun törəmə müəssisələrinə məxsus qeyri-yaşayış obyektlərinin təhlükəsizliyinin təmin edilməsi və qorunmasını həyata keçirən mühafizə şirkətidir. Şirkət zəngin iş təcrübəsi və peşəkar əməkdaşları sayəsində mühafizə xidmətini yüksək dəqiqlik və peşəkarlıq prinsipləri çərçivəsində həyata keçirir.
“ASK Xidmət” MMC
"ASK Xidmət" Məhdud Məsuliyyətli Cəmiyyəti 09 mart 2018-ci il tarixində "Azərbaycan Sənaye Korporasiyası" Açıq Səhmdar Cəmiyyəti tərəfindən təsis edilmişdir."ASK Xidmət" MMC Azərbaycan Respublikasının qanunvericiliyi ilə qadağan olunmayan bütün fəaliyyət növləri ilə məşğul ola bilər, əsas fəaliyyəti isə "Azərbaycan Sənaye Korporasiyası" Açıq Səhmdar Cəmiyyətinin mülkiyyətində olan dövlət əmlakının idarəedilməsi xidmətlərini göstərməkdir. Hal-hazırda, müəssisəmiz "ASK Plaza" İşgüzar Əlaqələr Mərkəzi, "ASK Plaza" İşgüzar Əlaqələr Mərkəzi 2-ci korpus, "AMAY" Ticarət Mərkəzi və digər əmlaklarda mülkiyyətçinin adından çıxış edərək obyektlərdə yerləşən qeyri-yaşayış sahələrini icarəyə vermək,texniki vəziyyəti nəzarətdə saxlamaq, yanğın təhlükəsizliyi və qüvvədə olan digər təhlükəsizlik normalarının müvafiq şəkildə saxlanılmasını təmin etməkdədir.
ASK Arena
2018-ci il 02 fevral tarixində "Azərbaycan Sənaye Korporasiyası" ASC tərəfindən təsis edilib və kompleksin idarə edilməsi Cəmiyyətə həvalə olunub. Kompleksin tərkibinə daxil olan "ASK Arena"ya məxsus meydançanın tutumu 8125 nəfərdir. Arena futbol üzrə Azərbaycan Premyer Liqasında çıxış edən "Keşlə" futbol klubunun ev oyunları meydançası kimi istifadə olunur. Arenanın ərazisində futbol meydançaları, hovuz, fitnes mərkəzi, Milli Karate Federasiyası, karate idman zalları, boks üçün zal, ofis mərkəzləri, beynəlxalq standartlara cavab verən 4 ulduzlu "Avenue" oteli, geniş otaqlı apartamentlər, 3 mərtəbədən ibarət geniş mətbəxli restoran və əyləncə mərkəzləri yerləşir.
“ASK İnşaat” MMC
"Azərbaycan Sənaye Korporasiyası" ASC-nin tikinti və tikinti məhsullarının istehsalı şöbəsinin funksiyasına uyğun olaraq aparılan layihələndirmə və tikinti-quraşdırma işlərinə texniki nəzarəti həyata keçirir.
2018-ci ildə "Azərbaycan Sənaye Korporasiyası" ASC-yə Balakən rayonu, Hənifə kəndində 2 ha torpaq sahəsi ayrılmış və həmin ərazidə ümumi gücü 540 ton olan 60 kameralıq "Balakən Tütün İstehsalı və Emalı" məntəqəsi inşa olunmuşdur.
2018-ci ildə "Azərbaycan Sənaye Korporasiyası" ASC tərəfindən "Azərpambıq ASK" MMC üçün Biləsuvar Pambıq İstehsalı və Emalı Zavodunda 2 ədəd, Ağcabədi Pambıq İstehsalı və Emalı Zavodunda 4 ədəd, Saatlı Pambıq İstehsalı və Emalı Zavodunda 1 ədəd və Beyləqan Pambıq İstehsalı və Emalı Zavodunda 4 ədəd pambıq taya yerləri tikilib tam başa çatdırılmışdır.
Tikintisinə 2018-ci ilin dekabr ayında başlanmış Bakı şəhəri, Yasamal rayonu, 1033-cu məhəllə, Tbilisi prospekti 33 ünvanında yerləşən "Azərbaycan Sənaye Korporasiyası" ASC-nin təyinatı dəyişdirilmiş ofis binasında hazırda işlər davam etdirilir. Ofis binasının ümumi tikinti sahəsi 8942m² olmaqla 5 yerüstü mərtəbədən və 2 yeraltı mərtəbəli avtomobil dayanacağından ibarətdir. Binanın 4-cü və 5-ci mərtəbələrini "ASK" ASC-nin ofis sahəsi kimi istifadə etmək, 1–3 mərtəbələrini isə ofis və biznes sahələri üçün icarə vermək nəzərdə tutulmuşdur. Binanın təmir-tikinti işlərinin başa çatdırılması 2019-cu ilin mart ayına planlaşdırılır.
Hazırda 2018-ci ilin oktyabr ayında tikintisinə başlanılmış Bakı şəhəri, Qaradağ rayonu, Salyan şosesi, 25-ci km ünvanında yerləşən "ASK Şüşə" MMC-nin 1-ci soba sexi üçün ölçüləri 132×60 m olan "Hazır məhsul anbarı"nın tikinti-gücləndirmə işləri aparılır. Anbarın tikinti-quraşdırma işlərinin başa çatdırılması 2019-cu ilin 1-ci yarımilliyinə nəzərdə tutulmuşdur.
“ASK İzolit” MMC
"ASK izolit" MMC "Mingəçevir İzolit" ASC-nin bazasında yaradılmışdır. Müəssisədə aşağıda göstərilən növ məhsullar istehsal olunur: elektrotexnika və energetika sənayesi üçün izolyasiya məhsulları, polimer borular, polimerdən birləşdirici elementlər və hissələr, şüşəplastikdən geniş çeşidlərdə kompozit profillər və armaturlar,metropolitendə elektrokontakt xəttlərinin izoləedici örtükləri, neft-qaz sənayesi üçün şüşəplastikdən borular və fittinqlər, geoloji kəşfiyyat və lay-süxur tədqiqatları üçün şüşəplastik içliklər, kimyəvi aqressiv məhlulların, turşu və duzların nəqli üçün borular və sairə. Müəssisənin məhsulları AZS Milli Sertifikatlaşdırma Sisteminin "Uyğunluq Sertifikatı" ilə istehsal olunur.
“ASK Şəki Kərpic” zavodu
"ASK Şəki Kərpic" zavodunun istehsal gücü ildə 30 milyon ədəd kərpic təşkil edir. Hazırda zavodda 10 növ kərpic istehsal olunur. Zavodun xammal təminatı "Şəki Kərpic" zavodu və Şəki rayonu Daşüz Bələdiyyəsi arasında bağlanılmış icarə müqaviləsinə əsasən icarəyə götürülmüş 10 ha torpaq sahəsində yerləşən gil yatağından təmin olunur. Zavodda 76 nəfər işçi çalışır. İstehsal olunan məhsullar üçün Standartlaşdırma Metrologiya və Patent üzrə Dövlət Komitəsindən Uyğunluq Sertifikatı alınmışdır.
“ASK Aqro” MMC
"ASK Aqro" MMC Şəki rayonunun Orta Zəyzid kəndində fəaliyyət göstərir. Südçülük-maldarlıq üzrə damazlıq təsərrüfatı rayonda cins maldarlığın inkişafında mühüm yer tutur. Müasir tipli bu heyvandarlıq kompleksində hazırda "Holştin-friz" (Hollandiya) cinsindən olan 1400 baş iribuynuzlu heyvan saxlanılır. Heyvandarlıq kompleksinə böyük fermalar, sağım sexi, laboratoriya və yardımçı tiklilər daxildir. Sağım sexində quraşdırılan avadanlığın köməyi ilə bir dəfəyə 32 baş inəyin südünün ətraf mühitlə təması olmadan sağılması, toplanması, soyudulması və saxlanılması təmin olunur. Kompleksdə saatda 10 ton südün pasterize edib istehsal edilməsi üçün pendir zavodu, hər biri 500 ton tutumu olan ot saxlamaq üçün 3 ədəd talvar, silos və senaj basdırmaq üçün 6000 ton tutumu olan anbar mövcuddur.
“ASK Şəki SES" MMC
Azərbaycanın vahid enerji sisteminə qoşulmuşdur. Stansiya kompleks təyinatlıdır, Şəki şəhərinin bir hissəsinin elektrik enerjisinə və suya olan tələbatını ödəyir.
Stansiyada təmir-yenidənqurma işləri aparılmışdır. Stansiyanın Baş su hövzəsi tam yenidən qurulmuş, Almaniyanın "WKV" şirkətindən yeni güc avadanlıqları alınmış, stansiyaya gətirilərək, quqraşdırılmış və 2008-ci ilin mart ayında istismara verilmişdır.
Hazırda stansiyanın gücü 1,3 mvt-dır. Yeni güc avadanlıqları istismara verildikdən sonra stansiyada elektrik enerjisi istehsalı 3 dəfə artmışdır. Hər ay orta hesabla 600–700 min kvt saat elektrik enerjisi istehsal edilir.Yeni avadanlıqlar istifadəyə verildikdən sonra stansiyada 2008-ci ildə 5096640 kvt.saat, 2009-cu ildə 6520800 kvt.saat, 2010-cu ildə 6384000 kvt.saat, 2011-ci ildə 5044536 kvt.saat, 2012-ci ildə 5162328 kvt.saat, 2013-cü ildə 6409608 kvt.saat elektrik enerjisi istehsal edilmişdir.
1 aprel 2014-cü il tarixindən etibarən satılmış elektrik enerjisinin dəyəri bağlanmış yeni müqavilə əsasında "Qəbələ Regional Elektrik Şəbəkəsi" MMC tərəfindən ödənilir.
Hazırda müəssisədə 25 nəfər çalışır. Stansiyada aparılan işlər eyni zamanda Şəki şəhərinin su ilə təminatının etibarlılığını xeyli yüksəltmişdir.
İstinadlar
- Azərbaycan Sənaye Korporasiyası- http://ask.gov.az/
- Trend.az- https://az.trend.az/
- AZƏRTAC- https://azertag.az/
- Marja- https://marja.az/
Həmçinin bax
Xarici keçidlər
- "Azərbaycan Sənaye Korporasiyası" ASC
- "Azərbaycan Sənaye Korporasiyası" ASC-nin rəsmi Facebook səhifəsi
- "Azərbaycan Sənaye Korporasiyası" ASC-nin rəsmi İnstagram səhifəsi